Ɛksadɔso 8 - AHYERƐLƐ KRONGRON

Mborohyɛen manyamanya

¹ Na AWURADE sele Mose kyɛ, “Kɔ Faro berɛ kose ye kyɛ, ‘AWURADE nwa nyoo: Ma me mmenia nemɔ ate ma bɛhɔ, ná bɛɛsɔne me.

² Nakoso sɛ amma bɛ ate ma bangɔ a, ngɔma mborohyɛen kɔto kɔpete maen ne anu amukoraa.

³ Mborohyɛen koyi asue Naele nu to, bekofi nu bɛkɔwa w’awuro, bɛkɔwa wɔ sua nu ne wɔ bɛen so, wɔ mbanyi mɔ ne wɔ mmenia awuro, wɔ bokyea mɔ ne wɔ ngukue mɔ nu.

⁴ Na mborohyɛen nemɔ kɔwa wɔ so, wɔ mmenia ne wɔ mbanyi mukoraa so.’ ”

⁵ Na AWURADE sele Mose kyɛ, “Ka kyire Aarɔn kyɛ, ‘Tengyɛ wɔ sa, ná fa wɔ pɔmaa ne kyire asue mbiri mɔ so, asue Naele sa mɔ so, ɔne ɛkwaa mɔ so, ná ma mborohyɛen yɛ Misraim aseɛ so amukoraa manyamanya!’ ”

⁶ Yiti Aarɔn tengyɛle ye sa wɔ Misraim nzue mɔ so, na mborohyɛen mɔ wale bɛɛyɛle Misraim aseɛ so amukoraa manyamanya.

⁷ Nakoso Misraim ngonyaayelɛfoɛ koso yele ngonyaa yɔle sɔ ala, na bɛmane mborohyɛen wale Misraim aseɛ so.

⁸ Afei Faro frɛle Mose ne Aarɔn sele bɛ kyɛ, “Ɛ́mɔserɛ AWURADE bɛma ɔye mborohyɛen nemɔ ofi me ne me mmenia so, na ngɔma Yisraelfoɛ kɔhɔ ná baabɔ afɔleɛ bama AWURADE.”

⁹ Na Mose sele Faro kyɛ, “Wɔ adaworoma, maa nwu mmerɛ horɛ bɔ nzrɛ ma wɔ, ɛne wɔ mbanyi mɔ ne wɔ mmenia, kyɛbɔ ɔkɔyɛ ná mborohyɛen nemɔ awuwu afi wɔ ne w’awuro mɔ so ɔ; asue Naele nu deɛ angome yeɛ ɔkɔha ɔ.”

¹⁰ Na obuale kyɛ, “Ɛhema.” Na Mose koso hane kyɛ, “Ɔ́yɛ sɔ ala, kyɛbɔ aha ne, amaa ɔnate so anwu ye kyɛ ebiala nne berɛ bɔ ɔte kyɛ AWURADE yɛ Nyameɛ ne ɔ.

¹¹ Mborohyɛen nemɔ kofi wɔ ne w’awuro mɔ nu kɔhɔ, wɔ mbanyi ne wɔ mmenia so kɔhɔ, maa ɔkɔha bɛ bɔ bɛwɔ asue Naele nu angome.”

¹² Yiti Mose ne Aarɔn fili Faro nyunu berɛ bɛhɔle. Na Mose srɛle AWURADE fale mborohyɛen bɔ wafa wawa Faro so ne nwo dwirɛ tole ye nyunu.

¹³ AWURADE yɔle bɔ Mose srɛle ye ne; mborohyɛen nemɔ wuwuli wɔ awuro nemɔ anu, aluo ne fieso.

¹⁴ Bɛboaboale bɛ noa kure kure, na maen ne anu bone mvamvamvamva.

¹⁵ Faro nwuni kyɛ bɛ nwo atɔ bɛ kãa, yiti obubuli mmakaa tuale ye so, na wandɛ bɛ so, kyɛbɔ AWURADE hane ne ala.

Mvuture kakyi ngondia

¹⁶ Na AWURADE sele Mose kyɛ, “Ka kyire Aarɔn kyɛ, ‘Tengyɛ wɔ pɔmaa ne, ná fa fĩ aseɛnwo mvuture nu ma ɔkakyi ngondia wɔ Misraim aseɛ so amukoraa.’ ”

¹⁷ Bɛyɔle sɔ. Aarɔn tengyɛle ye sa nu fale pɔmaa ne fini aseɛnwo mvuture nu, na ngondia te guale mmenia ne ngaka so. Na aseɛnwo mvuture amukoraa bɔ ɔwɔ Misraim kakyili ngondia.

¹⁸ Ngonyaayelɛfoɛ nemɔ bɔle mmɔden kyɛ bɛkɔma ngondia kɔwa ɔ, nakoso bangora. Yiti ngondia kekale mmenia ne ngaka.

¹⁹ Na ngonyaayelɛfoɛ nemɔ sele Faro kyɛ, “Ɛhe de, Nyameɛ sa wɔ nu! Nakoso Faro bubuli mmakaa tuale ye so, na wandɛ bɛ so, kyɛbɔ AWURADE hane ne ala.

Nwɔsea pembepembe

²⁰ Na AWURADE sele Mose kyɛ, “Dwɔso ngyerɛmɔ tutuutu kɔ Faro berɛ, wɔ mmerɛ bɔ ófite kɔ nzue ne anu ɔ, ná ka kyire ye kyɛ, ‘AWURADE nwa nyoo: Ma me mmenia nemɔ ate ma bɛhɔ, ná bɛɛso me.

²¹ Na sɛ amma me mmenia nemɔ ate ma bangɔ a, ngɔsoma nwɔsea pembepembe paa maa bɛkɔwa wɔ ne wɔ mbanyi ne wɔ mmenia so, ɔne w’awuro mɔ nu. Nwɔsea koyi Misraimfoɛ awuro mɔ nu tɛkyɛ, ɔne aseɛ bɔ bɛ gya gyi so ne po.

²² Nakoso sɔ kyẽa ne, ngɔye Gosen aseɛ bɔ me mmenia te so ne ngosie ahameɛ; nwɔsea pembepembe paa ne ngɔhɔ berɛ bie, amaa ɔnate so anwu ye kyɛ me ole AWURADE wɔ aseɛ ye aso.

²³ Yiti ngɔfa elelɛ ɛwɛen ngɔto me mmenia ne wɔ mmenia afia; na sɔ nzɛngyerɛnneɛ ne kosi ɛhema.’ ”

²⁴ AWURADE yɔle sɔ koso amba. Nwɔsea pembepembe paa wale beeyili Faro awuro ne ye mbanyi mɔ awuro tɛkyɛ. Na nwɔsea lele Misraim aseɛ ne aso amukoraa fale.

²⁵ Afei Faro frɛle Mose ne Aarɔn, na osele bɛ kyɛ, “Ɛmɔhɔ bɛɛbɔ afɔleɛ bɛma ɛmɔ Nyameɛ ne wɔ maen he anu ala.”

²⁶ Na Mose buale kyɛ, “Ɔtte mayee kyɛ yɛkɔyɔ sɔ ɔ; ofikyɛ afɔleɛ bɔ yɛkɔbɔ kɔma AWURADE yɛ Nyameɛ nen, Misraimfoɛ bekyi. Na sɛ yɛfa nningyein bɔ Misraimfoɛ bekyi yɛbɔ afɔleɛ wɔ bɛ nyunu wa a, aso bɛngɔboro yɛ nyɔboɛ?

²⁷ Ɔsɛ kyɛ yɛpɛ atee bɔ bɛfa ɛlɛsa bɛpɛ ɔ wɔ ɛserɛ so yɛkɔbɔ afɔleɛ yɛma AWURADE yɛ Nyameɛ ne, kyɛbɔ wahyɛ yɛ ne ala.”

²⁸ Na Faro sele kyɛ, “Ngɔmaa ɛmɔkɔɔbɔ afɔleɛ bɛkɔma AWURADE ɛmɔ Nyameɛ ne wɔ ɛserɛ so, nakoso nnɛma ɛmɔkɔ dedeede. Ɛ́mɔli me ti dwirɛ bɛma me.”

²⁹ Na Mose buale kyɛ, “Mefi wɔ wa mekɔ ala a, ngɔsrɛ AWURADE. Na nwɔsea pembepembe paa ne kofi Faro ne ye mbanyi ne ye mmenia so kɔhɔ ɛhema. Nakoso nnɛma Faro yɛ nnakannaka ko kyɛ ɔngɔma mmenia ne ngɔɔbɔ afɔleɛ ngɔma AWURADE.”

³⁰ Yiti Mose fili Faro nwo berɛ hɔle ɔɔsrɛle AWURADE.

³¹ AWURADE yɔle bɔ Mose srɛle ye ne. Ɔmane nwɔsea pembepembe paa ne fili Faro ne ye mbanyi ne ye mmenia so hɔle, bɔ ko po anga berɛ ɔ.

³² Nakoso Faro sá bubuli mmakaa tuale ye so sɔ mmerɛ ne, na wamma mmenia ne ate ma bangɔ.