Ɛksadɔso 7 - AHYERƐLƐ KRONGRON

¹ Na AWURADE sele Mose kyɛ, “Tie, mayɛ wɔ kyɛ Nyameɛ wɔ Faro nye so, na eliɛma Aarɔn kɔyɛ wɔ ngɔmhyɛlɛniɛ.

² Ka bɔ mahyɛ wɔ kyɛ ɛha ne amukoraati; na eliɛma Aarɔn kɔha kohyire Faro kyɛ ɔyakyi Yisraelfoɛ ate ma befi ye aseɛ so bɛhɔ.

³ Nakoso ngɔma Faro kɔyɛ asobrakyeɛ. Ɔwɔ nu kyɛ ngɔma me nzɛngyerɛnneɛ ne anwanwadeɛ kɔsone pee wɔ Misraim aseɛ so de,

⁴ nakoso Faro ngɔtɛ ɛmɔ so. Ngɔfa me tumi ngɔhwe Misraim so, na ngɔfa asohwenɛ piri so ngɔye me lɔen, me mmenia Yisraelfoɛ, ngofi Misraim aseɛ so.

⁵ Na sɛ metengyɛ me sa wɔ Misraim so, ná meye Yisraelfoɛ mefi bɛ nu a, Misraimfoɛ konwu kyɛ me ole AWURADE.”

⁶ Na kyɛbɔ AWURADE hyɛle Mose ne Aarɔn kyɛ bɛyɔ ne, sɔ ala yeɛ bɛyɔle ɔ.

⁷ Mmerɛ bɔ bɛ ne Faro dwudwole nen, né Mose ali afoɛ aburawɔtwɛ, yeɛ Aarɔn koso afoɛ aburawɔtwɛ ne nza.

Aarɔn pɔmaa ne

⁸ Na AWURADE sele Mose ne Aarɔn kyɛ,

⁹ “Sɛ Faro ka kyire ɛmɔ kyɛ, ‘Ɛ́mɔyɔ sɛngyerɛnneɛ bie behyire a, ye de ka kyire Aarɔn kyɛ, ‘Gyi wɔ pɔmaa ne to Faro nyunu berɛ ma ɔkakyi ewoo.’ ”

¹⁰ Yiti Mose ne Aarɔn hɔle Faro berɛ bɛɛyɔle kyɛbɔ AWURADE hyɛle bɛ ne. Aarɔn gyili ye pɔmaa ne tole Faro ne ye mbanyi mɔ nyunu berɛ, na ɔkakyili ewoo.

¹¹ Faro koso frɛfrɛle mmenia bɔ bɛse ase, ɔne musueyelɛfoɛ maa bɛwale, na sɔ Misraim ngonyaayelɛfoɛ nemɔ koso yele ngonyaa yɔle sɔ ala.

¹² Bɛ mukoraa begyili bɛ mbɔmaa nemɔ beguale aseɛnwo berɛ, na bɛkakyilikakyili ewoo mɔ. Nakoso Aarɔn pɔmaa ne memene bɛ mbɔmaa nemɔ.

¹³ Bekye po yeɛ Faro bubuli mmakaa tuale ye so ɔ, na wandɛ bɛ so, kyɛbɔ AWURADE hane ne ala.

Nzue kakyi mogya

¹⁴ Afei AWURADE sele Mose kyɛ, “Faro abubu mmakaa watua ye so, na ɔngɔpene ma mmenia ne ngɔhɔ.

¹⁵ Kɔ Faro berɛ ngyerɛmɔ, mmerɛ bɔ ófite kɔ asue Naele noa ɔ. Kogyina asue ne noa berɛ nwondɛ ye, ná fa wɔ pɔmaa bɔ ɔkakyili ewoo ne tira.

¹⁶ Na ka kyire ye kyɛ, AWURADE, Hebrifoɛ Nyameɛ ne asoma me kyɛ mmanga ngyire wɔ kyɛ, ‘Ma me mmenia nemɔ bɛhɔ bɛɛsɔne me wɔ ɛserɛ so, nakoso abubu mmakaa atua wɔ so maa waadwu bekye.’

¹⁷ AWURADE nwa nyoo, ‘Bɔ ɔkɔmaa ekonwu ye kyɛ nde AWURADE ɛhe: Tie, ngɔfa pɔmaa bɔ otira me sa nu ne ngofĩ asue Naele nu, na nzue ne kɔkakyi mogya.

¹⁸ Naen bɔ bɛwɔ asue Naele nu kowuwu, nzue ne kɔbo mvamva, na Misraimfoɛ ngɔhora ngɔno Naele nzue.’ ”

¹⁹ Na AWURADE sele Mose kyɛ, “Ka kyire Aarɔn kyɛ, ‘Fa wɔ pɔmaa ne, ná tengyɛ wɔ sa wɔ Misraim nzue mɔ so: b’asue mbiri mɔ, Naele sa mɔ, b’abura mɔ ne b’ɛkwaa mukoraa so ma bɛkakyi mogya. Misraim aseɛ ne aso mukoraa kɔyɛ mogya, bua ne angora mɔ anu po.’ ”

²⁰ Mose ne Aarɔn yɔle kyɛbɔ AWURADE hyɛle bɛ ne ala. Aarɔn mane ye pɔmaa ne aso hɔle anwuro wɔ Faro ne ye mbanyi mɔ nyunu berɛ, ɔfa fini asue Naele nu, na Naele nzue amukoraa kakyili mogya.

²¹ Nzue ne anu naen wuwuli, na Naele nzue bone mvamvamvamva bɔ Misraimfoɛ angora bie no ɔ. Na Misraim aseɛ ne aso amukoraa yɛle mogya.

²² Nakoso Misraim ngonyaayelɛfoɛ koso yele ngonyaa yɔle sɔ ala. Yiti Faro bubuli mmakaa tuale ye so, na wandɛ bɛ so, kyɛbɔ AWURADE hane ne ala.

²³ Faro sá hɔle ye awuro, na wamva ɛhe po wanyɛ dwirɛ.

²⁴ Na Misraimfoɛ amukoraa tutuli abura wɔ asue Naele noa bɛpenane nzue bɔ bɛkɔno ɔ, ofikyɛ bangora Naele nzue no.

²⁵ AWURADE sɛkyele asue Naele nen, ngyẽa ɛlɛsoo pɛle nu.