Ɛksadɔso 40 - AHYERƐLƐ KRONGRON

Nyianu sua ne silɛ ne ye bukyelɛ

¹ Afei AWURADE sele Mose kyɛ,

² “Kyẽa bɔ oli moa wɔ bosome bɔ oli moa ne anu ne, si nyianu ɛtena sua ne.

³ Fa Adanzeɛ alaka ne sie nu, ná fa mbɛmuɛ tena ne nwi alaka ne nyunu.

⁴ Fa ɛpoen ne sie nu, ná siesie so nningyein bɔ bɛfa besiesie so ne. Fa kanea bakaa ne sie nu, ná fa ye nganea nemɔ siesie so.

⁵ Sikaa kɔkorɛ afɔleɛ bokyea bɔ bɛyera ɛyɛɛ so ne, fa sie Adanzeɛ alaka ne nyunu, ná fa nyianu sua anoa nu berɛ tena ne nwi berɛ.

⁶ Naen yeralɛ afɔleɛ bokyea ne, fa sie nyianu ɛtena sua anoa nu berɛ;

⁷ fa ayaa ne sie ɛtena sua atenaleɛ nu berɛ ɔne afɔleɛ bokyea ne b’afia, ná fa nzue gua nu.

⁸ Dé aluo berɛ amukoraati nwo yia, ná fa ɛtena ne nwi aluo berɛ pambim ne anoa nu berɛ.

⁹ “Afei fa ɛpopalɛ ngoo ne, ná popa nyianu sua ne ɔne nu nningyein amukoraati, ná te ye ne ye nu nningyein amukoraati nwo maa ɔyɛ krongron.

¹⁰ Asa koso, fa ɛpopalɛ ngoo ne popa afɔleɛ bokyea bɔ bɛyera afɔleɛ so ne, ɔne ye nwo nningyein amukoraa, ná te afɔleɛ bokyea ne nwo maa ɔyɛ nikyee krongron paa.

¹¹ Fa ɛpopalɛ ngoo popa ayaa ne ne ye nyinasoɛ ne, ná te ye nwo.

¹² “Fa Aarɔn ne ye mma mmienzua nemɔ bra ɛtena sua atenaleɛ anoa nu berɛ, ná fa nzue nwunzinwunzi bɛ nwo.

¹³ Afei fa ndaadeɛ krongron nemɔ wura Aarɔn, ná fa ɛpopalɛ ngoo ne gua ye ti so, ná te ye nwo ma oli sɔfo so me.

¹⁴ Fa ye mma mmienzua nemɔ koso bra, ná fa ataadeɛ aguasoɛ wurawura bɛ,

¹⁵ ná fa ɛpopalɛ ngoo gua bɛ ti so, kyɛbɔ ɛfale ɛpopalɛ ngoo guale bɛ baba ti so ne ala, ná beli sɔfo bɛso me. Na ɛpopalɛ ngoo bɔ ɛkɔfa kogua bɛ ti so ne, ɔkɔma bɛ ne b’aworɛ ndoatoasoɛ mukoraa bekoli sɔfo afebɔɔ.”

¹⁶ Mose yɔle nikyee biala pɛpɛɛpɛ, kyɛbɔ AWURADE hyɛle ye ne ala.

¹⁷ Ye afoɛ nyɔ ne anu, kyẽa bɔ oli moa wɔ bosome bɔ oli moa ne anu, yeɛ besili nyianu sua ne ɔ.

¹⁸ Mose sili nyianu sua ne, ɔhyehyɛle ye nyinasoɛ nemɔ, ogyinagyinane ye ndaboa nemɔ, ɔfale ye kwatena nemɔ beabeale nu, na ogyinagyinane ye bonima nemɔ.

¹⁹ Afei ɔfale nwomaa ne kuruli nyianu sua ne aso, na ɔfale ɛtena sua ngatasoɛ ne katale so, kyɛbɔ AWURADE hyɛle Mose nen.

²⁰ Ɔfale Adanzeɛ ne tole apam alaka ne anu, ɔfale mbuna nemɔ wurawurale apam alaka ne anwo, na ɔfale mbata bia ne siele alaka ne aso.

²¹ Ɔfale apam alaka ne wale nyianu sua ne anu, ɔfale mbɛmuɛ tena ne nwini berɛ, na ɔmaa osini Adanzeɛ alaka ne nye, kyɛbɔ AWURADE hyɛle ye (Mose) nen.

²² Ɔfale ɛpoen ne siele ɛtena sua atenaleɛ nu berɛ, wɔ nyianu sua ne sorɔ dɔ, wɔ mbɛmuɛ tena ne si dɔ.

²³ Ɔfale paanoo ne totole so wɔ AWURADE nyunu, kyɛbɔ AWURADE hyɛle ye (Mose) nen.

²⁴ Ɔfale kanea bakaa ne siele ɛtena sua atenaleɛ nu berɛ, wɔ ɛpoen ne ndendeneɛ so, wɔ nyianu sua ne ngwaen dɔ,

²⁵ na ɔfale kanea nemɔ siesiele so wɔ AWURADE nyunu, kyɛbɔ AWURADE hyɛle ye (Mose) nen.

²⁶ Ɔfale sikaa kɔkorɛ afɔleɛ bokyea ne siele ɛtena sua atenaleɛ nu berɛ, wɔ mbɛmuɛ tena ne nyunu,

²⁷ na ɔyerale ayirefona wɔ so, kyɛbɔ AWURADE hyɛle ye (Mose) nen.

²⁸ Asa koso, ɔfale nyianu sua anoa nu berɛ tena ne nwini berɛ.

²⁹ Naen yeralɛ afɔleɛ bokyea ne, ɔfa siele nyianu ɛtena sua anoa nu berɛ, na ɔbɔle naen yeralɛ afɔleɛ ne aleɛ afɔleɛ wɔ so, kyɛbɔ AWURADE hyɛle ye (Mose) nen.

³⁰ Ɔfale ayaa ne siele ɛtena sua atenaleɛ nu berɛ ɔne afɔleɛ bokyea ne b’afia, na ɔfale nzue bɔ bɛkɔfa bekonwunzi bɛ nwo ɔ guale nu.

³¹ Na sɔ nzue ne yeɛ Mose ne Aarɔn ne ye mma mmienzua ne bɛfa benwunzi bɛ sa ne bɛ gya nwo ɔ.

³² Na mmerɛ biala sɛ né bɛ́kɔ ɛtena sua atenaleɛ nu berɛ, anaakyɛ bépingye afɔleɛ bokyea ne a, benwunzi bɛ nwo, kyɛbɔ AWURADE hyɛle Mose nen.

³³ Mose lele aluo berɛ anwo ɔfa pɛle nyianu sua ne ɔne afɔleɛ bokyea ne anwo bra yiale, na ɔfale ɛtena ne nwini aluo berɛ pambim ne noa. Yiti Mose yiele adwuma ne.

Munungum kata ɛtena sua ne aso

³⁴ Afei munungum ne ɔɔkatale ɛtena sua atenaleɛ ne aso, na AWURADE animnyam yili nyianu sua ne tɛkyɛ.

³⁵ Na Mose angora anwura ɛtena sua atenaleɛ ne anu, ofikyɛ né munungum ne akata ɛtena sua ne aso, na AWURADE animnyam yili nyianu sua ne tɛkyɛ.

³⁶ Na Yisraelfoɛ ateetulɛ ne anu amukoraa, sɛ munungum ne fi nyianu sua ne aso ɔkɔ anwuro a, né bɛ koso batu bɛ bo bahɔ moa;

³⁷ nakoso sɛ munungum ne amvi so wangɔ anwuro de a, ye de bendu bɛ bo kɔpem kyẽa bɔ ɔkɔhɔ anwuro ɔ.

³⁸ Ofikyɛ b’ateetulɛ ne anu amukoraa, AWURADE munungum ne munduni nyianu sua ne aso alehyeleɛ nu, yeɛ alesaleɛ nu koso, né see ogye wɔ munungum ne anu bɔ Yisrael awuro ama mukoraa bɛ nye tua ɔ.