Ɛksadɔso 25 - AHYERƐLƐ KRONGRON

Nyianu sua nu afɔleɛbɔlɛ

¹ AWURADE sele Mose kyɛ,

² “Ka kyire Yisraelfoɛ ma bɛfa ayɛyelɛ nikyee bɛbrɛ me. Ebiala bɔ ye kunu sefaa ne yeɛ ɛ́mɔle m’ayɛyelɛ nikyee béfi ye berɛ ɔ.

³ Sɔ ayɛyelɛ nikyee hemɔ yeɛ ɛ́mɔle béfi bɛ berɛ ɔ: esikaa kɔkorɛ, ɛdwetɛ ne kɔɔbere,

⁴ bibire, koogyan, adaabene, nwera paa, abɔngye nwiaa,

⁵ mmoaen nyii nwomaa bɔ bawura ye ayire kɔkorɛ ɔ, abɔngye nwomaa, bɔsema,

⁶ ngoo bɔ bɛfa bɛsɔ kanea ɔ, nningyein bɔ bɛfa bɛyɔ ɛpopalɛ ngoo, ɔne ayirefona ne;

⁷ nyɔboɛ bɔ bɛfrɛ ye onike, mbembenanneɛ bɔ bɛfa bɛteta ɔsɔfo ataadeɛ nu, ɔne ye ahone so aguasoɛ nu ɔ.

⁸ Maa besi nekaa krongron bɛma me, ná matena b’afia.

⁹ Nyianu sua ne, kyɛbɔ mebaahyire wɔ ne, sɔ ala yeɛ ɔsɛ kyɛ ɛmɔyɔ ye sɛso ne nu nningyein amukoraa pɛpɛɛpɛ ɔ.

Apam alaka ne

¹⁰ “Maa bɛ́fa bɔsema bɛbobɔ apam alaka. Ɔsɛ kyɛ ye tendenn nu yɛ agyirɛ nyɔ ne bue, ye tɛtrɛtɛɛ nu yɛ agyirɛ ko ne bue, yeɛ ye so anwuro yɛ agyirɛ ko ne bue.

¹¹ Fa sikaa kɔkorɛ paa boro ye kunu ne ye si, ná fa sikaa kɔkorɛ pɛ ye nwo bra yia.

¹² Fa sikaa kɔkorɛ bɔ kɔtɔkaa nna fa puro ye, ná fa sosɔ ye gya nna nemɔ anu; kɔtɔkaa nyɔ wɔ ye bue ko, yeɛ kɔtɔkaa nyɔ wora wɔ ye bue ko.

¹³ Fa bɔsema se mbuna mɔ, ná fa sikaa kɔkorɛ boro bɛ nwo.

¹⁴ Fa mbuna nemɔ wurawura kɔtɔkaa nemɔ anu wɔ alaka ne ngyɛnu ne ye ngyɛnu, bɔ bɛkɔsosɔ nu bɛkɔsoa alaka ne ɔ.

¹⁵ Ma mbuna nemɔ béwurawura alaka ne kɔtɔkaa nemɔ anu; nnɛmaa bɛye befi nu.

¹⁶ Fa Adanzeɛ bɔ mebaafa mema wɔ ne to alaka ne anu.

¹⁷ “Fa sikaa kɔkorɛ paa yɔ mbata bia. Ma ye tendenn nu yɛ agyirɛ nyɔ ne bue, ná ye tɛtrɛtɛɛ nu yɛ agyirɛ ko ne bue.

¹⁸ Yɔ kɛrubim nyɔ siesie mbata bia ne ye ti ne ye ti; sikaa kɔkorɛ bɔ afa buralɛ aboro yeɛ fa yɔ ɔ.

¹⁹ Yɔ kɛrubo ngoko siesie ye ti ne ye ti. Yɔ kɛrubim nemɔ ne mbata bia ne bɔ nu wɔ ye ti ne ye ti.

²⁰ Ma kɛrubim nemɔ bɛtrɛtrɛ bɛ ndaa nu bɛhɔ anwuro, ná bɛ́fa bɛ ndaa ne bébutubutu mbata bia ne aso. Ma kɛrubim nemɔ bɛ nyunu neanea bɛ nyunu, ná ma bɛ nyunu nea mbata bia ne.

²¹ Fa mbata bia ne sie alaka ne aso anwuro, ná fa Adanzeɛ bɔ mebaafa mema wɔ ne to alaka ne anu.

²² Berɛ yeɛ me ne wɔ yɛkoyia ɔ, wɔ mbata bia ne aso anwuro, wɔ kɛrubim nyɔ bɔ bɛwɔ Adanzeɛ alaka ne aso ne b’afia. Na ngɔhã me mmeraa dwirɛ mukoraati bɔ méfa méma Yisraelfoɛ ne ngohyire wɔ.

Paanoo krongron poen ne

²³ Fa bɔsema bobɔ ɛpoen. Ma ye tendenn nu yɛ agyirɛ nyɔ, ye tɛtrɛtɛɛ nu yɛ agyirɛ ko, ná ye so anwuro ne ɔ́yɛ agyirɛ ko ne bue.

²⁴ Fa sikaa kɔkorɛ paa boro ye nwo, ná fa sikaa kɔkorɛ pɛ ye nwo hangra bra yia.

²⁵ Fa kaa bɔ ye piri te kyɛ bɛ sa mmɛseka pɛ ye nwo bra yia, ná fa sikaa kɔkorɛ pɛ ye nwo hangra bra yia.

²⁶ Yɔ sikaa kɔkorɛ kaa nna ma ɛpoen ne, ná fa kaa nemɔ sosɔ ndweaso nna ne, nekaa bɔ ye gya nna nemɔ wɔ ne.

²⁷ Kɔtɔkaa mɔ bɔ bɛsosɔ mbuna bɔ bɛfa bɛsoa ɛpoen nen, maa bepingye nikyee bɔ afa apɛ ye nwo abra ayia ne.

²⁸ Fa bɔsema se mbuna mɔ, ná fa sikaa kɔkorɛ boro bɛ nwo; na mbuna nemɔ yeɛ bɛkɔfa bɛkɔsoa ɛpoen ne ɔ.

²⁹ Yɔ ye ndalie ne ɛyɛɛ kulie mɔ, turonzemaa ne bua mɔ bɔ bɛkɔfa bekohwie afɔleɛ nzaa ɔ; sikaa kɔkorɛ paa yeɛ fa yɔ ɔ.

³⁰ Ná fa paanoo krongron ne to me nyunu wɔ ɛpoen ne aso mmerɛ biala.

Kanea bakaa ne

³¹ Fa sikaa kɔkorɛ paa yɔ kanea bakaa. Fa sikaa kɔkorɛ paa bɔ bafa buralɛ baboro ɔ yɔ ye nyinasoɛ ne ye bakaa mumua ne. Ma ye kulie mɔ, ye mmaen mɔ, ye sa mɔ, yeɛ ye nyerɛen nemɔ béfi sɔ sikaa kɔkorɛ kundunzii komapɛ ne ala nu.

³² Ɔsɛ kyɛ mmaen nzia tuatua kanea bakaa ne ngyɛnu; ye bue ko mmaen nza, yeɛ ye bue ko wora mmaen nza.

³³ Ma kulie nza bɔ besoma atonwaa, bɔ wafefɛ, ná wabɔ nyerɛen ɔ bɛbra mmaen ko aso. Asa koso, ma kulie nza bɔ besoma atonwaa, bɔ wafefɛ ná wabɔ nyerɛen ɔ bɛbra mmaen foforɛ aso. Yiti mmaen nzia yeɛ bekotuatua kanea bakaa ne anwo ɔ.

³⁴ Ma kulie nna bɔ besoma atonwaa, bɔ wafefɛ, ná wabɔ nyerɛen ɔ bétuatua kanea bakaa mumua ne anwo.

³⁵ Mmaen nzia bɔ betuatua kanea bakaa ne anwo ne, ma nyerɛen ko tua mmaen nyɔ bɔ beli moa ne abo, ma nyerɛen ko tua mmaen nyɔ bɔ bɛtɔ so nyɔ ne abo, ná ma nyerɛen ko wora otua mmaen nyɔ bɔ waha ne abo.

³⁶ Ma bɛ nyerɛen nemɔ, bɛ mmaen nemɔ, ɔne kanea bakaa ne béfi sɔ sikaa kɔkorɛ kundunzii komapɛ bɔ bafa buralɛ baboro ne ala nu.

³⁷ Afei yɔ ye kanea nzoo ne, ná fa siesie so maa bɛta ye nyunu berɛ.

³⁸ Akapɛ bɔ bɛfa bɛtengyɛtengyɛ kanea nyamaa noa ne, ɔne kanea nyamaa nzoen talie nemɔ, sikaa kɔkorɛ paa yeɛ fa yɔ ɔ.

³⁹ Kanea bakaa ne ne ye nwo nningyein amukoraa, sikaa kɔkorɛ paa kilo aburasa ne nna yeɛ fa yɔ ɔ.

⁴⁰ Nea kyɛ ɛkɔyɔ ye sɛso kyɛbɔ mafa mahyire wɔ wɔ bokaa ye aso ne.