Ɛksadɔso 24 - AHYERƐLƐ KRONGRON

Nyameɛ si apam ne agyinayɛɛ

¹ Afei Nyameɛ sele Mose kyɛ, “Fo bra AWURADE berɛ, ɛne Aarɔn, Nadabo ne Abihu, yeɛ Yisraelfoɛ nu mbanyi aburasoo, ná ɛ́mɔgyina nziɛ nziɛ bɛsɔne (me).

² Mose ngome twe yeɛ odi kyɛ opingye AWURADE ɔ; nakoso bɛ ngaa ne de, nnɛmaa bepingye ye; yeɛ mmenia ne koso, nnɛmaa bɛ ne ye fo ba bie.”

³ Mose wale, na ɔɔfale AWURADE dwirɛ amukoraa ne ye nhyehyɛleɛ amukoraa bɔle mmenia ne amaneɛ, na mmenia ne amukoraa bɔle nu hane kyɛ, “Edwirɛ biala bɔ AWURADE aha ne, yɛkoli so.”

⁴ Na Mose hyerɛle AWURADE dwirɛ ne amukoraati. Na ɔpɛle aleɛ dwɔsole ngyerɛmɔ sili afɔleɛ bokyea wɔ bokaa ne nye abo, na ɔfale nyɔboɛ buru ne nyɔ penapenane berɛ, ɔfa gyinane berɛ mane Yisrael abusua kure buru ne nyɔ ne.

⁵ Afei ɔsomane Yisrael mmerandeɛ, na bɛfale nandwie bɛɛbɔle naen yeralɛ afɔleɛ ne asomdwee afɔleɛ bɛmane AWURADE.

⁶ Mose fale mogya ne bue ko guale ayaa nu, yeɛ ye bue ko wora ohwie guale afɔleɛ bokyea ne anwo.

⁷ Afei ɔfale apam nwomaa ne, ɔkengale mane mmenia ne tiele, na besele kyɛ, “Edwirɛ biala bɔ AWURADE aha ne, yɛkɔyɔ, na yɛkoli so.”

⁸ Afei ɔfale mogya ne petene mmenia ne anwo, na ɔhane kyɛ, “Apam bɔ AWURADE nate edwirɛ he amukoraa so ɔne ɛmɔ bayɛ ne, mogya he yeɛ osi ye agyinayɛɛ ɔ.”

⁹ Afei Mose ne Aarɔn, Nadabo, Abihu ne Yisraelfoɛ nu mbanyi aburasoo ne hɔle bokaa ne aso.

¹⁰ Na benwuni Yisrael Nyameɛ ne. Né nikyee bie te kyɛ safire nyɔbotɛnderɛ wɔ ye gya bo, bɔ ye nye te kyɛ ewienu ala ɔ.

¹¹ Nakoso Nyameɛ anyɔ Yisrael mbanyi nemɔ hwee. Benwuni Nyameɛ, bedidili, na bɛnone.

¹² Na AWURADE sele Mose kyɛ, “Fo bra me nwo faen wɔ bokaa ye aso, ná kɔnwondɛ berɛ. Na ngɔfa nyɔboɛ taataa ne, ɔne mmeraa ne mmeraa dwirɛ bɔ mahyerɛ kyɛ bɛfa behyirehyire bɛ ne ngɔma wɔ.”

¹³ Yiti Mose dwɔsole, ɔne ye bokafoɛ Yosua, na Mose hɔle Nyameɛ bokaa ne aso.

¹⁴ Na osele mbanyi nemɔ kyɛ, “Ɛ́mɔtena wa bɛnwondɛ yɛ kɔpem kyɛ yɛkosa kɔwa ɛmɔ wa ɔ. Aarɔn ne Hure boka ɛmɔ so wɔ wa; na sɛ ebie le dwirɛ bie a, maa ɔfa hɔ bɛ gya so.”

¹⁵ Afei Mose fo hɔle bokaa ne aso, na munungum ne katale bokaa ne aso.

¹⁶ AWURADE animnyam wale Sinai bokaa ne aso, na munungum ne katale so elesia. Na ye ɛlɛsoo ne aso, ɔfrɛle Mose fili munungum ne anu.

¹⁷ Na Yisraelfoɛ nwuni AWURADE animnyam ne kyɛ see bɔ ogye wuronyiwuronyi wɔ bokaa ne ti afia.

¹⁸ Mose worole munungum ne anu, na ɔhɔle bokaa ne aso. Na Mose lili bokaa ne aso eleburanna, eyia ne kɔngɔen.