Ɛksadɔso 36 - AHYERƐLƐ KRONGRON

¹ “Na Besalel, Oholiabo ne dwumvoɛ amukoraa bɔ AWURADE ama bɛ adwiililɛ nwo nimdeɛ ne ndeaseɛ kyɛ bɛ́fa bési nekaa krongron nen, ɔsɛ kyɛ bɛyɔ adwuma ne pɛpɛɛpɛ kyɛbɔ AWURADE ahyɛ bɛ ne.”

² Afei Mose frɛle Besalel ne Oholiabo ne dwumvoɛ amukoraa bɔ AWURADE ama bɛ adwiililɛ nwo nimdeɛ, ɔne ebiala bɔ edwirɛ ne kanyane ye kyɛ ɔɔyɔ adwuma ne.

³ Na akyɛdeɛ afɔleɛ nningyein amukoraa bɔ Yisraelfoɛ fa wale kyɛ bɛfa bɛyɔ nekaa krongron ne nwo adwuma ne, Mose fa mane bɛ. Na Yisraelfoɛ hɔle so fale akyɛdeɛ afɔleɛ nningyein bɛwale ngyerɛmɔ biala.

⁴ Ye sɔ ne ati, adwiililɛfoɛ amukoraa bɔ né bɛ́yɔ nekaa krongron ne anwo adwuma ne, ebiala yakyili ye adwuma tole berɛ,

⁵ na beesele Mose kyɛ, “Nningyein bɔ mmenia nemɔ bɛfa bɛba ne, ɔbo adwuma bɔ AWURADE ahyɛ yɛ kyɛ yɛyɔ ne aso.”

⁶ Yiti Mose hyɛle maa bɛbɔle dawure wɔ asikyeleɛ ne anu kyɛ, “Bienzua oo, brasua oo, nnɛma ebiala fa nekaa krongron ne nwo ayɛyelɛ afɔleɛ nikyee biala ba ko.” Yiti bamma mmenia ne amva nningyein bamma ko;

⁷ ofikyɛ, né nningyein bɔ banya ye ne kɔhora kɔyɔ adwuma ne amukoraa maa ebie kɔha.

Besi AWURADE nyianu sua ne

⁸ Na adwiililɛfoɛ amukoraa bɔ bɛwɔ adwumayɔlɛfoɛ nemɔ anu ne, bɛfale mbɛmuɛ tena buru bɛyɔle nyianu sua ne. Gyese, bibire, koogyan ne adaabene bɔ bali adwii banwo kɛrubim ndiamuɛ bagua nu yeɛ bɛfa bɛyɔle ɔ.

⁹ Mbɛmuɛ tena nemɔ nu biala tendenn te agyirɛ aburanyɔ ne mmɔtwɛ, yeɛ ko biala tɛtrɛtɛɛ nu te agyirɛ nna. Besusuli mbɛmuɛ tena nemɔ amukoraati pɛpɛɛpɛ.

¹⁰ Ɔpombale mbɛmuɛ tena nnu sosɔle so, yeɛ mbɛmuɛ tena nnu bɔ waha ne wora ɔpombale sosɔle so ɔ.

¹¹ Mbɛmuɛ tena ndoasoɛ bɔ oli moa ne, ɔbɔle ko bɔ oli moa ne noa kɔtɔkaa bibire. Sɔ ala yeɛ mbɛmuɛ tena ndoasoɛ bɔ ɔtɔ so nyɔ ne wora, ɔbɔle ko bɔ oli moa ne noa kɔtɔkaa bibire ɔ.

¹² Ɔbobɔle kɔtɔkaa aburannu wɔ mbɛmuɛ tena ndoasoɛ bɔ oli moa ne noa, yeɛ mbɛmuɛ tena ndoasoɛ bɔ ɔtɔ so nyɔ ne wora, ɔbobɔle kɔtɔkaa aburannu wɔ ye noa. Né kɔtɔkaa nemɔ bɛ nye neanea bɛ biɛngo nyunu.

¹³ Ɔyɔle sikaa kɔkorɛ tɔkorɔ aburannu, na ɔfa sosɔle mbɛmuɛ tena ndoasoɛ nemɔ anu, yiti nyianu sua ne yiale yɛle mumua.

¹⁴ Osa fale abɔngye nwiaa nwone ɛtena, na ɔfa yɛle kuku kuruli nyianu sua ne aso. Ɔnwone ndena buru ne ko.

¹⁵ Ɛtena ko biala tendenn nu te agyirɛ aburasa, ko biala tɛtrɛtɛɛ nu te agyirɛ nna; na ɛtena buru ne ko ne amukoraati yɛle pɛpɛɛpɛ.

¹⁶ Ɔfale ɛtena nnu toatoale so maa ɔyɛle ko, yeɛ ɔfale nzia koso toatoale so maa ɔyɛle ko.

¹⁷ Ɛtena ndoasoɛ bɔ oli moa ne, ɔbɔle ko bɔ oli nziɛ ne noa kɔtɔkaa aburannu; yeɛ ɛtena ndoasoɛ bɔ ɔtɔ so nyɔ ne koso, ɔbɔle ko bɔ oli nziɛ ne noa kɔtɔkaa aburannu.

¹⁸ Ɔyɔle kɔɔbere tɔkorɔ aburannu fa sosɔle ɛtena sua ne anu maa oyiale, na ɔyɛle mumua.

¹⁹ Ɔfale boaen nwomaa bɔ bawura ye ayire kuruli ɛtena sua ne anwo, na ɔfale abɔngye nwomaa koso katale boaen nwomaa ne aso.

²⁰ Afei ɔfale bɔsema yɛle nyianu sua ndaboa nemɔ maa begyinagyinane berɛ.

²¹ Taboa ko biala tendenn te agyirɛ buru, yeɛ ye tɛtrɛtɛɛ nu koso te agyirɛ ko ne bue.

²² Né taboa ko biala le pɛmbɛen nyɔ bɔ bɛsosɔ ndaboa nemɔ nu bɛbɔ nu ɔ; na sɔ ala yeɛ ɔyɔle nyianu sua ndaboa ne amukoraati ɔ.

²³ Nyianu sua ne, sɔaa yeɛ ɔyɔle ye ndaboa nemɔ ɔ: ɔmane ndaboa aburanyɔ beelili ye ngwaen dɔ wɔ famaa so.

²⁴ Ɔyɔle ɛdwetɛ nyinasoɛ aburanna mane ndaboa aburanyɔ nemɔ gyinagyinane so. Ɔmane taboa ko biala ye pɛmbɛen nyɔ ne gyinane nyinasoɛ nyɔ so, na sɔ ala yeɛ ɔyɔle ye ngaa nemɔ ɔ.

²⁵ Na nyianu sua ne ngyɛnu bɔ ɔwɔ ye sorɔ dɔ ne, ɔfale ndaboa aburanyɔ siesiele berɛ.

²⁶ Ɔyɔle b’ɛdwetɛ nyinasoɛ aburanna ne. Ɔmane taboa bɔ oli moa ne nyane nyinasoɛ nyɔ, yeɛ taboa bɔ ɔtoa berɛ ne koso nyane nyinasoɛ nyɔ.

²⁷ Ɔfale ndaboa nzia siesiele nyianu sua ne si dɔ, wɔ eyia atɔleɛ bue nu dɔ.

²⁸ Ɔfale ndaboa nyɔ siesiele nyianu sua ne ndweaso nemɔ aso, wɔ ye si dɔ.

²⁹ Mbuna nemɔ, né bɛ nu atete fite aseɛnwo. Nakoso ye anwuro dɔ de, bɛha bɛbɔle ye nwo bewurale kɔtɔkaa bɔ oli moa ne anu. Sɔ yeɛ ɔyɔle mbuna nyɔ bɔ bɛwɔ ye ndweaso nyɔ ne aso ɔ.

³⁰ Né ndaboa nemɔ te mmɔtwɛ, ɔne b’ɛdwetɛ nyinasoɛ buru ne nzia. Taboa ko biala gyi nyinasoɛ nyɔ so.

³¹ Ɔfale bɔsema yɛle kwatena mɔ. Na ɔfale nnu guale ndaboa bɔ bɛwɔ nyianu sua ne bue ko aso.

³² Ndaboa bɔ bɛwɔ nyianu sua ne ye bue ko bɔ waha ne, ɔfale kwatena nnu guale so. Na eyia atɔleɛ bue nu dɔ wora, ɔfale kwatena nnu guale nyianu sua ndaboa nemɔ aso.

³³ Ɔfale kwatena bɔ ɔla afia ne tole ndaboa nemɔ afia, fite ye ti ɔɔhane ye ti.

³⁴ Ɔfale sikaa kɔkorɛ borole ndaboa nemɔ anwo, na ɔfale sikaa kɔkorɛ bɔle kɔtɔkaa bɔ ɔkɔsosɔ kwatena nemɔ anu ɔ. Na ɔfale sikaa kɔkorɛ borole kwatena nemɔ anwo.

³⁵ Ɔfale bibire, koogyan, adaabene ne gyese nwone mbɛmuɛ tena. Na ɔmaa belili adwii bɛnwone kɛrubim ndiamuɛ beguale nu.

³⁶ Mbɛmuɛ tena ne, ɔfale bɔsema yɔle bonima nna sosɔle ye, na ɔfale sikaa kɔkorɛ borole bɛ nwo. Ɔfale sikaa kɔkorɛ yɔle bɛ tɔkorɔ nemɔ, na ɔmaa begyinagyinane ɛdwetɛ nyinasoɛ nna so.

³⁷ Osa fale bibire, koogyan, adaabene ne gyese nwone ɛtena bɔ bɛkɔfa konwi ɛtena sua ne anoa nu berɛ ɔ: bɛen bɔ bali adwii bagua nu ɔ,

³⁸ ɔne ye bonima nnu bɔ ndɔkorɔ sosɔ nu ɔ. Ɔfale sikaa kɔkorɛ borole bɛ ti afia, ɔne bɔ ɔbeabea nu nemɔ anwo, nakoso né bɛ nyinasoɛ nnu ne de, bɛte kɔɔbere.