Ɛksadɔso 21 - AHYERƐLƐ KRONGRON

Ngangafoɛ nwo mmeraa

¹ “Nhyehyɛleɛ hemɔ yeɛ hyehyɛ ma bɛ ɔ:

² Sɛ ɛtɔ kanganiɛ bɔ ɔte Hebriniɛ a, ɔsɛ kyɛ ɔso wɔ afoɛ nzia. Nakoso afoɛ bɔ ɔtɔ so nzoo ne de, maa ɔfa ye nwo li tɔtorɔtɔɔ ɔhɔ.

³ Sɛ ye ngome twe yeɛ ɔwale hɔ a, ye ngome yeɛ ɔkɔhɔ ɔ. Nakoso sɛ ɔne ɔye yeɛ bɛwale de a, ye de ɔne ɔye yeɛ bɛkɔhɔ ɔ.

⁴ Sɛ ye mene ma ye braa maa ogya, ná ɔne ye bɛwo mmaa mmienzua anaa mmrasua a, ye de braa ne ɔne ye mma mɔ bɛte ye mene deɛ, na biaa ne ngome twe yeɛ ɔkɔhɔ ɔ.

⁵ Nakoso sɛ kanganiɛ ne to ye noa nu tui ka kyɛ, ‘Mekuro me mene dwirɛ, mekuro me ye, mekuro me mma wora dwirɛ, yiti membena kyɛ mefa me nwo medi mekɔ’ a,

⁶ ye de ɔsɛ kyɛ ye mene fa ye kogyina Nyameɛ nyunu. Ɔ́fa ye oogyina anoa nu anaa aponnwaa nu berɛ, ná ye mene ne ɔfa tulie otofi ye so anu, ná ye asetena nu mukoraa ɔso ye mene ne.

⁷ “Sɛ bienzua bie yɛ ɔwa brasua atɔen maa ɔkɔyɛ afaneɛ a, ye de afaneɛ ne ngonya ye fawɔnwodi kyɛbɔ mmienzua nganga nemɔ nya ye ne.

⁸ Na ye mene bɔ ɔtɔle ye ne, sɛ ye nye ngye ye nwo a, ye de ɔma bɛɛpɔ ye. Atee nne berɛ kyɛ ɔyɛ ye atɔen ma amanvrafoɛ ɔ, ofikyɛ wali ye ngasi.

⁹ Sɛ ogya ye ma ɔwa bienzua a, ye de ɔsɛ kyɛ ɔyɛ ye kyɛbɔ ɔyɛ ɔwa brasua ne ala.

¹⁰ Sɛ ogya braa bieku a, ɔnzɛ kyɛ ɔte ɔye panyi aleɛ so, ye tena ne ye agyaa nu dibea so.

¹¹ Na sɛ wanyɔ sɔ nningyein nza hemɔ wamma ye a, ye de ɔkɔfa ye nwo koli kɔhɔ, bɔ sikaa biala mvite nu ɔ.

Epuralɛ anaa ehunɛ nwo mmeraa

¹² “Ebiala bɔ ɔkɔbɔ obiɛngo maa okowu nen, ye wora bekohu ye bie.

¹³ Nakoso sɛ wanhyɛ da yeɛ ohuni ye ɔ, na mmom Nyameɛ yeɛ ɔfale ye wurale ye sa a, ye de ngɔpena nekaa bɔ ɔkɔnwati kɔhɔ ɔ ngɔma wɔ.

¹⁴ Nakoso sɛ ebie nye la ye nwo, ná ɔlakalaka obiɛngo ku ye a, ye de twe ye fi m’afɔleɛ bokyea ne anwo ma behũ ye.

¹⁵ “Ebiala bɔ ɔkɔbɔ ɔse anaa oni nen, ɔsɛ kyɛ beku ye.

¹⁶ Ebiala bɔ okowua sona nen, sɛ ɔtɔne ye oo, anaakyɛ benwu ye wɔ ye berɛ oo, ɔsɛ kyɛ beku ye.

¹⁷ “Ebiala bɔ ɔkɔnoma ɔse anaa oni nen, ɔsɛ kyɛ beku ye.

¹⁸ “Sɛ mmenia nya dwudwolɛ, ná sɛ ko fa nyɔboɛ anaa kutuku bɔ obiɛngo, bɔ wanwu, na mmom ɔka ye to bɛen so a,

¹⁹ ná sɛ nziɛ ye, ye nwo sande ye maa ɔkora dwɔso tira ye pɔmaa nu fite natenate a, ye de sona bɔ ɔbɔle ye ne, ɔkɔfa ye nwo koli. Nakoso ye mmerɛ bɔ wasɛkye ye ne de, ɔsɛ kyɛ otua ye nwo kerɛ, ná osa nea ye maa ye nwo sa bɔkɔɔ.

²⁰ “Sɛ ebie fa bakaa bɔ ye kanganiɛ bienzua anaa brasua maa owu ye sa nu a, ye de bɛkɔtɔ meneɛ ne so wereɛ.

²¹ Nakoso sɛ kanganiɛ ne di ɛlɛho anaa elenyɔ ná wanwu a, ye de bɛngɔtɔ meneɛ ne so wereɛ; ofikyɛ kanganiɛ ne te ye agyapadeɛ.

²² “Sɛ mmienzua bɛ́ko, ná bepura pemvoɛ maa ɔpɔ baa, ná edwirɛ tɛɛ bie amma ye si ko a, ye de kerɛ biala bɔ braa ne ahu ɔkɔbɔ sɔ sona bɔ opurale braa nen, sɛ ndɛenbualɛfoɛ de to nu a, ɔsɛ kyɛ otua.

²³ Nakoso sɛ edwirɛ tɛɛ bie ba ye si a, ye de bekohu ye bie bekotua kerɛ,

²⁴ bɔ ɛkɔfa kɔyɛ ebie nye ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie gye ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie sa ne, sɔ ala yeɛ bɛkɔyɛ wɔ bie bekotua kerɛ ɔ; bɔ ɛkɔfa kɔyɛ ebie gya ne, sɔ ala yeɛ bɛkɔyɛ wɔ bie bekotua kerɛ ɔ;

²⁵ ɛfa see yera ebie a, sɔ ala yeɛ bɛkɔyera wɔ bie bekotua kerɛ ɔ; epura ebie a, sɔ ala yeɛ bekopura wɔ bie bekotua kerɛ ɔ; yeɛ sɛ ɛma ebie nwo beabea a, sɔ ala yeɛ bɛkɔma wɔ nwo kɔbeabea kotua kerɛ ɔ.

²⁶ “Sɛ ebie bɔ ye kanganiɛ bienzua anaa brasua nye maa ɔsɛkye a, ɔnate ye nye ne ati, ɔsɛ kyɛ ɔmaa onya ye fawɔnwodi.

²⁷ Yeɛ sɛ ɔbɔ ye kanganiɛ bienzua anaa brasua ma ye gye tu a, ɔnate ye gye ne ati, ɔsɛ kyɛ ɔmaa onya ye fawɔnwodi.

Meneɛ mɔ b’asɛdeɛ

²⁸ “Sɛ nandwie si kuro sona bienzua anaa brasua maa owu a, ɔsɛ kyɛ bɛboro nandwie ne nyɔboɛ beku ye. Nnɛmaa bedi ye naen, nakoso nandwie ne mene kɔfa ye nwo koli tɔtorɔtɔɔ.

²⁹ Nakoso sɛ nandwie ne taa si mmenia, bɔ babɔ ye mene kɔkɔ, nakoso ɔnga ye ndo tuin nu ne, sɛ oku bienzua anaa brasua a, ɔsɛ kyɛ bɛboro nandwie ne nyɔboɛ (beku ye), yeɛ ye mene ne koso bɛ́boro ye nyɔboɛ behũ ye.

³⁰ Sɛ bekole ye mbata a, ye de ɔkɔhora kotua mbata biala bɔ bede ye ɔ, ná wafa wale ye ti ngoa.

³¹ Sɛ osi ebie awa bienzua anaa brasua a, mmeraa komapɛ ne ala yeɛ bɛ́fa beli ye ɔ.

³² Sɛ nandwie ne si kanganiɛ bienzua anaa brasua a, odi kyɛ nandwie mene ne tua ɛdwetɛ sekel aburasa ma kanganiɛ ne mene; na nandwie ne koso, ɔsɛ kyɛ bɛboro ye nyɔboɛ beku ye.

³³ “Sɛ ebie bukye abura so to berɛ, anaakyɛ ofu kumaa bɔ wangata so, ná nandwie anaa afunum kɔtɔ nu a,

³⁴ odi kyɛ abura ne mene tua ye kerɛ, ɔkɔfa sikaa kotua kaka ne mene kerɛ, na kaka fuin ne kɔyɛ ye deɛ.

³⁵ “Sɛ ebie nandwie pura sona foforɛ nandwie maa owu a, ɔsɛ kyɛ bɛtɔne nandwie bɔ ɔte ase ne, ná bɛkyɛ sikaa ne ɔne kaka fuin ne koso.

³⁶ Nakoso sɛ benwu kyɛ nandwie ne taa si, nakoso ye mene nga ye ndo tuin nu a, ye de ɔsɛ kyɛ ye mene fa nandwie si nandwie gya nu, ná ɔfa ye kaka fuin ne.