Ɛsra 1 - AHYERƐLƐ KRONGRON

Karose ma Yudafoɛ ate kyɛ bɛhɔ bɛ maen nu

¹ Pɛsia hene Karose lili hene ne, ye afoɛ bɔ oli moa ne anu, kyɛbɔ AWURADE dwirɛ bɔ ɔnate Yeremia so hane ne ɔkɔwa nu ne, AWURADE kanyane Pɛsia hene Karose maa otuli ɛbɔfoɛ mɔ maa bɛɛbɔle edwirɛ dawure wɔ ye ahennie amukoraa nu, na ɔhyerɛle krataa koso bokale so kyɛ,

² “Pɛsia hene Karose nwa nyoo: AWURADE bɔ ɔte nyameɛso Nyameɛ ne, wafa aseɛ so ahennie amukoraa wawura me sa, na wahyɛ me kyɛ nzi sua mma ye wɔ Yerusalem bɔ ɔwɔ Yuda ne.

³ Yiti ɛmɔ nu biala bɔ ɔboka ye mmenia ne aso ne, ye Nyameɛ ogyina ye si. Mama ye ate kyɛ ɔhɔ Yerusalem bɔ ɔwɔ Yuda ne oosa osi AWURADE Yisrael Nyameɛ ye awuro ne bieku. Ye yeɛ ɔte Nyameɛ bɔ ɔwɔ Yerusalem ɔ.

⁴ Yisraelfoɛ bɔ baha ne, nekaa biala bɔ bɛte ne, ɔsɛ kyɛ berɛ ama bɛfa sɔ nningyein hemɔ bɛma Yisraelfoɛ nemɔ: ɛdwetɛ, esikaa kɔkorɛ, nningyein, nyɛmmoa, ɔne akyɛdeɛ bɔ bɛkwaafa besi Nyameɛ awuro bɔ ɔwɔ Yerusalem ne.”

⁵ Na ɛhe mane Yuda ne Benyamin abusua nu mbanyi, asɔfo ne Lewifoɛ, yeɛ ebiala bɔ Nyameɛ kanyane ye ne, ɔboaboale ye nwo kyɛ ɔkɔ Yerusalem osa kosi AWURADE awuro ne.

⁶ Na mmenia bɔ Yisraelfoɛ ne bɛ te mbɔtam ne amukoraa bɛfale sɔ nningyein hemɔ bɛbokale bɛ: ɛdwetɛ ndalie, esikaa kɔkorɛ, nningyein, nyɛmmoa, mbembenanneɛ, ɔne akyɛdeɛ ahoroɔ bɔ befiane bɛ kunu bɛfa bɛmane bɛ ɔ.

⁷ Na AWURADE awuro berɛ nningyein bɔ Nebukadenesa ɔɔsesa fili Yerusalem wale, bɔ ɔɔfa guale ye nyameɛ mɔ bɛ sua nu ne, Nana Karose yeye wale.

⁸ Pɛsia hene Karose maa bɛfale nningyein ne bewurale Pɛsia fotoɛsoneafoɛ Mitredate sa, na ye koso obuli ye nwo ngondaa ɔfa wurale Sesebasa bɔ ɔla Yuda noa ne sa.

⁹ Ye nwo ngondaa ne ɛhe: ndalie bɔ bafa sikaa kɔkorɛ bayɔ ɔ aburasa, ndalie bɔ bafa ɛdwetɛ bayɔ ɔ apee ko, see kulie aburanyɔ ne ngona;

¹⁰ kwangoa bɔ bafa sikaa kɔkorɛ bayɔ ɔ aburasa, kwangoa bɔ bafa ɛdwetɛ bayɔ ɔ ɛyaa nna ne buru, yeɛ ndalie ahoroɔ apee ko.

¹¹ Esikaa kɔkorɛ ne ɛdwetɛ ndalie nemɔ, bɛ mukoraa bɛ somaa te apee nnu ne ɛyaa nna. Mmenia bɔ bɛhyele bɛ nnure bɛhɔle ne, mmerɛ bɔ befili Babilɔn besa bɛba Yerusalem nen, Sesebasa fale sɔ nningyein ne amukoraa osa wale.