Ɛksadɔso 13 - AHYERƐLƐ KRONGRON

Bɛfa bamuɛbaa bienzua bɛma Nyameɛ

¹ AWURADE sele Mose kyɛ,

² “Tu bamuɛbaa mukoraa sie berɛ ma me; ebiala bɔ okoli moa kofi koɛsɛen nu kɔwa wɔ Yisraelfoɛ nu ne, sona oo, ayɛmmoa oo, ɔte me deɛ.”

Paanoo Kabrɛdi aluolue

³ Na Mose sele mmenia ne kyɛ, “Ɛ́mɔkaye sɔ kyẽa he bɔ ɛmɔfili Misraim ɔ, bɔ ɛmɔfili ngoaasolɛ nu ne, ofikyɛ AWURADE nate tumi piri so yeɛ ɔyele ɛmɔ fili Misraim ɔ; yiti nnɛma ɛmɔdi paanoo harewaa biala.

⁴ Ɛnɛ kyẽa ye, wɔ bosome Abibo nu, yeɛ ɛ́mɔfi Misraim ɔ.

⁵ Na sɛ AWURADE fa wɔ kodwu Kanaanfoɛ, Hitifoɛ, Amorifoɛ, Hiwifoɛ ne Yebusifoɛ aseɛ bɔ ɔtale ndaen hyirele wɔ nana mɔ kyɛ ɔkɔfa kɔma wɔ ne aso, aseɛ bɔ nyɔfonesue ne woɛ tengyɛ wɔ so ne aso a, di aluolue he wɔ ɛsraen he anu.

⁶ Di paanoo kabrɛdi ɛlɛsoo, ná di aluolue ne fa ye AWURADE ayɛ wɔ ye ɛlɛsoo ne aso.

⁷ Ɛlɛsoo yeɛ ɛ́mɔli paanoo kabrɛdi ɔ; ɔnzɛ kyɛ benwu paanoo harewaa biala wɔ ɛmɔ berɛ, anaa mɔle harewaa wɔ ɛmɔ aseɛ so nekaa biala.

⁸ Na sɔ kyẽa ne, kyire nu kyire ɛwa kyɛ, ‘Ɔnate nikyee bɔ AWURADE yɔ mane me wɔ mmerɛ bɔ mvili Misraim ne ati ɔ.’

⁹ Na ɛhe kɔyɛ kyɛ sɛngyerɛnneɛ bɔ ɔwɔ wɔ sa nwo, ná wayɛ ngayeɛ wɔ wɔ nwoma so wama wɔ, amaa ɔnate so AWURADE mmeraa ne ala wɔ noa; ofikyɛ AWURADE nate tumi piri so yeɛ ɔyele wɔ fili Misraim ɔ.

¹⁰ Yiti di sɔ nhyehyɛleɛ he aso wɔ ye mmerɛ so afoɛnoa biala.

Bamuɛbaa bienzua

¹¹ Na sɛ AWURADE fa wɔ kodwu Kanaanfoɛ aseɛ so, ná ɔfa ma wɔ, kyɛbɔ ɔtale ndaen hyirele wɔ ne wɔ nana mɔ ne a,

¹² tu abɔdeɛ biala bɔ okoli moa kofi koɛsɛen nu kɔwa ne sie berɛ ma AWURADE. Wɔ nyɛmmoa mɔ bɛ bamuɛbaa bienzua mukoraa te AWURADE deɛ.

¹³ Fa boaen ba sesã afunum bamuɛbaa biala, nakoso sɛ anzesã ye de a, ye de bu afunum ne kɔme anu. Yeɛ wɔ mma mɔ bɛ nu bamuɛbaa bienzua biala koso, odi kyɛ ɛpɔ ye fi AWURADE berɛ.

¹⁴ Na sɛ kyẽa bie ɛwa bisa wɔ kyɛ, “Ɛhe bo kyire sɛɛ’ a, wɔ koso abua ye kyɛ, ‘AWURADE nate ye tumi piri so yeɛ ɔyele yɛ fili Misraim ngoaasolɛ nu ɔ.

¹⁵ Ofikyɛ mmerɛ bɔ Faro bubuli mmakaa tuale ye so kyɛ ɔngɔma yɛngɔhɔ nen, AWURADE huhuni Misraim aseɛ so bamuɛbaa mukoraati, fite mmenia bamuɛbaa mɔ so, maa oodwuli nyɛmmoa bamuɛbaa mɔ so. Na ɔnate sɔ ati yeɛ mefa kaka bamuɛbaa bienzua biala mebɔ afɔleɛ mema AWURADE ɔ. Nakoso me mma mɔ bɛ nu bamuɛbaa bienzua biala de, mepɔ ye (mefi AWURADE berɛ).’

¹⁶ Na ɛhe kɔyɛ kyɛ sɛngyerɛnneɛ bɔ ɔwɔ wɔ sa nwo, anaa ngayeɛ wɔ wɔ nwoma so, ofikyɛ AWURADE nate tumi piri so yeɛ ɔyele yɛ fili Misraim ɔ.”

Munungum ningɔnn ne see ningɔnn

¹⁷ Faro mane mmenia ne ate kyɛ bɛhɔ nen, Nyameɛ amva bɛ amva Filistifoɛ aseɛ so, ɔwɔ nu kyɛ né berɛ yeɛ ɔte tika ɔ. Ofikyɛ Nyameɛ hane kyɛ, “Sɛ mmenia ne kɔtɔ koɛ nu a, annea a né banu bɛ nwo, ná basa bahɔ Misraim.”

¹⁸ Yiti ɛserɛ so atee bɔ ɔkɔ Ɛpo Kɔkorɛ nwo ne, Nyameɛ mane mmenia ne makye fale so. Na Yisraelfoɛ tu fili Misraim aseɛ so bɛhɔle kyɛ mmenia bɔ bɛ́kɔ koɛ ɔ.

¹⁹ Mose sesale Yosef mmowue ne hɔle; ofikyɛ né Yosef ama Yisrael mma nemɔ ata ndaen. Osele kyɛ, “Nyameɛ koogyina ɛmɔ si, na ɔyɛ a, ɛ́mɔfa me mmowue ne béfi wa bɛhɔ.”

²⁰ Betuli bɛ bo befili Sukote, na beesikyele Etam, wɔ ɛserɛ ne noa.

²¹ Alehyeleɛ nu, AWURADE lili bɛ nyunu wɔ munungum ningɔnn nu hyirele bɛ atee. Na alesaleɛ nu koso, ɔtale hyireinn mane bɛ wɔ see ningɔnn nu, kyɛbɔ bɛkɔhora bɛkɔnate eyia ne kɔngɔen ɔ.

²² Munungum ningɔnn bɔ né oli bɛ nyunu ne, wanyakyi bɛ nu eyia; yeɛ see ningɔnn ne koso wanyakyi bɛ nu kɔngɔen.