Ɛksadɔso 9 - AHYERƐLƐ KRONGRON

Nyɛmmoa wuwuli

¹ Afei AWURADE sele Mose kyɛ, “Kɔ Faro berɛ kose ye kyɛ, ‘AWURADE, Hebrifoɛ Nyameɛ ne nwa nyoo: Ma me mmenia nemɔ ate ma bɛhɔ, ná bɛɛsɔne me.

² Ofikyɛ sɛ anyakyi bɛ ate ma bangɔ, ná ɛkye bɛ sie wa a,

³ AWURADE tumi kɔma ngaka wue bɔ ye noa yɛ hye kɔha wɔ ngaka bɔ bahɔ adidie ɔ, wɔ mbɔngɔ mɔ, afunum mɔ, afupɔngɔ mɔ ne wɔ nyɛmmoa mɔ.

⁴ Nakoso AWURADE kɔfa ɛwɛen kɔto Yisrael ngaka ne Misraim ngaka b’afia, amaa ɔnate so Yisraelfoɛ ngaka nemɔ nu biala anwu.’ ”

⁵ Na AWURADE hyɛle kyẽa kyɛ, “Ɛhema yeɛ AWURADE kɔyɔ sɔ nikyee ne wɔ aseɛ ne aso ɔ.”

⁶ Aleɛ hyene ne, AWURADE yɔle sɔ ala. Misraimfoɛ nyɛmmoa mukoraa wuwuli, nakoso Yisraelfoɛ nyɛmmoa de, ko po anwu.

⁷ Faro somane mmenia maa bɛɛneane, na benwuni kyɛ Yisraelfoɛ ngaka nemɔ, nu ko po wanwu. Nakoso Faro bubuli mmakaa tuale ye so, na wamma mmenia ne ate ma bangɔ.

Mbɔmbɔ anwonyerɛ to pete

⁸ AWURADE sele Mose ne Aarɔn kyɛ, “Ɛ́mɔfura foonoo nu nzoen bɛ sa bum ngoko, ná ma Mose ɔ́to hɔ anwuro wɔ Faro nyunu.

⁹ Ɔkɔkakyi mvuture muhumuhu kotu kɔfa Misraim aseɛ so amukoraa; na ɔkɔkakyi mbɔmbɔ kotutu mmenia ne ngaka nwo ngena wɔ Misraim aseɛ so amukoraa.”

¹⁰ Yiti befurale foonoo nu nzoen, beegyinane Faro nyunu, Mose to hɔle anwuro, na ɔkakyili mbɔmbɔ tutuli mmenia ne ngaka nwo ngena.

¹¹ Ɔnate mbɔmbɔ ne ati, ngonyaayelɛfoɛ nemɔ angora Mose nyunu gyina, ofikyɛ né mbɔmbɔ abobɔ ngonyaayelɛfoɛ nemɔ ne Misraimfoɛ amukoraa.

¹² Nakoso AWURADE mane Faro bubuli mmakaa tuale ye so, na wandɛ bɛ so, kyɛbɔ AWURADE ha hyirele Mose ne ala.

Asukɔtwea nyɔboɛ

¹³ Na AWURADE sele Mose kyɛ, “Pɛ aleɛ dwɔso ná kɔ Faro berɛ kose ye kyɛ, ‘AWURADE, Hebrifoɛ Nyameɛ ne nwa nyoo: Ma me mmenia nemɔ ate ma bɛhɔ, na bɛɛsɔne me.

¹⁴ Ofikyɛ afei de, mebaama me hawo amukoraa ba wɔ bɔbɔ wɔ so, wɔ somvoɛ mɔ ne wɔ maen so, amaa ɔnate so anwu ye kyɛ ebiala nne berɛ bɔ ɔte kyɛ me ɔ wɔ aseɛ so amukoraa.

¹⁵ Na sɛ matengyɛ me sa mama ewue anwonyerɛ abɔ wɔ ne wɔ mmenia a, ahaa bekye awu afi aseɛ ye aso.

¹⁶ Nakoso mamaa anya wɔ ti adidi nu, kyɛ ngɔye me tumi ali ngohyire wɔ ɔ, amaa ɔnate so me dumaa atrɛ ahɔ aseɛ ye aso amukoraa.

¹⁷ Nakoso bekye po yeɛ adwɔso atia me mmenia, bɔ ɛngɔma bɛngɔhɔ ɔ.

¹⁸ Tie, ɛhema bekye sɔa ala, ngɔma asukɔtwea nyɔboɛ kɔtete kogua, bɔ ye sɛso ɔwwale Misraim le fite mmerɛ bɔ bɛkyekyele maen ne bɔ ɔbaadwu ɛnɛ ɔ.

¹⁹ Yiti ma wɔ nyɛmmoa ne wɔ nikyee biala bɔ ɔwɔ buro bɛbra awuro bɛɛbɔ bɛ nwo waen, ofikyɛ asukɔtwea nyɔboɛ ne kɔtɔ kogua sona ne kaka bɔ ɔwɔ buro, bɔ wamma awuro so, na bekowuwu.’ ”

²⁰ Na Faro mbanyi nemɔ nu biala bɔ osuro AWURADE dwirɛ nen, ɔmane ye ngoaa ne ye nyɛmmoa nwatili wale awuro.

²¹ Nakoso bɛ nu biemɔ bɔ bemmu AWURADE dwirɛ ne de, bɛyakyili bɛ ngoaa ne bɛ nyɛmmoa mɔ wɔ eburo.

²² Na AWURADE sele Mose kyɛ, “Tengyɛ wɔ sa fa kyire anwuro ma asukɔtwea nyɔboɛ tɔ gua Misraim aseɛ so amukoraa, ma ogua sona ne ngaka ne eburo mmakaa mukoraa so wɔ Misraim aseɛ so.”

²³ Yiti Mose pagyale ye pɔmaa ne hyirele anwuro, AWURADE mane anwuro bɔle nu kurudududu, ɔtɔle asukɔtwea nyɔboɛ guale, na agralaa tetele fili anwuro wale ase. Na AWURADE tɔle asukɔtwea nyɔboɛ guale Misraim aseɛ so

²⁴ Asukɔtwea nyɔboɛ ne agralaa bɔ ɔ́tete see yerɛmyerɛm lili afra. Na kyɛbɔ ye suronyi si te ne, ofite kyɛ Misraim yɛle maen ɔ, ye sɛso ɔwwale Misraim aseɛ ne amukoraa so le.

²⁵ Asukɔtwea nyɔboɛ ne sɛkyele nikyee biala bɔ ɔwɔ buro wɔ Misraim aseɛ so amukoraa, fite mmenia so kodwu ngaka so; ɔsɛkyele eburo nningyein amukoraati, na ɔpombale eburo mmakaa mukoraati.

²⁶ Sana Gosen aseɛ so, nekaa bɔ né Yisraelfoɛ te ne, yeɛ asukɔtwea nyɔboɛ ne bie andɔ berɛ ɔ.

²⁷ Afei Faro somane maa bɛɛfrɛle Mose ne Aarɔn bɛwale, na osele bɛ kyɛ, “Ɛhe de, mayɛ bɔne, AWURADE di be, na me ne me mmenia mukoraa yɛdi fɔ.

²⁸ Yiti ɛ́mɔsrɛ AWURADE bɛma ɔyakyi, ofikyɛ agralaa ne asukɔtwea nyɔboɛ sɔa de, ɔbo yɛ so. Ngɔma ɛmɔ kɔhɔ, na ɛmɔngɔtena wa ko.”

²⁹ Na Mose sele ye kyɛ, “Sɛ mefi kuro ye anu mefite pɛ a, ngɔtrɛ me sa nu ngɔsrɛ AWURADE, na agralaa ne kɔyakyi, yeɛ asukɔtwea nyɔboɛ ne koso ngɔte ngogua ko, amaa ɔnate so anwu ye kyɛ aseɛ ye te AWURADE deɛ.

³⁰ Nakoso ɛne wɔ mbanyi mɔ de, mese kyɛ ɛmɔnnya bessurole AWURADE Nyameɛ.”

³¹ (Gyese ne ayuo sɛkyele, ofikyɛ né ayuo afa mmaa, yeɛ né gyese koso abɔ nyerɛen.

³² Nakoso ɛmo ahoroɔ mɔ bɔ bannua bɛ ndɛ ne de, banzɛkye.)

³³ Mose fili Faro awuro berɛ, ofili kuro ne anu, ɔtrɛle ye sa nu srɛle AWURADE, na agralaa ne asukɔtwea nyɔboɛ ne yakyili, na esue ne andɔ angua aseɛ ne aso ko.

³⁴ Nakoso Faro nwuni kyɛ esue ne asukɔtwea nyɔboɛ ne agralaa ne ayakyi nen, ɔhɔle so yɔle bɔne, na ɔne ye mbanyi mɔ bebubuli mmakaa betuatuale bɛ so.

³⁵ Yiti Faro bubuli mmakaa tuale ye so, na wamma Yisraelfoɛ nemɔ ate maa bangɔ, kyɛbɔ AWURADE nate Mose so hane ne ala.