Ɛksadɔso 27 - AHYERƐLƐ KRONGRON

Naen yeralɛ afɔleɛ bokyea

¹ “Fa bɔsema si afɔleɛ bokyea. Ma ye tendenn nu yɛ agyirɛ nnu, ná ye tɛtrɛtɛɛ nu yɛ agyirɛ nnu. Ma afɔleɛ bokyea ne yɛ ahinanan, ná ma ye aseɛnwo bɔ ɔkwaadwu ye anwuro ne ɔyɛ agyirɛ nza.

² Yɔ mmɛen fa tuatua ye ndweaso nna ne aso. Maa ɔne ye mmɛen nemɔ béfi sɔ bakaa kundunzii komapɛ ne ala nu, ná fa kɔɔbere boro ye nwo.

³ Fa kɔɔbere yɔ ye nwo nningyein hemɔ amukoraati: ngukue mɔ, ye sofi mɔ, ayaa mɔ, ateɛ anoa tworɔntworɔn mɔ, ɔne ngukue bɔ bɛfa see bekogua nu ɔ.

⁴ Fa kɔɔbere nwo ye ngandanganda ne maa ɔbeabea nu, ná bɔ kɔɔbere kɔtɔkaa nna wɔ ngandanganda ne aso, wɔ ye ndweaso nna ne aso.

⁵ Fa ngandanganda ne wura afɔleɛ bokyea kaa ne abo, ná ma ngandanganda ne ɔtrɛ oodwu afɔleɛ bokyea ne afia.

⁶ Afɔleɛ bokyea ne, se ye mbuna nemɔ; bɔsema yeɛ fa se ɔ. Fa kɔɔbere boro bɛ nwo.

⁷ Ma mbuna nemɔ béwurawura kɔtɔkaa nemɔ anu, amaa sɛ bɛsoa a, mbuna nemɔ awa afɔleɛ bokyea ne ye ngyɛnu ne ye ngyɛnu.

⁸ Fa ndaboa yɔ afɔleɛ bokyea ne, ná ma bɔen la ye kunu. Na kyɛbɔ mafa mahyire wɔ wɔ bokaa ne aso nen, sɔ ala yeɛ yɔ ye ɔ.

Ɛtena sua aluo berɛ

⁹ “Yakyi aluo to berɛ wɔ nyianu sua ne anu. Fa nwera bɔ banwo, bɔ ye tendenn nu te agyirɛ ɛyaa ko nwi ye bue ko, wɔ ye ngwaen dɔ, wɔ ye famaa so.

¹⁰ Fa kɔɔbere yɔ ye bonima aburanyɔ ne, ɔne ye nyinasoɛ aburanyɔ ne. Nakoso bonima nemɔ bɛ ndɔkorɔ, ɔne bɔ ɔbeabea nu ne de, maa ɔ́yɛ ɛdwetɛ.

¹¹ Ye sorɔ dɔ koso, ma mbɛmuɛ tena ne tendenn nu ɔyɛ agyirɛ ɛyaa ko. Fa kɔɔbere yɔ bɛ bonima aburanyɔ ne, ɔne bɛ nyinasoɛ aburanyɔ ne. Nakoso bonima nemɔ bɛ ndɔkorɔ, ɔne bɔ ɔbeabea nu ne de, maa ɔyɛ ɛdwetɛ.

¹² Aluo berɛ ye tɛtrɛtɛɛ nu, wɔ eyia atɔleɛ bue nu dɔ, ma mbɛmuɛ tena ne ɔyɛ agyirɛ aburannu. Yɔ ye bonima buru ɔne bɛ nyinasoɛ buru.

¹³ Aluo berɛ ye tɛtrɛtɛɛ nu, wɔ ye anoa nu berɛ, wɔ eyia afiteleɛ bue nu dɔ, maa ɔ́yɛ agyirɛ aburannu.

¹⁴ Fa mbɛmuɛ tena bɔ ye tendenn nu te agyirɛ buru ne nnu nwi pambim ne bue ko. Yɔ ye bonima nza ɔne bɛ nyinasoɛ nza.

¹⁵ Aluo berɛ pambim ne, ye bue ko bɔ waha ne wora, ma mbɛmuɛ tena ne tendenn nu ɔyɛ agyirɛ buru ne nnu. Yɔ ye bonima nza ɔne bɛ nyinasoɛ nza.

¹⁶ Fa ɛtena bɔ ye tendenn nu te agyirɛ aburanyɔ nwi aluo berɛ pambim ne noa. Fa bibire, koogyan, adaabene ne gyese nwo bɛen ne. Maa beli adwii begua nu. Maa bɛsosɔ bonima nna nu, ná benya nyinasoɛ nna.

¹⁷ Bonima amukoraati bɔ bapɛ aluo berɛ nwo bayia ne, fa ɛdwetɛ beabea bɛ nwo. Fa ɛdwetɛ yɔ bɛ tɔkorɔ nemɔ, ná fa kɔɔbere yɔ bɛ nyinasoɛ nemɔ.

¹⁸ Ma aluo berɛ tendenn nu yɛ agyirɛ ɛyaa ko, ye tɛtrɛtɛɛ nu yɛ agyirɛ aburannu, ná ye so anwuro ne yɛ agyirɛ nnu. Mbɛmuɛ tena ne, fa gyese nwo, ná ma mbuna nemɔ bɛ nyinasoɛ yɛ kɔɔbere.

¹⁹ Nyianu sua ne anu nningyein amukoraa bɔ bɛfa bɛsɔne, ye pɛmbɛen amukoraa, ɔne aluo berɛ pɛmbɛen amukoraa, fa kɔɔbere yeɛ yɔ ɔ.

Kanea ne nwo mmeraa

²⁰ “Na wɔ wora, hyɛ Yisraelfoɛ amukoraa ma bɛbrɛ wɔ olive ngoo gyengɔgyengɔ bɔ bafa bɛ sa bahwi ɔ, bɔ bɛkɔfa bekogua kanea ne anu ɔ, amaa kanea nemɔ agyina so basɔ mmerɛ biala.

²¹ Ɛtena sua atenaleɛ berɛ, bɔ ɔwɔ mbɛmuɛ tena bɔ onwi Adanzeɛ ne nyunu ne, Aarɔn ne ye mma mmienzua mɔ yeɛ bɛkɔnea kyɛ kanea nemɔ asosɔ wɔ AWURADE nyunu ɔ, ofi nɔsoa bɔ ɔkwaadwu ngyerɛmɔ. Na sɔ ahyɛdeɛ ne kɔla berɛ daa kɔma Yisraelfoɛ wɔ b’aworɛ ndoatoasoɛ amukoraati nu.