Ɛksadɔso 33 - AHYERƐLƐ KRONGRON

AWURADE ma Yisraelfoɛ tu fi Sinai bokaa ne nwo

¹ Na AWURADE sele Mose kyɛ, “Fi ɛwa kɔ, ɛne mmenia bɔ ɛɛyele bɛ fili Misraim aseɛ so wale ne. Aseɛ bɔ ndale ndaen mva mɔle Abraham, Yisake ne Yakob anohoba kyɛ, ‘Wɔ bosofoɛ yeɛ ngɔfa ngɔma bɛ ɔ’ ne, kɔ so.

² Ngɔsoma m’abɔfo maa okoli wɔ nyunu, na ngɔfoa Kanaanfoɛ, Amorifoɛ, Hitifoɛ, Perisifoɛ, Hiwifoɛ ne Yebusifoɛ mɔ ngofi so.

³ Kɔ aseɛ bɔ nyɔfonesue ne woɛ tengyɛ wɔ so ne aso; nakoso me de, me ne wɔ ngɔbɔ agyirɛ ngɔhɔ, annea né mama wɔ boso akyikyi wɔ atunu, ofikyɛ ɛte maen bɔ wɔ so yɛ se ɔ.

⁴ Na mmerɛ bɔ mmenia ne tele sɔ aworabɔlɛ dwirɛ nen, belili yealɛ; na ebiala amva ye mbembenanneɛ wanziesie ye nwo.

⁵ Ofikyɛ né AWURADE aha ahyire Mose kyɛ, “Ka kyire Yisraelfoɛ kyɛ, ‘Ɛmɔte mmenia bɔ bɛ so yɛ se ɔ; na sɛ me ne ɛmɔ yɛsã nu yɛkɔ kaala po a, ngɔma ɛmɔ boso konua. Yiti ɛ́mɔyeye ɛmɔ nwo mbembenanneɛ ne, amaa mahora manwu nikyee bɔ ngɔfa ngɔyɔ ɛmɔ ɔ.’ ”

⁶ Yiti Yisraelfoɛ puropurole bɛ nwo mbembenanneɛ ne, fite mmerɛ bɔ befili Horebo bokaa ne anwo ne.

Ɛtena sua atenaleɛ nu

⁷ Né Mose taa fa ɛtena sua ne okosi ye wɔ asikyeleɛ ne asi dɔ nziɛ nziɛ, na ɔfrɛle ye ɛtena sua atenaleɛ nu. Na sona biala bɔ né ɔpena kyɛ ɔfa ye dwirɛ to AWURADE nyunu ne, ɔyɛ a ɔkɔ ɛtena sua atenaleɛ nu berɛ, bɔ ɔwɔ asikyeleɛ ne asi dɔ ne.

⁸ Na mmerɛ biala, sɛ né Mose ɔkɔ ɛtena sua ne anu a, mmenia ne amukoraa dwɔso gyina, ebiala gyina ye tena sua anoa nu, na ɔnea Mose toonn maa ɔkɔworo ɛtena sua ne anu.

⁹ Mmerɛ biala, sɛ né Mose kɔworo ɛtena sua ne anu a, munungum ningɔnn ne dwu ba ase bagyina ɛtena sua ne anoa nu berɛ, na AWURADE ne Mose bedwudwo.

¹⁰ Na sɛ mmenia ne amukoraa nwu munungum ningɔnn ne kyɛ ogyi ɛtena sua ne anoa nu berɛ a, bɛ mukoraa bedwɔso begyina, na ebiala bɔ ye ti ase sɔne AWURADE wɔ ye ɛtena sua anoa nu.

¹¹ Né AWURADE nate sɔ atee he aso ogyina Mose nyunu ɔne ye bedwudwo, kyɛbɔ sona ne obiɛngo bedwudwo ne ala. Na sɛ Mose sá ba asikyeleɛ ne anu a, ye bokafoɛ aberandeɛ Yosua bɔ ɔte Nun awa ne, ye de ɔka ɛtena sua ne anu dɔ.

Nyameɛ hyɛ bɔ kyɛ ɔne Yisraelfoɛ kɔnate

¹² Na Mose sele AWURADE kyɛ, “Tie oo, wɔ ala yeɛ ɛkã kyire me kyɛ, ‘Fa mmenia hemɔ kɔ,’ nakoso ɛmma nnwuni sona bɔ ɛkɔsoma ye maa ɔne me kɔhɔ ɔ. Nakoso wɔ komapɛ ne ala yeɛ aha kyɛ, ‘Mese wɔ paa ne wɔ dumaa, na malo wɔ.’

¹³ Yiti mesrɛ wɔ, sɛ alo me de a, nzaade maa nwu wɔ ti anu adwene, amaa ɔnate so manwu wɔ, ná alo me. Afei koso, nwu ye kyɛ mmenia hemɔ te wɔ maen.”

¹⁴ Na AWURADE buale kyɛ, “Me bɔbɔ deinn me ne wɔ kɔhɔ, na ngɔmaa ekole wɔ nwome.”

¹⁵ Na Mose buale ye kyɛ, “Sɛ wɔ bɔbɔ deinn ɛne yɛ ngɔhɔ de a, nzaade nnɛfa yɛ fi wa kɔ.

¹⁶ Ofikyɛ, ɔkɔyɛ sɛɛ né banwu ye kyɛ alo me ne wɔ mmenia nemɔ? Aso nna ɛhɔlɛ bɔ ɛne yɛ kɔhɔ ne ɔ? Na ɛhe kɔma me ne wɔ mmenia nemɔ yɛkɔyɛ sonongo wɔ aseɛ ye aso mmenia mukoraati nu.”

¹⁷ Na AWURADE sele Mose kyɛ, “Sɔ dwirɛ he bɔ aha ye, ngɔyɔ; ofikyɛ malo wɔ, na mese wɔ paa ne wɔ dumaa.”

¹⁸ Na Mose sele kyɛ, “Mesrɛ wɔ ala, maa nwu w’animnyam.”

¹⁹ Na AWURADE buale kyɛ, “Ngɔma me paayɛlɛ mukoraati kɔsẽ kɔpɛ nu wɔ wɔ nyunu, ná mabɔ me dumaa AWURADE ne wɔ wɔ nyunu. Ofikyɛ sona bɔ ngɔlo ye ne yeɛ ngɔlo ye ɔ, yeɛ bɔ ngonwu ye anwumvoin ne yeɛ ngonwu ye anwumvoin ɔ.

²⁰ Na ɔfa sɔle so kyɛ, nakoso ɛngɔhora ngonwu me nyunu, ofikyɛ sona nnwu me nyunu ná onnya ngoa.

²¹ Na AWURADE hane kyɛ, Nea, nekaa wɔ me nwo wa, gyina nyɔbotaen ne aso.

²² Na sɛ m’animnyam ne ɔbaapɛ nu kɔ a, ngɔfa wɔ ngowura nyɔbotaen tokuro bie anu; na ngɔfa me sa ngɔkata wɔ so kodwu kyɛ ngɔpɛ nu ngɔhɔ ɔ.

²³ Afei ngɔye me sa, na ekonwu me kɔme asi; nakoso me nyunu de, bennwu ye.”