Ɛksadɔso 29 - AHYERƐLƐ KRONGRON

Aarɔn mma mɔ b’asɔfolilɛ nwo nhyehyɛleɛ

¹ “Afei yɔ ɛhe fa te bɛ nwo ma bɛyɛ krongron, ná beli sɔfo bɛso me: Fa nandwie nyii akrɔngrɔma ko ɔne mmoaen nyii nyɔ bɔ bellili nnɛen ɔ,

² paanoo kabrɛdi, taterɛ kabrɛdi bɔ bafa ngoo bafete ɔ, ɔne apiti kabrɛdi bɔ bafa ngoo bafa ye nwo ɔ. Fa atokoɔ esam paa yeɛ yɔ ɔ.

³ Fa gua kɛndɛen ko anu, maa begua kɛndɛen ne ala nu, ná fa bra. Fa nandwie nyii ne ne mmoaen nyii nyɔ ne boka so bra.

⁴ Fa Aarɔn ne ye mma mmienzua nemɔ bra ɛtena sua atenaleɛ anoa nu berɛ, ná fa nzue nwunzinwunzi bɛ nwo.

⁵ Fa ndaadeɛ nemɔ: aguasoɛ ne ɔsɔfo ataadeɛ aguasoɛ tendenn ne, ɔsɔfo ataadeɛ ne, ɔne ahone so aguasoɛ ne wura Aarɔn, ná fa ɔsɔfo ataadeɛ abɔsoɛ bɔ bali adwii bagua nu ne bɔ ye nu.

⁶ Fa abotire ne bɔ ye, ná fa kyerɛ krongron ne puro abotire ne aso.

⁷ Fa ɛpopalɛ ngoo ne, hwie gua ye ti so, ná fa popa ye ti so.

⁸ Fa ye mma mmienzua nemɔ bra, ná fa ndaadeɛ aguasoɛ wurawura bɛ.

⁹ Fa abɔsoɛ bobɔ Aarɔn ne ye mma mmienzua nemɔ nu, ná fa kyerɛ wurawura bɛ. Na ɔnate ahyɛdeɛ afebɔɔ so, ɔsɔfolilɛ kɔyɛ b’adwuma. Sɔ yeɛ hyɛ Aarɔn ne ye mma mmienzua mɔ sɔfo ɔ.

¹⁰ “Fa nandwie nyii ne bra ɛtena sua atenaleɛ nu berɛ, ná Aarɔn ne ye mma mmienzua nemɔ bɛ́fa bɛ sa bégua nandwie ne ti afia.

¹¹ Afei ku nandwie ne AWURADE nyunu, wɔ ɛtena sua atenaleɛ nu berɛ.

¹² Fa nandwie mogya ne bie, ná fa wɔ sa mmɛseka bɔ nu fa kekã afɔleɛ bokyea mmɛen nemɔ anwo. Na mogya bɔ ɔkɔha ne de, hwie gua afɔleɛ bokyea ne abo.

¹³ Afei fa ɛloe bɔ wato wafa ye kunu nningyein nwo ne amukoraa, bɔ osinzesinze ye boɛ ne anwo ne, ye saa nyɔ nemɔ ɔne bɛ nwo loe ne, ná yera bɛ wɔ afɔleɛ bokyea ne aso.

¹⁴ Nakoso nandwie naen ne, ye nwomaa ne ye fure nu nningyein de, fa see yera bɛ wɔ asikyeleɛ ne asi dɔ. Ɔte bɔne nwo afɔleɛ.

¹⁵ “Afei fa boaen nyii nemɔ nu ko, ná Aarɔn ne ye mma mmienzua nemɔ bɛ́fa bɛ sa bégua boaen nyii ne ti afia.

¹⁶ Ku boaen nyii ne, ná fa ye mogya ne petepete afɔleɛ bokyea ne anwo bra yia.

¹⁷ Pepɛ boaen naen ne anu ahuronzi ahuronzi. Nwunzi ye kunu nningyein ne ye gya nemɔ anwo, ná fa bɛ gua naen ahuronzi ahuronzi ɔne ye ti ne aso.

¹⁸ Yera boaen nyii mumua ne wɔ afɔleɛ bokyea ne aso. Ɔte naen yeralɛ afɔleɛ ma AWURADE. Ɔte nikyee fonafona, ɔte afɔleɛ bɔ bɛbɔ ye see so bɛma AWURADE ɔ.

¹⁹ “Afei fa boaen nyii ko ne wora, ná Aarɔn ne ye mma mmienzua nemɔ bɛ́fa bɛ sa bégua boaen nyii ne ti afia.

²⁰ Ku boaen nyii ne, ná fa ye mogya ne bie kekã Aarɔn so famaa tɛndiaa ne, ye mma mmienzua nemɔ so famaa tɛndiaa ne, bɛ sa kokotire famaa ne, ɔne bɛ gya kokotire famaa ne. Na mogya bɔ ɔkɔha ne de, hwie gua afɔleɛ bokyea ne anwo bra yia.

²¹ Afei fa afɔleɛ bokyea ne aso mogya ne bie, ɔne ɛpopalɛ ngoo ne, ná fa pete Aarɔn nwo ne ye ndaadeɛ nu, ɔne ye mma nemɔ nwo ne bɛ ndaadeɛ nu. Na ɛhe kɔma Aarɔn ne ye ndaadeɛ kɔyɛ krongron, ná ye mma mɔ ne bɛ ndaadeɛ koso ayɛ krongron.

²² “Boaen nyii ne, fa ye loe ne, ye dua pue ne, ɛloe bɔ wato wafa ye kunu nningyein nwo ne, bɔ osinzesinze ye boɛ nwo ne, ye saa nyɔ nemɔ ɔne bɛ nwo loe ne, ɔne ye sɔ famaa ne, (ofikyɛ ɔte ɔsɔfohyɛlɛ boaen nyii).

²³ Afei kɛndɛen bɔ paanoo kabrɛdi gua nu bɔ ogyi AWURADE nyunu ne, ye paanoo mumua ko, taterɛ bɔ bafa ngoo bafete ɔ ko, ɔne apiti ko fi nu;

²⁴ ná fa ye mukoraati gua Aarɔn sa nu, ɔne ye mma nemɔ koso bɛ sa nu, ná pagya so kɔ anwuro ma ɔyɛ ɛnwahanɛ afɔleɛ wɔ AWURADE nyunu.

²⁵ Afei, de fi bɛ sa nu, ná yera bɛ ne naen yeralɛ afɔleɛ ne wɔ afɔleɛ bokyea ne aso ma ɔbo fonafona wɔ AWURADE nyunu; ɔte afɔleɛ bɔ bɛfa see bɛyera ye bɛma AWURADE ɔ.

²⁶ “Aarɔn sɔfohyɛlɛ boaen nyii ne, fa ye sa ne, ná pagya so kɔ anwuro ma ɔyɛ ɛnwahanɛ afɔleɛ wɔ AWURADE nyunu, na ɔkɔyɛ wɔ deɛ.

²⁷ “Ɔsɔfohyɛlɛ boaen nyii ne, ye sa bɔ ɛfa bɔle ɛnwahanɛ afɔleɛ ne, ɔne ye sɔ bɔ ɛfa bɔle ɛnwahanɛ afɔleɛ ne, te bɛ nwo, ofikyɛ bɛte Aarɔn ne ye mma mmienzua mɔ deɛ.

²⁸ Na sɔ nhyehyɛleɛ ne kɔla berɛ afebɔɔ kɔma Aarɔn ne ye mma mmienzua mɔ, kyɛ bekonya sɔ kyɛfa ne bekofi Yisraelfoɛ berɛ ɔ; ofikyɛ ɔte afɔleɛ bɔ Yisraelfoɛ bɛkɔye bekofi b’asomdwee afɔleɛ ne anu bɛkɔbɔ kɔma AWURADE ɔ.

²⁹ “Aarɔn ndaadeɛ krongron ne kɔyɛ ye bosofoɛ deɛ, na bɛkɔfa kowura maa bɛkɔfa ɛpopalɛ ngoo ne bekogua bɛ ti so, ná bahyɛ bɛ sɔfo.

³⁰ Ye mma mmienzua nemɔ, bɛ nu ko bɔ okosi ye gya nu koli sɔfo ne, ko bɔ ɔkɔ ɛtena sua atenaleɛ nu berɛ ɔkɔyɔ ɔsɔfo adwuma wɔ nekaa krongron ne anu ne, ɔsɛ kyɛ owura ye ɛlɛsoo.

³¹ “Fa ɔsɔfohyɛlɛ boaen nyii ne, ná to ye naen ne wɔ nekaa krongron ne anu berɛ.

³² Na Aarɔn ne ye mma mmienzua mɔ bekoli boaen naen ne, ɔne paanoo bɔ ɔwɔ kɛndɛen ne anu ne, wɔ ɛtena sua atenaleɛ anoa nu berɛ.

³³ Nningyein bɔ bɛfa bɛyɛle mbata bɛmane bɛ, bɔ begyinane so bɛhyɛle bɛ sɔfo, ná bɛfa bɛtele bɛ nwo ne, beli. Nakoso sona bɔ ɔtte sɔfo ne de, nnɛmaa odi bie, ofikyɛ ɔte aleɛ krongron.

³⁴ Na sɛ ɔsɔfohyɛlɛ naen ne bie, anaa paanoo ne bie ka ma aleɛ kye so a, ye de fa see yera bɔ waha ne. Ɔnzɛ kyɛ bedi, ofikyɛ ɔte krongron.

³⁵ “Sɔ yeɛ yɔ ma Aarɔn ne ye mma nemɔ ɔ, kyɛbɔ mahyɛ wɔ ne amukoraa; fa ɛlɛsoo yeɛ hyɛ bɛ sɔfo ɔ.

³⁶ Daa biala, fa nandwie nyii ko bɔ bɔne nwo afɔleɛ maa ɔyɛ mbata. Asa koso, sɛ ɛ́pata wɔ afɔleɛ bokyea ne aso a, bɔ bɔne nwo afɔleɛ wɔ so, fa ɛpopalɛ ngoo popa ye, ná te ye nwo.

³⁷ Fa ɛlɛsoo pata wɔ afɔleɛ bokyea ne aso, te ye nwo, na afɔleɛ bokyea ne kɔyɛ krongron paa, na nikyee biala bɔ ye nwo kɔha afɔleɛ bokyea nen, ɔkɔyɛ krongron.

Daa daa afɔleɛ ne

³⁸ “Ɛlɛho biala, fa ɛhe bɔ afɔleɛ wɔ afɔleɛ bokyea ne aso: mmoaen akrɔngrɔma nyɔ bɔ ebiala ali afoɛ ko ɔ.

³⁹ Fa boaen akrɔngrɔma ko bɔ afɔleɛ ngyerɛmɔ, ná fa ko ne koso bɔ afɔleɛ nɔsoa.

⁴⁰ Fa ɛhe boka boaen akrɔngrɔma bɔ oli moa ne aso: esam paa olonka ko nu ngyɛmuɛ buru, bɔ bafa ngoo bɔ bahwi ɔ towaa ko ne bue bafra ɔ, ɔne bobe nzaa towaa ko ne bue bɔ ɛkɔfa kɔbɔ anonneɛ afɔleɛ ɔ.

⁴¹ Boaen akrɔngrɔma ko bɔ waha ne, fa bɔ afɔleɛ nɔsoa. Fa aleɛ afɔleɛ ne anonneɛ afɔleɛ ne boka so kyɛ ngyerɛmɔ deɛ ne ala. Maa ɔbo fonafona, na ɔte afɔleɛ bɔ bɛfa see bɛyera ye bɛma AWURADE ɔ.

⁴² Na ɔkɔyɛ daa biala naen yeralɛ afɔleɛ wɔ ɛtena sua atenaleɛ anoa nu berɛ, wɔ AWURADE nyunu, wɔ ɛmɔ aworɛ ndoatoasoɛ mukoraati nu. Na berɛ yeɛ me ne ɛmɔ yɛkoyia, ná me ne wɔ yadwudwo ɔ.

⁴³ Berɛ yeɛ me ne Yisraelfoɛ yɛkoyia ɔ, na m’animnyam kɔma berɛ kɔyɛ krongron.

⁴⁴ Ngɔte ɛtena sua atenaleɛ berɛ ne afɔleɛ bokyea ne anwo, na ngɔte Aarɔn ne ye mma mɔ nwo, ná bali sɔfo baso me.

⁴⁵ Ngɔtena Yisraelfoɛ nu, ná mayɛ bɛ Nyameɛ.

⁴⁶ Na bekonwu ye kyɛ me ole AWURADE bɛ Nyameɛ bɔ ɔyele bɛ fili Misraim aseɛ so ne, amaa ɔnate so matena bɛ nu. Me ole AWURADE bɛ Nyameɛ ne.