Ɛksadɔso 34 - AHYERƐLƐ KRONGRON

Mose sá kode Mmeraa Buru ne

¹ AWURADE sele Mose kyɛ, “Se nyɔboɛ taataa nyɔ bɔ ɔte kyɛ daa deɛ ne ala, na edwirɛ bɔ ɔwɔ daa deɛ bɔ ebubuli ye ne aso ne, ngɔhyerɛ ngogua so.

² Boaboa wɔ nwo ngyerɛmɔ, ná fo bra Sinai bokaa ne aso ngyerɛmɔ, ná nwondɛ me berɛ wɔ bokaa ne ti afia.

³ Nnɛfa sona biala boka wɔ nwo so ɛne ye bɛfo bɛba; ɔnzɛ kyɛ benwu sona biala wɔ bokaa ne anwo nekaa biala; yeɛ nnɛma mmoaen anaa nandwie biala kɔ adidie wɔ bokaa ne nyunu.”

⁴ Yiti Mose sele nyɔboɛ taataa nyɔ bɔ ɔte kyɛ daa deɛ ne ala ɔ; na ɔpɛle aleɛ dwɔsole fo hɔle Sinai bokaa ne aso, kyɛbɔ AWURADE hyɛle ye ne, na ɔfale nyɔboɛ taataa nyɔ ne tirale.

⁵ Na AWURADE dwu wale ase wɔ munungum nu oogyinane ye nwo berɛ, na ɔbɔle ye bɔbɔ ye dumaa YAHWE (AWURADE) ne.

⁶ AWURADE pɛle nu wɔ Mose nyunu, na AWURADE teane nu hane kyɛ, “AWURADE, AWURADE, Nyameɛ bɔ ɔse anwumvoin ná ɔdo mmenia ɔ, bɔ ye ahone nhu ndɛ, bɔ ye ɔdɔ bɔ onni ngasi ne nahorɛlilɛ sone ɔ,

⁷ bɔ ye dɔ bɔ onni ngasi wɔ berɛ ma mmenia apee apee, bɔ ɔfa amumuyɛɛ ne mmeraatolɛ ne bɔne kyɛ ɔ. Nakoso ɔmma sona bɔ odi fɔ ne ɔmva ye nwo tɔtorɔtɔɔ, na ɔprapra seɛ mɔ bɔne nwo asohwenɛ gua bɛ mma mɔ ne bɛ nnomaa mɔ so, maa okodwu aworɛ ndoatoasoɛ nza ne nna so.”

⁸ Na Mose yɛle ndɛndɛ bɔle ye ti ase sɔnene AWURADE.

⁹ Na ɔhane kyɛ, “O AWURADE, sɛ alo me a, nzaade AWURADE, mesrɛ wɔ, boka yɛ so ɛne yɛ hɔ. Ɔwɔ nu kyɛ mmenia hemɔ bɛ so yɛ se de, nakoso fa yɛ amumuyɛɛ ne yɛ bɔne kyɛ yɛ, ná fa yɛ wura wɔ kunu.”

Bɛyɛ apam ne bieku

¹⁰ Na AWURADE hane kyɛ, “Tie, méyɛ apam. Na anwanwadeɛ bɔ mebaayɔ ye wɔ mmenia ne amukoraati nyunu ne, ebie ossili le wɔ aseɛ so nekaa biala, anaa maen biala so. Na mmenia bɔ ɛmɔtete bɛ nu ne konwu AWURADE nnwumaa, ofikyɛ nikyee bɔ ɔyɛ suro yeɛ ngɔfa wɔ so ngɔyɔ ɔ.

¹¹ Di bɔ ɛnɛ méhyɛ wɔ ne aso. Tie, ngɔfoa Amorifoɛ, Kanaanfoɛ, Hitifoɛ, Perisifoɛ, Hiwifoɛ ne Yebusifoɛ ngofi wɔ nyunu.

¹² Aseɛ bɔ ɛ́kɔ so ne, nea yé ná ɛne so ama anyɛ apam, ná wanyɛ wɔ so ngaen.

¹³ Ɛ́mɔbubu b’afɔleɛ bokyea nemɔ bégua, ɛ́mɔbubu bɛ bonima nemɔ, ná ɛ́mɔpepɛ bɛ bosoen Asera dosii nemɔ begua.

¹⁴ Nnɛsɔne bosoen biala, ofikyɛ AWURADE bɔ ye dumaa ole Nungunɛ nen, ɔte Nyameɛ bɔ ɔtwe nungunɛ ɔ.

¹⁵ Nnɛne aseɛ ne aso ama yɛ apam, amaa sɛ bɛbɔ adwaman bekodi bɛ mmosoen nemɔ asi, ná bɛbɔ afɔleɛ bɛma bɛ mmosoen nemɔ, ná bɛ nu bie to ye sa frɛ wɔ a, angɔanni ye afɔleɛ ne bie.

¹⁶ Annea a, né agyigya bɛ mmrasua nemɔ bie ama wɔ mma mmienzua nemɔ. Na bɛ mma mmrasua nemɔ bɛbɔ adwaman bedi bɛ bosoen nemɔ asi a, bɛkɔma wɔ mma mmienzua nemɔ koso kɔbɔ adwaman koli bɛ bosoen nemɔ asi bie.

¹⁷ “Nnɛhuro nikyee biala fa yɔ bosoen sɔne ye.

¹⁸ “Di Paanoo Kabrɛdi aluolue ne. Di paanoo kabrɛdi ɛlɛsoo, kyɛbɔ mahyɛ wɔ ne, bosome Abibo nu mmerɛ bɔ mahyɛ ne, ofikyɛ bosome Abibo nu yeɛ etuli wɔ bo fili Misraim ɔ.

¹⁹ Koɛsɛen biala nu bamuɛbaa te me deɛ: wɔ nyɛmmoa nyii bamuɛbaa mukoraati, nandwie oo, boaen oo, ɔte me deɛ.

²⁰ Fa boaen ba sesã afunum bamuɛbaa biala, nakoso sɛ anzesã ye de a, ye de bu afunum ne kɔme anu. Wɔ mma nemɔ anu bamuɛbaa bienzua biala, odi kyɛ ɛpɔ ye fi AWURADE berɛ. Nnɛma ebiala fa ye sa mbaen ba me nyunu.

²¹ “Fa elesia yɔ adwuma, nakoso kyẽa bɔ ɔtɔ so nzoo ne de, de wɔ nwome; sɛ eboosonɛ anaa mmakaammaa telɛ mmerɛ po a, de wɔ nwome.

²² “Di Dapɛn Dapɛn aluolue ne, fa atokoɔ bɔ bedi moa bɛte ne yeɛ di ɔ. Di Aleɛ Noa Boaboalɛ aluolue ne wɔ afoɛ ne ayieleɛ.

²³ “Afoɛ biala, ɔsɛ kyɛ wɔ mma mmienzua mukoraati ba AWURADE Nyameɛ, bɔ ɔte Yisrael Nyameɛ ne nyunu pɛen nza.

²⁴ Ofikyɛ ngɔfoa maen maen ngofi wɔ nyunu, ná mama w’aseɛ wɛen so atrɛ. Na sɛ afoɛ biala ɛfo kɔ AWURADE wɔ Nyameɛ ne nyunu pɛen nza a, sona biala nye ngɔboro w’aseɛ.

²⁵ “Mogya bɔ ɛfa bɔ afɔleɛ ma me ne, nnɛfa paanoo harewaa boka so; yeɛ naen bɔ ɛfa bɔ Abɔtra aluolue afɔleɛ ne, nnɛma ebie ka ma aleɛ kye so.

²⁶ “W’aseɛ so aleɛ paa bɔ ekoli moa kɔpɛ ne, fa brɛ AWURADE wɔ Nyameɛ awuro. Nnɛfa abɔngye ba oni nyɔfonesue gua ye nwo to.”

²⁷ Na AWURADE sele Mose kyɛ, “Kyerɛ edwirɛ hemɔ, ofikyɛ edwirɛ hemɔ so yeɛ ngyi bɔ me ne wɔ ne Yisrael yayɛ apam ɔ.”

²⁸ Mose lili AWURADE nwo berɛ eleburanna, alehyeleɛ ne alesaleɛ; wannidi, yeɛ wanno hwee. Na ɔhyerɛle apam dwirɛ ne, bɔ ɔte mmeraa dwirɛ buru ne guale nyɔboɛ taataa ne aso.

Mose fi Sinai bokaa ne aso dwu ase

²⁹ Mose fili Sinai bokaa ne aso dwuli ase. Mmerɛ bɔ né ódwu fi bokaa ne aso ba ase, bɔ né otira Adanzeɛ nyɔboɛ taataa nyɔ nen, né Mose nze kyɛ ɔnate Nyameɛ bɔ ɔne ye bali ngɔmɔ ne ati, ye nyunu ata ɔ.

³⁰ Na mmerɛ bɔ Aarɔn ne Yisraelfoɛ amukoraa nwuni Mose nen, né ye nyunu ata, na besurole kyɛ bekopingye ye ɔ.

³¹ Nakoso Mose frɛle bɛ, na Aarɔn ne ɛlɔen ne anu mbanyi amukoraati sá wale ye nwo berɛ, na Mose ne bɛ lili ngɔmɔ.

³² Nziɛ ye, Yisraelfoɛ amukoraa pingyele ye nwo berɛ, na ɔhane mmeraa dwirɛ amukoraa bɔ AWURADE aha ahyire ye wɔ Sinai bokaa ne aso hyirele bɛ.

³³ Na Mose ne bɛ dwudwo yiele nen, ɔfale ngatanyunu bie purole ye nyunu.

³⁴ Nakoso mmerɛ biala, sɛ né Mose ɔ́kɔ AWURADE nyunu ɔne ye bekodwudwo a, né ɔye ngatanyunu ne, kɔpem kyɛ okofi ye nyunu berɛ ɔ. Na mmerɛ biala, ofi berɛ kɔfa ahyɛdeɛ bɔ wahyɛ ye ne nwo amaneɛ bɔ Yisraelfoɛ a,

³⁵ Yisraelfoɛ nwu kyɛ Mose nyunu ata. Na ɔyɛ a, Mose sá fa ngatanyunu ne puro ye nyunu kɔpem kyɛ ɔkɔhɔ nu ɔne AWURADE bekoodwudwo ɔ.