Ɛksadɔso 12 - AHYERƐLƐ KRONGRON

Abɔtra aluolue ne

¹ AWURADE sele Mose ne Aarɔn wɔ Misraim aseɛ so kyɛ,

² “Bosome he yeɛ ɔkɔyɛ ɛmɔ bosome bɔ oli moa ɔ; ɔkɔyɛ afoɛ ne anu bosome bɔ oli moa kɔma ɛmɔ.

³ Ka kyire Yisrael maen ne amukoraa kyɛ, bosome he anu kyẽa bɔ ɔtɔ so buru ne, ɔsɛ kyɛ bienzua biala pena boaen akrɔngrɔma ko ma ye awuro ama, awuro biala nu kohia boaen akrɔngrɔma ko.

⁴ Na sɛ boaen akrɔngrɔma ne bo awuro ne anu mmenia so a, ye de ma sɔ awuro ne ɔne awuro foforɛ bɔ opingye ye ne bɛhyɛ naen ne, kyɛbɔ nu mmenia somaa si te ɔ. Na kyɛbɔ sona biala kɔhora ye di ne, sɔ yeɛ ɛ́mɔnea so bɛ́fa mmoaen akrɔngrɔma ne ɔ.

⁵ Ɔsɛ kyɛ boaen akrɔngrɔma ne yɛ nyii bɔ wali afoɛ ko, bɔ ollili nnɛen ɔ. Ɔsɛ kyɛ ɛmɔsa nu bɛye bɛ befi mmoaen anaa mbɔngye nemɔ anu.

⁶ Ɛ́mɔfa ye bésie toonn ma odwu bosome he anu kyẽa bɔ ɔtɔ so buru ne nna ne, na afei Yisrael maen ne amukoraa behũhũ bɛ mmoaen ne nɔsoa.

⁷ Awuro bɔ bekoli naen ne wɔ nu nen, ɔsɛ kyɛ bɛfa mogya ne bie bɛkeka aponnwaa nyɔ ne, ɔne sua ne ye bati so.

⁸ Ɔsɛ kyɛ bɛtoto naen ne bedi ye sɔ kɔngɔen ne, ná bɛfa paanoo kabrɛdi ne awɔwee nyaa bɛboka so.

⁹ Nnɛma ɛmɔdi ye monɛ, yeɛ nnɛma ɛmɔfa nzue bɛto, na mmom ɛ́mɔtoto: ye ti, ye gya ne ye kunu nningyein ne boka so.

¹⁰ Nnɛma ɛmɔfa ebie besie ma aleɛ kye so; na sɛ ebie ka ma aleɛ kye so a, odi kyɛ ɛmɔyera ye.

¹¹ Atee he aso yeɛ ɔsɛ kyɛ ɛmɔpe so bedi ɔ: ɛ́mɔbɔ ɛmɔ abɔsoɛ, ɛ́mɔwura ɛmɔ mbaboa, ɛ́mɔfa ɛmɔ pɔmaa nemɔ bétiratira, ná ɛ́mɔli ye ndɛndɛ. AWURADE Abɔtra ne ɛne.

¹² Ngɔɔpɛ nu Misraim aseɛ so sɔ kyẽa ne kɔngɔen, na ngohũ Misraim aseɛ so bamuɛbaa mukoraa, fite mmenia so kodwu ngaka so; na ngobua Misraim mmosoen amukoraa ndɛen. Me ole AWURADE.

¹³ Mogya ne yeɛ ɔkɔhyɛ ɛmɔ nzorɛ, wɔ awuro mɔ bɔ ɛmɔtete nu ne anu ɔ. Na sɛ menwu mogya ne a, ngɔbɔ ngɔtra ɛmɔ, amaa sɛ mébɔ Misraim maen ne a, amaneɛ ne bie ando ɛmɔ.

¹⁴ Kyẽa sɔ ne kɔyɛ ngayeɛ kyẽa kɔma ɛmɔ, na ɛ́mɔli ye aluolue bɛma AWURADE; na odi kyɛ ɛmɔdi sɔ aluolue ne afebɔɔ wɔ ɛmɔ aworɛ ndoatoasoɛ mukoraa nu.

Paanoo Kabrɛdi aluolue

¹⁵ “Ɛmɔkoli paanoo kabrɛdi ɛlɛsoo. Kyẽa bɔ oli moa ne, ɔsɛ kyɛ ɛmɔye mɔle harewaa biala befi ɛmɔ awuro mɔ nu, ofikyɛ ofi kyẽa bɔ oli moa ne alaa bɔ ɔkwaadwu kyẽa bɔ ɔtɔ so nzoo nen, sona biala bɔ okoli mɔle harewaa ne, bɛkɔpɛ ye asue bekofi Yisraelfoɛ nu.

¹⁶ Ɔsɛ kyɛ ɛmɔyɛ nyianu krongron wɔ kyẽa bɔ oli moa ne, yeɛ kyẽa bɔ ɔtɔ so nzoo ne koso ɛ́mɔyɛ nyianu krongron. Nnɛma ɛmɔyɔ adwuma wɔ sɔ ngyẽa ne; sana aleɛ bɔ ebiala koli angome yeɛ ɛ́mɔyɔ ye nwo adwuma ɔ.

¹⁷ Ɔsɛ kyɛ ɛmɔdi Paanoo Kabrɛdi aluolue ne, ofikyɛ sɔ kyẽa ne yeɛ nyele ɛmɔ amukoraati mvili Misraim aseɛ so ɔ. Yiti ɛ́mɔtu sɔ kyẽa ne besie berɛ beli sɔ aluolue ne afebɔɔ wɔ ɛmɔ aworɛ ndoatoasoɛ mukoraa nu.

¹⁸ Bosome bɔ oli moa ne anu, kyẽa bɔ ɔtɔ so buru ne nna ne ye nɔsoa, bɔ ɔkwaadwu kyẽa bɔ ɔtɔ so aburanyɔ ne ko ne ye nɔsoa, ɛ́mɔli paanoo kabrɛdi.

¹⁹ Ɛlɛsoo ne anu, ɔnzɛ kyɛ benwu mɔle harewaa wɔ ɛmɔ awuro; ofikyɛ ebiala bɔ okoli mɔle harewaa nen, sɛ ɛwɔfoɛ ahɔ oo, anaa bɛwole ye maen ne anu oo, bɛkɔpɛ sɔ sona ne asue bekofi Yisraelfoɛ nu.

²⁰ Nnɛma ɛmɔdi nikyee harewaa biala. Ɛ́mɔli paanoo kabrɛdi wɔ nekaa biala bɔ ɛmɔkɔtena ɔ.”

Abɔtra Aluolue bɔ oli moa

²¹ Afei Mose frɛle Yisrael mbanyi amukoraa, na osele bɛ kyɛ, “Ebiala ɔɔhye boaen ko ma ye awuro ama, ná ohu ye fa yɛ Abɔtra boaen ne.

²² Ɛ́mɔfa sufiɛ, ná ɛ́mɔfa bɛbɔ mogya bɔ ɔwɔ ayaa ne anu, ná ɛ́mɔfa mogya bɔ ɔwɔ nu ne bɛ́keka sua ne bati so ɔne aponnwaa nyɔ ne. Nnɛma ɛmɔ nu biala fi ye awuro fite maa okodwu ngyerɛmɔ.

²³ Ofikyɛ AWURADE kɔɔpɛ nu kohũhũ Misraimfoɛ; na sɛ AWURADE nwu mogya bɔ ɔwɔ sua ne ye bati so, ɔne aponnwaa nyɔ nemɔ nwo a, okosã sɔ anoa ne anwo, na ɔngɔma sɛkyelɛniɛ ne ate ma ɔngɔwa ɛmɔ awuro berɛ ongohũhũ ɛmɔ.

²⁴ Odi kyɛ ɛmɔdi sɔ dwirɛ he aso; ɔte nhyehyɛleɛ ma wɔ ne wɔ boso ama afebɔɔ.

²⁵ Na sɛ ɛmɔdwu aseɛ bɔ AWURADE baafa ma ɛmɔ ne aso, kyɛbɔ wahyɛ ye nwo bɔ ne a, ɛmɔhɔ so beli sɔ aluolue he.

²⁶ Na sɛ ɛmɔ mma mɔ bisa ɛmɔ kyɛ, ‘Ɛmɔ aluolue he, ye bo ole sɛɛ?’ a

²⁷ Ɛmɔhã kyɛ, ‘Ɔte Abɔtra afɔleɛ bɔ yɛbɔ yɛma AWURADE bɔ ohuhuni Misraimfoɛ ne. Nakoso odwuli Yisraelfoɛ awuro mɔ nwo wɔ Misraim nen, ɔpɛle nu hɔle maa yɛnyane yɛ ti yɛdidili nu.’ ” Na mmenia ne bɔle bɛ ti ase bɛsɔne (Nyameɛ).

²⁸ Na Yisraelfoɛ mɔ hɔle bɛɛyɔle sɔ, kyɛbɔ AWURADE hyɛle Mose ne Aarɔn ne ala.

Misraim bamuɛbaa mmienzua wuwu

²⁹ Ye abunnamu ne, AWURADE huhuni Misraim aseɛ so bamuɛbaa mmienzua mukoraati, fite Faro bamuɛbaa bienzua bɔ ɔtena ye bia so ɔ so, kodwu sona bɔ bahye ye nnure bawura kuku nu ye bamuɛbaa so, ɔne nyɛmmoa mɔ bɛ bamuɛbaa mɔ so.

³⁰ Yeɛ Faro dwɔsole kɔngɔen ne, ɔne ye mbanyi mɔ amukoraa ne Misraimfoɛ amukoraa, na awuyebɔlɛ piri paa wale Misraim, ofikyɛ awuro biala nne berɛ bɔ sona anwu nu ɔ.

³¹ Na Faro tole ye sa frɛle Mose ne Aarɔn kɔngɔen ne sele bɛ kyɛ, “Ɛmɔ ne Yisraelfoɛ, ɛmɔhã bɛ nwo befi me maen ye anu bɛhɔ! Ɛmɔhɔ bɛɛsɔne AWURADE, kyɛbɔ ɛmɔaha ne.

³² Ɛ́mɔfa ɛmɔ mmoaen ne ɛmɔ nandwie mɔ, ná ɛ́mɔfi wa bɛhɔ, kyɛbɔ ɛmɔhane nen, ná ɛ́mɔyira me koso.

³³ Misraimfoɛ hane Yisraelfoɛ bo kyɛ bɛha bɛ nwo befi aseɛ ne aso; ofikyɛ bɛhane kyɛ, “Yɛ mukoraa yawu yayie.”

³⁴ Yiti Yisraelfoɛ tetele bɛ mɔle wɔ mmerɛ bɔ né ɔngeka ɔ. Bɛfale bɛ ndena bɛkyekyele ye nwo wɔ ngukue nu, na bɛfa bɛtole bɛ kɔme anwo.

³⁵ Yisraelfoɛ yɔle kyɛbɔ Mose ha hyirele bɛ ne, ofikyɛ né badide ɛdwetɛ ne sikaa kɔkorɛ mbembenanneɛ ne ɛtena bafi Misraimfoɛ berɛ.

³⁶ Né AWURADE ama Misraimfoɛ alo Yisraelfoɛ dada; yiti bɛ sa hane bɔ bebisale befili bɛ berɛ amukoraati. Bɛyɛle Misraimfoɛ dosodoso.

Yisraelfoɛ tu fi Misraim

³⁷ Yisraelfoɛ tu fili Ramese bɛhɔle Sukote. Mmienzua kɔyɛ apee ɛyaa nzia yeɛ bɛfale ase bɛhɔle ɔ; banga mmrasua ne ngwadaa bammoka so.

³⁸ Mmenia mvrafra pee koso ne bɛ hɔle, na nyɛmmoa pee paa boka so: mmoaen ne nandwie.

³⁹ Na mɔle kabrɛdi bɔ bɛ ne ye fili Misraim wale ne, bɛfa bɛyɔle taterɛ. Nna mɔle harewaa ɔ. Na ɔnate kyɛ betuli bɛ apereapereɛ so befili Misraim ne ati, bannya atee banyɔ aleɛ bɔ bekoli ye atunu ɔ.

⁴⁰ Yisraelfoɛ afoɛ bɔ belili wɔ Misraim te ɛyaa nna ne aburasa.

⁴¹ Na kyẽa bɔ afoɛ ɛyaa nna ne aburasa ne sone ne, AWURADE mmenia ne amukoraa tu fili Misraim aseɛ so.

⁴² Sɔ kɔngɔen ne, AWURADE lili Yisraelfoɛ nwo afofi, kyɛbɔ ɔkɔyɛ bɔ ɔkɔye bɛ kofi Misraim aseɛ so ɔ. Yiti odwu sɔ kyẽa ne kɔngɔen a, Yisraelfoɛ aworɛ ndoatoasoɛ amukoraa besili pɛ bɛfa bɛye AWURADE ayɛ.

Abɔtra ne nwo nhyehyɛleɛ

⁴³ Na AWURADE sele Mose ne Aarɔn kyɛ, “Abɔtra ne nwo nhyehyɛleɛ ɛhe: amanvraniɛ biala nni ye aleɛ ne bie.

⁴⁴ Nakoso kanganiɛ biala bɔ afa sikaa atɔ ye ne, ɛpɛ ye bienzua de a, ɔkora di bie.

⁴⁵ Ɛwɔfoɛ bɔ ɔne ɛmɔ baatena anaa paaniɛ biala nni bie.

⁴⁶ Awuro ko anu ala yeɛ odi kyɛ ɛmɔtena bedi ɔ; nnɛma ɛmɔfa naen ne bie befite aluo, yeɛ nnɛma ɛmɔbɔ ye bowue nu.

⁴⁷ Ɔsɛ kyɛ Yisraelfoɛ mukoraati bedi sɔ aluolue ne.

⁴⁸ Na sɛ ɛwɔfoɛ bie ɔne wɔ yeɛ bɛte ɔ, ná okuro kyɛ odi Abɔtra aluolue ne ɔye AWURADE ayɛ a, ye de maa bɛpɛ ye nwo ama mmienzua mukoraa bɛ bienzua, amaa wanya ye nwo ate wali bie. Ɛhe kɔmaa ɔkɔyɛ kyɛ maen ne anu niɛ; nakoso bɔ bɛppɛle ye bienzua ne de, ɔnzɛ kyɛ odi bie.

⁴⁹ Mmeraa komapɛ bɔ ɔwɔ berɛ ma maen mmaa ne, ye ala yeɛ ɔwɔ berɛ ma ɛwɔfoɛ bɔ ɔne ɛmɔ baatena ɔ.”

⁵⁰ Yiti Yisraelfoɛ amukoraa yɔle kyɛbɔ AWURADE hyɛle Mose ne Aarɔn ne ala.

⁵¹ Na AWURADE yele Yisraelfoɛ ɛlɔen kure kure ne fili Misraim aseɛ so sɔ kyẽa ne.