Ɛksadɔso 18 - AHYERƐLƐ KRONGRON

Yɛtro kɔpasa Mose nwo

¹ Midian sɔfo Yɛtro, bɔ ɔte Mose sia bienzua ne, ɔtele bɔ Nyameɛ ayɔ amukoraa ama Mose ne ye maen Yisrael, ɔne kyɛbɔ AWURADE asi aye Yisrael afi Misraim ɔ.

² Mmerɛ bɔ Mose mane ɔye Sipora sá hɔle nen, Mose sia bienzua Yɛtro ne ye tenane,

³ ɔne ye mma mmienzua nyɔ ne. Mose tole ko dumaa Gɛsɔm, (ɔnate kyɛ ɔhane kyɛ, “Maayɛ ɛwɔfoɛ wɔ amanvrafoɛ aseɛ so”).

⁴ Ɔtole ko wora dumaa Eliesa (ɔnate kyɛ ɔhane kyɛ, “Me baba Nyameɛ gyinane me si, na olele me fili Faro ngrandɛ noa”).

⁵ Na Yɛtro, bɔ ɔte Mose sia bienzua ne, ɔfale Mose mma mmienzua nyɔ ne, ɔne Mose aye ne wale Mose berɛ wɔ ɛserɛ ne aso, nekaa bɔ né wasi asikyeleɛ ne, wɔ Nyameɛ bokaa ne anwo.

⁶ Na ɔmaa bɛɛbɔle Mose amaneɛ kyɛ, “Me, Yɛtro bɔ nde wɔ sia bienzua, me ne ɛye ne ye mma mmienzua nyɔ ne yɛ́ba wɔ berɛ.”

⁷ Yiti Mose fitele ooyiale ye sia bienzua ne, obuli ndwerɛ wɔ ye nyunu, na afei ɔtɔle ye nu. Bebisabisale kyɛbɔ ebiala aporɛ nu si te ɔ, na bɛɛworole ɛtena sua nu.

⁸ Na Mose fale ɛhemɔ nwo amaneɛ bɔle ye sia bienzua ne: nningyein mukoraa bɔ ɔnate Yisrael ti AWURADE afa ayɔ Faro ne Misraimfoɛ, ɔne amaneɛ mukoraa bɔ Yisraelfoɛ nwuni ye wɔ atunu, yeɛ afei kyɛbɔ AWURADE si yele bɛ fili nu ɔ.

⁹ Na paa mukoraati bɔ AWURADE ayɔ ama Yisrael, kyɛ wale bɛ wafi Misraimfoɛ sa nu ne, ɔyɛle Yɛtro fɛ.

¹⁰ Na Yɛtro sele kyɛ, “Animnyam hã AWURADE bɔ olele ɛmɔ fili Misraimfoɛ ne Faro sa nu ne.

¹¹ Na afei de, manwu ye kyɛ AWURADE te piri tra bosoen biala, ofikyɛ olele mmenia ne fili Misraimfoɛ sa nu, mmerɛ bɔ né bɛ́hyɛ bɛ anyeborolɛ ne.”

¹² Na Yɛtro, bɔ ɔte Mose sia bienzua ne, ɔfale naen yeralɛ afɔleɛ ne afɔleɛ ahoroɔ brɛle Nyameɛ. Na Aarɔn ne Yisrael mbanyi amukoraa wale, na bɛ ne Mose sia bienzua ne bedidili wɔ Nyameɛ nyunu.

Bɛye maenbulɛfoɛ

¹³ Aleɛ hyene ne, Mose tenane ase kyɛ osiesie mmenia afia dwirɛ, na mmenia gyinane ye so ndende toonn fite ngyerɛmɔ maa aleɛ dwole.

¹⁴ Na Mose sia bienzua ne nwuni bɔ Mose ɔ́yɔ amukoraa ma mmenia nemɔ nen, osele kyɛ, “Nzikyɛ yeɛ ɛ́yɔ ma mmenia ye mɔ ye? Nzu ati yeɛ wɔ ngome twe esiesie dwirɛ, bɔ mmenia gyigyi wɔ so ndende fite ngyerɛmɔ ma aleɛ dwo ye?”

¹⁵ Na Mose buale ye sia ne kyɛ, “Ɔnate kyɛ mmenia ne ba me berɛ maa mebisa Nyameɛ apɛdeɛ mema bɛ.

¹⁶ Sɛ ebie ne obiɛngo benya dwirɛ a, bɛba me berɛ maa mesiesie b’afia, na mekyire bɛ Nyameɛ ahyɛdeɛ ne ye mmeraa.”

¹⁷ Na Mose sia ne buale ye kyɛ, “Bɔ ɛyɔ ye, ɔtte mayee.

¹⁸ Ɛfɛɛ paa yeɛ ɛne mmenia bɔ bɛboka wɔ so ne bɛkɔfɛ ɔ; ofikyɛ adwuma ne ɔbo wɔ so, na wɔ ngome twe ɛngɔhora ye yɔ.

¹⁹ Yiti tie bɔ meka ye: métu wɔ foɛ, na mesrɛ kyɛ Nyameɛ oli wɔ si. Odi kyɛ egyina mmenia ne gya nu wɔ Nyameɛ nyunu, ná ɛfa bɛ dwirɛ to Nyameɛ nyunu.

²⁰ Kyirekyire bɛ ahyɛdeɛ ne mmeraa ahoroɔ ne, ná maa benwu brabɔlɛ nu atee bɔ odi kyɛ bɛfa so ɔ, ɔne bɔ odi kyɛ bɛyɔ ɔ.

²¹ Afei koso, neanea mmenia ne amukoraa nu, ná ye mmenia bɔ bɛfata, bɔ besuro Nyameɛ, bɔ bedi nahorɛ, bɔ bekyi fea-ase-ma, ná maa bɛlela mmenia apee apee, ɛyaa ɛyaa, aburannu aburannu ne buru buru noa.

²² Maa besiesie mmenia nemɔ afia mmerɛ biala. Edwirɛ biala bɔ ɔbo bɛ so ne, maa bɛfa bɛbra wɔ gya so. Nakoso edwirɛ mmaa mmaa mɔ de, maa bɛ bɔbɔ beli. Ɛhe kɔte wɔ fɛɛ ne aso, ná bɛ wora baboka wɔ maa ayɔ sɔ adwuma ne.

²³ Na sɛ ɛyɔ he kyɛbɔ Nyameɛ hyɛ wɔ ne a, ɛkɔhora kogyina ye noa, ná mmenia ne amukoraa koso bahɔ b’awuro asomdwee nu.”

²⁴ Yiti Mose tiele ye sia dwirɛ ne, na ɔyɔle bɔ ɔhane ne amukoraati.

²⁵ Mose neaneane Yisraelfoɛ amukoraati nu yeyele bɛ bɔ bɛfata ɔ, na ɔbɔle bɛ panyi wɔ mmenia ne aso maa bɛlelale mmenia apee apee, ɛyaa ɛyaa, aburannu aburannu ne buru buru noa.

²⁶ Na besiesiele mmenia nemɔ afia mmerɛ biala. Bɛfale edwirɛ bɔ ɔyɛ se nemɔ bɛwale Mose gya so, nakoso edwirɛ mmaa mmaa nemɔ de, bɛ bɔbɔ belili.

²⁷ Afei Mose guale ye sia ne ate, na ye sia ne hɔle ye bɔbɔ ye maen nu.