Ɛsra 10 - AHYERƐLƐ KRONGRON

Agyaa mvrafra bralɛ nwo nhyehyɛleɛ

¹ Mmerɛ bɔ Ɛsra gu so ɔbɔ mbaeɛ, bɔ ole esuɛ ode bɛ bɔne to nu, bɔ né wafa ye nyunu wabutu berɛ wɔ Nyameɛ awuro ne anyunu berɛ ne, Yisraelfoɛ pembepembe, mmienzua ne mmrasua ne ngwadaa bɛɛpɛle ye nwo beyiale, na bɛ koso besuni hahii.

² Na Elam bosoniɛ Yehiel ɔwa Sekania sele Ɛsra kyɛ, “Yanni nahorɛ yamma yɛ Nyameɛ, kyɛ yagyigya Amaenmaensofoɛ mmrasua bɔ bɛwɔ aseɛ ne aso ɔ. Nakoso ɛhe asi ye po, anyelasoɛ wɔ berɛ ma Yisrael.

³ Yiti kekesaala ye, odi kyɛ yɛne yɛ Nyameɛ yɛyɛ apam, kyɛ yɛ ye nemɔ, bɛ ne bɛ mma mɔ, yɛkɔfoa bɛ maa bekofi yɛ nu bɛkɔhɔ. Me mene, ɛne mmenia bɔ bedi Nyameɛ mmeraa dwirɛ ne aso ne, odi kyɛ yɛyɔ ye sɔ kyɛbɔ mmeraa ne kyire ɔ.

⁴ Dwɔso, ofikyɛ wɔ yeɛ asodie ne ɔla wɔ so ɔ. Yɛgyi wɔ si, yiti si wɔ hue ná yɔ ye sɔ.”

⁵ Yeɛ Ɛsra dwɔsole, na ɔmane asɔfo mbanyi ne Lewifoɛ ne Yisrael amukoraa bɛtale ndaen kyɛ bekoli sɔ dwirɛ ne aso. Na bɛtale ndaen ne.

⁶ Afei Ɛsra fili Nyameɛ awuro ne anyunu berɛ, na ɔhɔle Eliasibo awa Yehohanan sua nu. Ɔhɔle berɛ ne, wannidi, yeɛ wanno nzue, ofikyɛ bɛ bɔ befili nnurehyelɛ nu bɛwale ne, né odi b’amumuyɛɛ nwo aworabɔlɛ.

⁷ Na behyinini Yuda ne Yerusalem amukoraa bɛbɔle dawure behyirele bɛ bɔ bafi nnurehyelɛ nu bawa ne amukoraa, kyɛ beeyia nu wɔ Yerusalem,

⁸ kyɛ bama bɛ ɛlɛsa, na ebiala bɔ wamma ne, mbɔtam mbanyi ne mbanyi nemɔ bahyɛ mmeraa kyɛ bele ye nwo nningyein amu, ná bɛpɛ ye asue befi mmenia bɔ bafi nnurehyelɛ nu bawa ne anu.

⁹ Na ɛlɛsa ne sone ne, né bɛ bɔ bɛwɔ Yuda ne Benyamin amukoraa baaboa bɛ noa wɔ Yerusalem. Né ɔte kyẽa bɔ ɔtɔ so aburanyɔ wɔ bosome bɔ ɔtɔ so ngona ne anu. Mmenia ne amukoraa bɛtenatenane dwaa ne aso wɔ Nyameɛ awuro ne anyunu berɛ. Na ɔnate sɔ dwirɛ ne ɔne esue piri bɔ né ɔtɔ ne ati, bɛ nwo wosowosole bɛ.

¹⁰ Afei ɔsɔfo Ɛsra dwɔso gyinane sele bɛ kyɛ, “Ɛmɔabu mmeraa ne aso, kyɛ ɛmɔagyigya Amaenmaensofoɛ mmrasua ɔ, na ɛmɔnate ɛhe aso bama Yisrael foɛlilɛ ne wayɛ piri paa.

¹¹ Yiti odi kyɛ ɛmɔde ɛmɔ bɔne bɛto nu bekyire AWURADE ɛmɔ nana mɔ Nyameɛ ne, ná ɛmɔyɔ bɔ ɔsɔ ye nye ɔ. Ɛmɔhwe ɛmɔ nwo befi aseɛ ne aso mmenia nwo, ɔne Amaenmaensofoɛ mmrasua nwo.”

¹² Yeɛ mmenia bɔ bayia berɛ ne amukoraa bɛteane nu bebuale kyɛ, “Ye ala ɛne. Bɔ ahã ne ala yeɛ ɔsɛ kyɛ yɛyɔ ɔ.

¹³ Nakoso mmenia ne sone, asuso koso atikye bɔ yɛngɔhora dwaaso gyina ɔ. Yeɛ nna nikyee bɔ yɛkɔhora yɛkɔfa ɛlɛho anaa elenyɔ yɛkɔyɔ hɔ ɔ, ofikyɛ yɛ bɔ yato mmeraa wɔ ɛhe anwo ne, yɛsone paa.

¹⁴ Yiti ma yɛ mbanyi mɔ begyina mmenia ne amukoraa yɛ gya nu, ná ebiala bɔ ɔwɔ yɛ nguro nemɔ aso bɔ wagya Amaenmaensoniɛ braa ne, maa ɔbra bɛ nyunu wɔ mmerɛ bɔ bɛkɔhyɛ bɛkɔma ye ɔ nu. Sɛ bɛ́ba a, odi kyɛ bɛ kuro mbanyi ne ndɛenbualɛfoɛ bɛboka bɛ so bɛ ne bɛ bɛba. Na yɛkɔyɔ ye sɔ toonn kɔpem kyɛ yɛ Nyameɛ ɛyaa piri bɔ wafɛ ye yɛ so wɔ edwirɛ he anwo ne, ye ahone kɔtɔ nzue nu ɔ.”

¹⁵ Asahel awa Yonatan ne Tikiwa awa Yahasia bɛ ngome yeɛ betiale sɔ nzusuleɛ ne anu ɔ, na Mesulam ne Lewiniɛ Sabetae bɛfoale bɛ so.

¹⁶ Na bɛ bɔ befili nnurehyelɛ nu bɛwale ne de, belele nzusuleɛ ne bɛtole nu. Na ɔsɔfo Ɛsra yeyele mmusua mbanyi nemɔ, abusua biala nu sona ko, na bɛbobɔle bɛ dumaa. Na kyẽa bɔ oli moa wɔ bosome bɔ ɔtɔ so buru ne anu ne, bɛtenane ase kyɛ bɛneanea edwirɛ ne anu.

¹⁷ Na oodwuli kyẽa bɔ oli moa wɔ bosome bɔ oli moa ne anu ne, né baneanea mmienzua bɔ bagyigya Amaenmaensofoɛ mmrasua nemɔ bɛ dwirɛ ne anu bayie.

¹⁸ Benwuni kyɛ asɔfo abusua ne, bɛ bɔ bagyigya Amaenmaensofoɛ mmrasua mɔ ɛhe: Yosadake awa Yesua ye bosofoɛ ne oliɛma mɔ: Maaseya, Eliesa, Yaribo ne Gedalia.

¹⁹ Bɛhyɛle ɛbɔ kyɛ bɛkɔfoa bɛ ye nemɔ maa bekofi bɛ nu bɛkɔhɔ. Belele bɛ mvomsoɛ bɛtole nu, na bɛfale boaen nyii ko bɛbɔle mvomsoɛ afɔleɛ.

²⁰ Yimere bosofoɛ nemɔ: Hanani ne Sebadia.

²¹ Harim bosofoɛ nemɔ: Maaseya, Elia, Semaya, Yehiel ne Yusia.

²² Pasure bosofoɛ nemɔ: Elionae, Maaseya, Yismael, Netanɛl, Yosabade ne Elasa.

²³ Lewifoɛ nemɔ: Yosabade, Simei, Kelaya (ye ala ole Kelita), Petahia, Yuda ne Eliesa.

²⁴ Edweintolɛfoɛ nemɔ: Eliasibo. Anoa awɛmvoɛ nemɔ: Salum, Telem ne Yuri.

²⁵ Yisraelfoɛ ngaa ne koso, Parose bosofoɛ: Ramia, Yisia, Malkiya, Miyamin, Eleasa, Malkiya ne Benaya.

²⁶ Elam bosofoɛ nemɔ: Matania, Sakaria, Yehiel, Abidi, Yeremote ne Elia.

²⁷ Satu bosofoɛ nemɔ: Elionae, Eliasibo, Matania, Yeremote, Sabade ne Asisa.

²⁸ Bebae bosofoɛ nemɔ: Yehohanan, Hanania, Sabae ne Atelae.

²⁹ Bani bosofoɛ nemɔ: Mesulam, Maluke, Adaya, Yasubo, Seale ne Yeremote.

³⁰ Pahate Moabo bosofoɛ nemɔ: Adena, Kelale, Benaya, Maaseya, Matania, Basalel, Binuyi ne Manase.

³¹ Harim bosofoɛ nemɔ: Eliesa, Yisiya, Malkiya, Semaya, Simeon,

³² Benyamin, Maluke ne Semaria.

³³ Hasum bosofoɛ nemɔ: Matenae, Matata, Sabade, Elifɛlɛte, Yeremae, Manase ne Simei.

³⁴ Bani bosofoɛ nemɔ: Maadae, Amram, Yuel,

³⁵ Benaya, Bedeya, Keluhi,

³⁶ Wania, Meremote, Eliasibo,

³⁷ Matania, Matenae ne Yaasu.

³⁸ Bani, Binuyi, Simei,

³⁹ Selemia, Natan, Adaya,

⁴⁰ Makenadebae, Sasae, Sarae,

⁴¹ Asarel, Selemia, Semaria,

⁴² Salum, Amaria ne Yosef.

⁴³ Nebo bosofoɛ nemɔ: Yeyiɛl, Matitia, Sabade, Sebina, Yadae, Yowel ne Benaya.

⁴⁴ Né sɔ mmenia ne amukoraa bagyigya Amaenmaensofoɛ mmrasua, na né bɛ nu biemɔ bɛ ne bɛ bawowo.