Ɛksadɔso 37 - AHYERƐLƐ KRONGRON

Bɛbobɔ apam alaka ne

¹ Besalel fale bɔsema bobɔle apam alaka ne. Ye tendenn nu te agyirɛ nyɔ ne bue, ye tɛtrɛtɛɛ nu te agyirɛ ko ne bue, yeɛ ye so anwuro ne te agyirɛ ko ne bue.

² Ɔfale sikaa kɔkorɛ paa borole ye kunu ne ye si, na ɔfale sikaa kɔkorɛ pɛle ye nwo bra yiale.

³ Ɔfale sikaa kɔkorɛ bɔle kɔtɔkaa nna purole ye, na ɔfa sosɔle ye gya nna nemɔ anu: kɔtɔkaa nyɔ wɔ ye bue ko, yeɛ kɔtɔkaa nyɔ wora wɔ ye bue ko.

⁴ Ɔfale bɔsema sele mbuna mɔ, na ɔfale sikaa kɔkorɛ borole bɛ nwo.

⁵ Na mbuna bɔ bɛkɔfa kɔsoa alaka nen, ɔfa wurawurale kɔtɔkaa nemɔ anu wɔ alaka ne ngyɛnu ne ye ngyɛnu.

⁶ Ɔfale sikaa kɔkorɛ paa yɔle mbata bia. Ye tendenn nu te agyirɛ nyɔ ne bue, yeɛ ye tɛtrɛtɛɛ nu te agyirɛ ko ne bue.

⁷ Ɔfale buralɛ borole sikaa kɔkorɛ yɛle kɛrubim nyɔ, na ɔfa siesiele mbata bia ne ye ti ne ye ti.

⁸ Yiti ɔfale kɛrubo ngoko siesiele ye ti ne ye ti. Ɔyɔle kɛrubim nemɔ ne mbata bia ne bɔle nu, na né kɛrubim nemɔ wɔ ye ti ne ye ti.

⁹ Né kɛrubim nemɔ atrɛtrɛ bɛ ndaa nu bahɔ anwuro, na né bafa bɛ ndaa ne babutubutu mbata bia ne aso. Né kɛrubim nemɔ bɛ nyunu neanea bɛ nyunu, na né bɛ nyunu nea mbata bia ne.

Paanoo krongron poen ne

¹⁰ Osa fale bɔsema bobɔle ɛpoen: ye tendenn nu te agyirɛ nyɔ, ye tɛtrɛtɛɛ nu te agyirɛ ko, yeɛ ye so anwuro ne te agyirɛ ko ne bue

¹¹ Ɔfale sikaa kɔkorɛ paa borole ye nwo, na ɔfale sikaa kɔkorɛ pɛle ye nwo hangra bra yiale.

¹² Ɔfale kaa bɔ ye piri te kyɛ bɛ sa mmɛseka pɛle ye nwo bra yiale, na ɔfale sikaa kɔkorɛ pɛle ye nwo hangra bra yiale.

¹³ Ɛpoen ne, ɔfale sikaa kɔkorɛ yɔle ye kaa nna, na ɔfale kaa nemɔ sosɔle ndweaso nna ne, nekaa bɔ ye gya nna nemɔ wɔ ne.

¹⁴ Kɔtɔkaa mɔ bɔ bɛsosɔ mbuna bɔ bɛfa bɛsoa ɛpoen ne anu nen, né bepingye nikyee bɔ wafa wapɛ ye nwo wabra wayia ne.

¹⁵ Ɔfale bɔsema sele mbuna mɔ bɔ bɛkɔfa bɛkɔsoa ɛpoen ne, na ɔfale sikaa kɔkorɛ borole bɛ nwo.

¹⁶ Ɔfale sikaa kɔkorɛ paa yɔle ɛpoen ne aso nningyein: ye ndalie ne ɛyɛɛ kulie mɔ, turonzemaa ɔne bua mɔ bɔ bɛkɔfa bekohwie afɔleɛ nzaa ɔ.

Bɛyɔ kanea bakaa ne

¹⁷ Osa fale sikaa kɔkorɛ paa yɔle kanea bakaa ne. Sikaa kɔkorɛ paa bɔ bafa buralɛ baboro ɔ yeɛ ɔfa yɔle ye nyinasoɛ ne ye bakaa mumua ne ɔ. Ye kulie mɔ, ye mmaen mɔ, ye sa mɔ, yeɛ ye nyerɛen nemɔ, ɔfale sɔ sikaa kɔkorɛ kundunzii komapɛ ne ala yeɛ ɔyɔle ɔ.

¹⁸ Né mmaen nzia tuatua kanea bakaa ne ngyɛnu; ye bue ko mmaen nza, yeɛ ye bue ko wora mmaen nza.

¹⁹ Né kulie nza bɔ besoma atonwaa, bɔ wafefɛ, ná wabɔ nyerɛen ɔ wɔ mmaen ko aso; yeɛ né kulie nza bɔ besoma atonwaa, bɔ wafefɛ, ná wabɔ nyerɛen ɔ wɔ mmaen foforɛ so. Yiti né mmaen nzia yeɛ betuatua kanea bakaa ne anwo ɔ.

²⁰ Né kulie nna bɔ besoma atonwaa, bɔ wafefɛ, ná wabɔ nyerɛen ɔ tuatua kanea bakaa mumua ne anwo.

²¹ Né nyerɛen ko tua mmaen nyɔ bɔ beli moa ne abo, nyerɛen ko koso tua mmaen nyɔ bɔ bɛtɔ so nyɔ ne abo, yeɛ né nyerɛen ko wora tua mmaen nyɔ bɔ waha ne abo.

²² Bɛ nyerɛen nemɔ, bɛ mmaen nemɔ, ɔne kanea bakaa ne, ɔfale sɔ sikaa kɔkorɛ kundunzii komapɛ bɔ bafa buralɛ baboro ne ala yeɛ ɔyɔle ɔ.

²³ Ɔfale sikaa kɔkorɛ paa yɔle ye kanea nzoo ne, ye akapɛ bɔ bɛfa bɛtengyɛtengyɛ kanea nyamaa noa ne, ɔne kanea nyamaa nzoen talie nemɔ.

²⁴ Kanea bakaa ne ne ye nwo nningyein amukoraa, ɔfale sikaa kɔkorɛ paa kilo aburasa ne nna yeɛ ɔyɔle ɔ.

Ɛyɛɛ afɔleɛ bokyea ne

²⁵ Ɔfale bɔsema sili afɔleɛ bokyea bɔ bɛyera ɛyɛɛ so ne. Ye tendenn nu te agyirɛ ko, yeɛ ye tɛtrɛtɛɛ nu te agyirɛ ko. Né ɔte ahinanan, na ye aseɛnwo bɔ ɔkwaadwu ye anwuro ne te agyirɛ nyɔ. Ye mmɛen nemɔ, sɔ bakaa kundunzii komapɛ ne ala yeɛ ɔfa yɔle ɔ.

²⁶ Ɔfale sikaa kɔkorɛ paa borole ye nwo, ye ti afia ne ye ngyɛnu amukoraati, ɔne ye mmɛen nemɔ anwo, na ɔfale sikaa kɔkorɛ pɛle ye nwo hangra bra yiale.

²⁷ Ɔfale sikaa kɔkorɛ bɔle kɔtɔkaa nyɔ wɔ ye hangra ne abo, wɔ ye ngyɛnu ne ye ngyɛnu, kyɛ bɛ́sosɔ mbuna bɔ bɛfa bɛsoa afɔleɛ bokyea ne anu.

²⁸ Ɔfale bɔsema sele mbuna mɔ, na ɔfale sikaa kɔkorɛ borole bɛ nwo.

Bɛyɔ ɛpopalɛ ngoo ne ɛyɛɛ ne

²⁹ Osa yɔle ɛpopalɛ ngoo krongron ne, ɔne ɛyɛɛ paa paa fonafona ne, kyɛbɔ sona bɔ ole ye nwo nimdeɛ afrafra nningyein ayɔ ɔ.