Ɛksadɔso 20 - AHYERƐLƐ KRONGRON

Mmeraa Buru ne

¹ Afei Nyameɛ hane sɔ dwirɛ he amukoraa. Ɔnwa:

² “Me ole AWURADE wɔ Nyameɛ bɔ nyele wɔ mvili Misraim aseɛ so, fili ngoaasolɛ nu ne.

³ “Nnɛnya nyameɛ foforɛ biala ɛboka me so.

⁴ “Nnɛyɔ amoen biala ɛso ye, anaa nikyee biala bɔ ye sue te kyɛ ewienu anwuro anwuro nikye, anaa aseɛ so nikye, anaa aseɛ bo dɔ nzue nu nikye.

⁵ Nnɛkoto bɛ, yeɛ nnɛso bɛ; ofikyɛ me, AWURADE wɔ Nyameɛ ne, nde nungunɛ Nyameɛ, na meprapra seɛ mɔ bɛ bɔne nwo asohwenɛ megua bɛ mma mɔ so, maa okodwu aworɛ ndoatoasoɛ nza ne nna bɔ bɛpɔ me so.

⁶ Nakoso bɛ bɔ bekuro me dwirɛ, ná bedi me mmeraa dwirɛ so ne de, mekuro bɛ dwirɛ maa okodwu aworɛ ndoatoasoɛ apee apee so.

⁷ “Nnɛbɔ AWURADE wɔ Nyameɛ dumaa mbaen mbaen; ofikyɛ ebiala bɔ ɔkɔbɔ AWURADE dumaa mbaen mbaen ne, ɔngɔma ɔngɔfa ye nwo ngoli tɔtorɔtɔɔ.

⁸ “Kaye afofikyẽa ne, ná di ye krongron.

⁹ Elesia yeɛ fa yɔ adwuma, ná yɔ wɔ nningyein mukoraati ɔ.

¹⁰ Nakoso kyẽa bɔ ɔtɔ so nzoo ne de, ɔte afofikyẽa ma AWURADE wɔ Nyameɛ. Nnɛyɔ adwuma biala sɔ kyẽa ne: wɔ oo, ɛwa bienzua oo, ɛwa brasua oo, w’akoaa oo, w’afaneɛ oo, w’ayɛmmoa oo, anaa ɛwɔfoɛ bɔ ɔte wɔ kuro ɔ.

¹¹ Ofikyɛ elesia yeɛ AWURADE fa bɔle anwuro ne aseɛ, ɛpo ne bɛ nu nningyein amukoraati ɔ, nakoso olele ye nwome kyẽa bɔ ɔtɔ so nzoo ne. Yiti AWURADE yirale afofikyẽa ne, na ɔyɛle ye krongron.

¹² “Di ɛse ne eni ni, amaa ɔnate so anya ngoa tendenn wɔ aseɛ bɔ AWURADE wɔ Nyameɛ ɔ́fa ma wɔ ne aso.

¹³ “Nnɛdi awue.

¹⁴ “Nnɛsɛkye agyaa.

¹⁵ “Nnɛwua.

¹⁶ “Nnɛdi adanzewia tia ebiɛngo.

¹⁷ “Nnɛma wɔ nye yɛ eliɛngo awuro nwo koakoa. Nnɛma wɔ nye yɛ eliɛngo aye nwo koakoa, anaa ye akoaa, ye afaneɛ, ye nandwie, ye afunum, anaa nikyee biala bɔ eliɛngo deɛ ahɔ ɔ.”

Ɛserɛ hane mmenia ne

¹⁸ Na mmenia ne amukoraa nwuni agralaa bɔ né ɔ́tete, ɔne bokaa bɔ né ótu nwosina ne, ná besa bɛtele agralaa bɔ né ɔ́bobɔ nu ne, ɔne totorobɛndo hulɛ nen, ɛserɛ mane bɛ nwo wosowosole bɛ, na beegyinane dedeede.

¹⁹ Na besele Mose kyɛ, “Wɔ bɔbɔ dwudwo kyire yɛ, na yɛkotie. Nnɛma Nyameɛ dwudwo kyire yɛ, ná yanwuwu.”

²⁰ Na Mose buale mmenia ne kyɛ, “Nnɛma ɛmɔsuro, ofikyɛ Nyameɛ awa kyɛ ɔbaaso ɛmɔ nea, amaa ɔnate so ye nwo suronyi atena ɛmɔ nu, ná ɛmɔanyɔ bɔne.”

²¹ Mmenia ne gyinane dedeede, nakoso Mose de opingyele awosii kabii bɔ né Nyameɛ wɔ nu ne.

Afɔleɛ bokyea nwo mmeraa

²² Na AWURADE sele Mose kyɛ, “Edwirɛ he yeɛ ka kyire Yisraelfoɛ ɔ: ‘Ɛmɔ bɔbɔ ɛmɔanwu ye kyɛ me ne ɛmɔ yadwudwo fi nyameɛso.

²³ Nnɛma ɛmɔfa ɛdwetɛ bɛyɛ nyameɛ foforɛ mɔ bɛboka me so, anaa sikaa kɔkorɛ bɛyɛ nyameɛ foforɛ mɔ bɛfa.

²⁴ Wɔ de, si nnɛterɛ afɔleɛ bokyea ma me, na so yeɛ fa wɔ mmoaen ne wɔ nandwie bɔ naen yeralɛ afɔleɛ, ɔne w’asomdwee afɔleɛ ɔ. Na nekaa biala bɔ ngɔmaa ɛkɔkaye me dumaa nen, ngɔwa wɔ berɛ ngooyira wɔ.

²⁵ Na sɛ ɛfa nyɔboɛ si afɔleɛ bokyea ma me a, nnɛfa nyɔboɛ bɔ base ɔ si, ofikyɛ sɛ ɛfa pɛwaa di adwii wɔ so a, né agua ye nwo fiɛ.

²⁶ Nnɛfo simbini so kɔ m’afɔleɛ bokyea nwo, ná wɔ nwo angua berɛ wɔ so.’