Ɛksadɔso 6 - AHYERƐLƐ KRONGRON

¹ Na AWURADE buale Mose kyɛ, “Afei de, ɛbaanwu nikyee bɔ ngɔfa ngɔyɔ Faro ɔ. Ofikyɛ, tumi piri kɔha ye kɔme asi maa ɔkɔyakyi bɛ maa bɛkɔhɔ; tumi piri kɔha ye kɔme asi maa ɔkɔfoa bɛ kofi ye aseɛ so.”

Mose frɛlɛ nwo dwirɛ bieku

² Nyameɛ sele Mose kyɛ, “Me ole AWURADE.

³ Nyele me nwo ali ngyirele Abraham, Yisake ne Yakob kyɛ nde Tuminiɛ Nyameɛ. Nakoso me dumaa YAHWE (AWURADE) ne de, mamma bangyina so bannwu me.

⁴ Mene bɛ koso yɛyɛle m’apam, kyɛ ngɔfa Kanaan aseɛ bɔ bɛɛtenane so bɛyɛle ɛwɔfoɛ ne ngɔma bɛ.

⁵ Asa koso, Yisraelfoɛ bɔ Misraimfoɛ afa bɛ ayɛ nganga ne, mate awuye bɔ bɛbɔ ne, na makaye m’apam ne.

⁶ Yiti ka kyire Yisraelfoɛ kyɛ, “Me ole AWURADE, na ngɔye ɛmɔ ngofi Misraim amaneɛnwunɛ nu, ná male ɛmɔ mafi bɛ ngoaasolɛ nu. Na ɔnate tumi asaa ne asohwenɛ mbiri mbiri so yeɛ ngɔfa ngole ɛmɔ ɔ.

⁷ Ngɔfa ɛmɔ ngɔyɛ me mmenia, ná me wora ngɔyɛ ɛmɔ Nyameɛ. Na ɛmɔkonwu ye kyɛ me ole AWURADE ɛmɔ Nyameɛ bɔ olele ɛmɔ fili Misraim amaneɛnwunɛ nu ne.

⁸ Aseɛ bɔ mata ndaen kyɛ ngɔfa ngɔma Abraham, Yisake ne Yakob nen, ngɔfa ɛmɔ ngɔhɔ so. Ngɔfa ngɔma ɛmɔ maa ɔkɔyɛ ɛmɔ deɛ. Me ole AWURADE.’ ”

⁹ Mose hane sɔ dwirɛ ne hyirele Yisraelfoɛ nemɔ, nakoso ɔnate b’aba nu bɔ né wabu, ɔne ngoaasolɛ serɛserɛ bɔ né bɛwɔ nu ne ati, bandɛ ye so.

¹⁰ Na AWURADE sele Mose kyɛ,

¹¹ “Kɔ, kɔha kyire Misraim hene Faro kyɛ ɔyakyi Yisraelfoɛ mɔ ma befi ye aseɛ so bɛhɔ.”

¹² Nakoso Mose buale AWURADE kyɛ, “Yisraelfoɛ po bandie me, ɔkɔyɛ sɛɛ né Faro atie me, me bɔ me noa ɔttele ɔ?”

¹³ AWURADE ne Mose ne Aarɔn dwudwole, na ɔhyɛle bɛ kyɛ bɛɛhã sɔ dwirɛ ne behyire Yisraelfoɛ, ɔne Misraim hene Faro, ná bɛ́ye Yisraelfoɛ béfi Misraim aseɛ so.

¹⁴ Mbanyi bɔ né bɛlela b’abusua nemɔ noa ɛhe: Yisrael bamuɛbaa Ruben ye mma mɔ: Hanoke, Palu, Hesron ne Karemi. Ruben abusua mɔ ɛne.

¹⁵ Simeon mma mɔ: Yemuel, Yamin, Ohade, Yakin, Soha, yeɛ Sɔɔlo bɔ oni te Kanaanniɛ ne. Simeon abusua mɔ ɛne.

¹⁶ Lewi mma mɔ dumaa, kyɛbɔ b’aworɛ ndoatoasoɛ si te hɔ ɛhe: Gɛsɔn, Kohate ne Merari. Lewi afoɛ bɔ olili te ɛyaa ko aburasa ne nzoo.

¹⁷ Gɛsɔn mma mɔ ɛhe: Libini ne Simei, bɛ ne b’abusua mɔ.

¹⁸ Kohate mma mɔ ɛhe: Amram, Yisare, Hebron ne Yusiɛl. Kohate afoɛ bɔ olili te ɛyaa ko ne aburasa ne nza.

¹⁹ Merari mma mɔ ɛhe: Maheli ne Musi. Lewi abusua nemɔ, kyɛbɔ b’aworɛ ndoatoasoɛ te ɛne.

²⁰ Amram gyale ye baba aliɛma brasua Yokebɛde, na ɔne ye bɛwole Aarɔn ne Mose. Amram afoɛ bɔ olili te ɛyaa ko ne aburasa ne nzoo.

²¹ Yisare mma mɔ ɛhe: Kora, Nefege ne Sikri.

²² Yusiɛl mma mɔ ɛhe: Misael, Elsafan ne Sitri.

²³ Aarɔn gyale Aminadabo awa brasua Elihyeba bɔ oliɛma ole Nason ne. Na ɔne ye bɛwole Nadabo, Abihu, Eleasa ne Yitama.

²⁴ Kora mma mɔ ɛhe: Asire, Ɛlkana ne Abiasafe. Kora abusua mɔ ɛne.

²⁵ Aarɔn awa Eleasa gyale Putiel mma mmrasua nemɔ ko, na ɔne ye bɛwole Finehase. Lewi abusua kure ne, nu abusua mbanyi bɔ bɛlela ye noa ɛne.

²⁶ Aarɔn ne Mose ole mmenia bɔ AWURADE ha hyirele bɛ kyɛ, “Ɛ́mɔye Yisraelfoɛ béfi Misraim aseɛ so, kyɛbɔ bɛ kure kure si te ɔ.”

²⁷ Mose ne Aarɔn komapɛ ne ala yeɛ bɛfa bɛtole Misraim hene Faro nyunu kyɛ ɔ́ma Yisraelfoɛ bétu béfi Misraim ɔ.

Nyameɛ sá hyɛ Mose bɔ

²⁸ Kyẽa bɔ AWURADE ne Mose dwudwole wɔ Misraim aseɛ so ne,

²⁹ AWURADE sele Mose kyɛ, “Me ole AWURADE. Kã edwirɛ bɔ mekã mekyire wɔ ne amukoraa kyire Misraim hene Faro.”

³⁰ Nakoso Mose buale AWURADE wɔ ye nyunu berɛ kyɛ, “Yieee! Me noa ɔttele, ɔkɔyɛ sɛɛ né Faro atie me dwirɛ?”