Ɛksadɔso 16 - AHYERƐLƐ KRONGRON

Mana ne nnomaa

¹ Yisraelfoɛ tuli bɛ bo befili Elim, na Yisrael ɛlɔen ne amukoraa wale Sin ɛserɛ bɔ ɔla Elim ne Sinai b’afia ne aso. Betu befili Misraim aseɛ so ne, bosome bɔ ɔtɔ so nyɔ ne anu, kyẽa bɔ ɔtɔ so buru ne nnu ne aso yeɛ bedwuli Sin ɛserɛ ne aso ɔ.

² Na Yisrael ɛlɔen ne amukoraa penepenene bɛ komvi beguale Mose ne Aarɔn so wɔ ɛserɛ ne aso.

³ Besele Mose ne Aarɔn kyɛ, “Sɛ AWURADE tumi maa yɛwuwuli Misraim aseɛ so a, ahaa ɔte paa. Berɛ de, yɛtenatenane naen kukue nwo yɛdidili yɛtele naen mane yɛ ko yili pambee. Nakoso ɛmɔafa yɛ baagua ɛserɛ so wa kyɛ bɛbaama ɛhɔen ku maen ye amukoraa.”

⁴ Na AWURADE sele Mose kyɛ, “Ɛ́mɔtie, ngɔma aleɛ kɔtɔ kofi anwuro kogua ase kɔma ɛmɔ. Ɛlɛho biala mmenia ne kofite kɔɔsesa bɔ ɔkɔso bɛ di sɔ kyẽa ne ɔ. Na ɛhe kɔmaa ngonwu ye sɛ bekoli me mmeraa so anaakyɛ bengoli so a.

⁵ Na kyẽa bɔ ɔtɔ so nzia ne, sɛ bɛboaboa bɔ bɛkɔsesa ne noa a, ɔsɛ kyɛ ɔyɛ ɛlɛho biala deɛ bɔ bɛsesa ne ye faa nyɔ.”

⁶ Yiti Mose ne Aarɔn sele Yisraelfoɛ ne kyɛ, “Ɛnɛ nɔsoa, ɛmɔkonwu ye kyɛ AWURADE yeɛ ɔyele ɛmɔ fili Misraim aseɛ so ɔ.

⁷ Na ngyerɛmɔ koso ɛmɔkonwu AWURADE animnyam, ofikyɛ AWURADE anwu kyɛ ɛmɔpenepene bɛ komvi begua ye so. Na yɛ de, yɛ ole nwa bɔ ɛmɔpenepene bɛ komvi begua yɛ so ɔ?”

⁸ Na Mose sele kyɛ, “Nɔsoa biala, AWURADE kɔma ɛmɔ naen ma ɛmɔkoli, na ngyerɛmɔ koso, ɔkɔma ɛmɔ aleɛ ma ɛmɔ ko koyi; ofikyɛ AWURADE ate kyɛ ɛmɔpenepene bɛ komvi begua ye so. Na yɛ de, yɛ ole nwa? Nna yɛ yeɛ ɛmɔpenepene bɛ komvi begua yɛ so ɔ, na mmom AWURADE.”

⁹ Na Mose sele Aarɔn kyɛ, “Ka kyire Yisrael ɛlɔen ne amukoraa kyɛ, ‘Ɛmɔhwe bepingye AWURADE, ofikyɛ wate kyɛ ɛmɔpenepene bɛ komvi.’ ”

¹⁰ Na Aarɔn noa wɔ so bɔ odwudwo kyire Yisrael ɛlɔen nen, bɛtole bɛ nye bɛneane ɛserɛ ne aso dɔ, na mvum nu, AWURADE animnyam yele ye nwo ali wɔ munungum ne anu.

¹¹ Na AWURADE sele Mose kyɛ,

¹² “Mate Yisraelfoɛ bɛ komvi bɔ bɛpenepene ne. Yiti ka kyire bɛ kyɛ, ‘Nɔsoa ɛmɔkoli naen, ná ngyerɛmɔ wora ɛmɔali aleɛ ama ɛmɔ ko ayi; amaa ɔnate so ɛmɔanwu kyɛ me ole AWURADE ɛmɔ Nyameɛ ne.’ ”

¹³ Odwuli nɔsoa ne, ayenzii mɔ tuli bi beeyi bɛfale asikyeleɛ ne; na aleɛ hyene ngyerɛmɔ nen, ɛborɔ guale asikyeleɛ ne anu nekaa biala.

¹⁴ Na ɛborɔ ne yakyili gualɛ nen, mvum nu, nikyee mmaa mmaa taataa bie bɔ ye hatahata te kyɛ asukɔtwea guaguale ɛserɛ ne aso.

¹⁵ Na Yisraelfoɛ nwuni ye sɔ nen, bebisabisale bɛ nwo ngoko ngoko kyɛ, “Nzikyɛ nikyee ɛhe?” Ofikyɛ né bɛnze nikye horɛ. Na Mose sele bɛ kyɛ, “Aleɛ bɔ AWURADE afa ama ɛmɔ kyɛ ɛmɔli hɔ ɛne.

¹⁶ Bɔ AWURADE ahyɛ hɔ ɛhe: ‘Ɔsɛ kyɛ ebiala sesa somaa bɔ ɔkɔso ye di ɔ; olonka ngoko ngoko. Ɔsɛ kyɛ ebiala nea mmenia somaa bɔ bɛwɔ ye ɛtena sua nu ɔ ná ɔsesa.’ ”

¹⁷ Sɔ ala yeɛ Yisraelfoɛ yɔle ɔ; ebiemɔ sesale pee, yeɛ ebiemɔ wora bɛsesale kãa bie.

¹⁸ Nakoso bɛfale olonka besusuli nen, sona bɔ ɔsesale pee ne deɛ ammo so, yeɛ sona bɔ ɔsesale kãa bie ne koso, ye deɛ wandɔ si. Ebiala sesale bɔ ɔkɔso ye di ɔ.

¹⁹ Yeɛ Mose sele bɛ kyɛ, “Nnɛma ebiala yakyi bie ma aleɛ kye so.”

²⁰ Nakoso bandɛ Mose so. Ebiemɔ yakyili bie ma aleɛ hyene so, na ngaka wale nu maa ɔbone mvii. Na Mose fɛle bɛ so yaa.

²¹ Ngyerɛmɔ biala, ebiala sesale bɔ ɔkɔso ye di ɔ; nakoso sɛ eyia bɔ a, né wahuro.

²² Kyẽa bɔ ɔtɔ so nzia ne, bɛsesale aleɛ ne mmɔhoɛ nyɔ; ebiala sesale olonka nyɔ. Mbanyi amukoraa bɔ bɛlela ɛlɔen ne noa ne, bɛwale Mose berɛ bɛɛbɔle ye amaneɛ,

²³ na Mose buale bɛ kyɛ, “Bɔ AWURADE ahyɛ hɔ ɛne: ‘Ɛhema te nwomelelɛ kyẽa bɔkɔɔ, afofikyẽa krongron ma AWURADE. Yiti bɔ ɛmɔkɔtoto ne, ɛ́mɔtoto, yeɛ bɔ ɛmɔkɔto ne koso, ɛ́mɔto. Na bɔ ɔkɔha ne, odi kyɛ ɛmɔfa besie maa odwu ɛhema ngyerɛmɔ.’ ”

²⁴ Yiti bɛfale bie besiele mane aleɛ hyene so, kyɛbɔ Mose ha hyirele bɛ ne; wammo mvii, yeɛ ngaka koso amma nu.

²⁵ Na Mose sele kyɛ, “Ɛ́mɔli ye ɛnɛ, ofikyɛ ɛnɛ te afofikyẽa ma AWURADE. Ɛmɔngonwu bie wɔ buro ɛnɛ.

²⁶ Elesia yeɛ ɛmɔfa bɛsesa ɔ; nakoso kyẽa bɔ ɔtɔ so nzoo, bɔ ɔte afofikyẽa ne de, ebie ngɔte ngogua.”

²⁷ Kyẽa bɔ ɔtɔ so nzoo ne, mmenia ne biemɔ hɔle kyɛ bɛkwaapena bie bɛsesa, nakoso bannya bie.

²⁸ Na AWURADE sele Mose kyɛ, “Kyinzu koraa yeɛ ɛmɔkɔpo me mmeraa dwirɛ ne me mmeraa maa okoodwu ɔ?

²⁹ Ɛmɔanwu ye kyɛ, AWURADE ama ɛmɔ afofikyẽa, na ye sɔ ati yeɛ kyẽa bɔ ɔtɔ so nzia ne, ɔma ɛmɔ elenyɔ aleɛ ɔ. Yiti ɔsɛ kyɛ ebiala tena ye awuro; nnɛma ebiala tu ye gya baa fite fi ye awuro kyẽa bɔ ɔtɔ so nzoo ne.”

³⁰ Yiti mmenia ne lele bɛ nwome kyẽa bɔ ɔtɔ so nzoo ne.

³¹ Yisraelfoɛ frɛle aleɛ ne mana. Né ɔte kyɛ mviɛlɛ, fitaa, na ye fɛɛ te kyɛ apiti bɔ woɛ wɔ nu ɔ.

³² Na Mose sele kyɛ, “Edwirɛ bɔ AWURADE aha ato berɛ hɔ ɛhe: ‘Ɔsɛ kyɛ ɛmɔfa mana olonka ko besie berɛ bɛma ɛmɔ si ama mukoraa bɔ bɛkɔwa ɔ, amaa ɔnate so banwu aleɛ bɔ mva mane ɛmɔ lili wɔ ɛserɛ so, mmerɛ bɔ nyele ɛmɔ mvili Misraim aseɛ so ne.’ ”

³³ Na Mose sele Aarɔn kyɛ, “Fa talie, ná fa mana olonka ko gua nu; ná fa sie AWURADE nyunu, maa bɛ́fa bésie wɔ ɛmɔ aworɛ ndoatoasoɛ amukoraa nu.”

³⁴ Na kyɛbɔ AWURADE hyɛle Mose nen, sɔ ala yeɛ Aarɔn fa siele Adanzeɛ ne anu, kyɛ bɛ́fa bésie ɔ.

³⁵ Yisraelfoɛ lili mana afoɛ aburanna, maa oodwuli kyɛ bedwuli aseɛ bɔ mmenia tete so ɔ so; na belili mana toonn kɔpem kyɛ bedwuli Kanaan aseɛ so ɔ.

³⁶ (Olonka ko te graa ko bɔ bahyɛ nu buru ɔ).