Ɛksadɔso 11 - AHYERƐLƐ KRONGRON

Amaneɛ piri bɔ ɔpɛ ye bo ɔ

¹ AWURADE sele Mose kyɛ, “Waha amaneɛ pirikua ko bɔ mebaafa meto Faro ne Misraim so ɔ. Ɛhe asi ye, ɔkɔmaa ɛmɔkofi wa bɛkɔhɔ, na sɛ ɔma ɛmɔ ate a, ɔkɔfoa ɛmɔ maa ɛmɔkofi wa.

² Afei, bɔ wɔ mmenia nemɔ amaneɛ kyɛ, ɔsɛ kyɛ bienzua biala ne brasua biala obisa ɛdwetɛ ne sikaa kɔkorɛ mbembenanneɛ ofi obiɛngo Misraimniɛ berɛ.”

³ AWURADE mane Misraimfoɛ lole Yisraelfoɛ. Asa koso, né Mose te sona bɔ odi mu wɔ Misraim aseɛ so, wɔ Faro mbanyi mɔ ne maen ne nyunu.

⁴ Na Mose hane kyɛ, “AWURADE nwa nyoo: Ngɔɔnatenate Misraim kɔyɛ abunnamu;

⁵ na bamuɛbaa bienzua biala bɔ ɔwɔ Misraim aseɛ so kowu, fite Faro bamuɛbaa bienzua bɔ ɔtena ye bia so ɔ so, kodwu afaneɛ bɔ osi aburoo ɔ ɔwa so, ɔne nyɛmmoa mɔ bɛ bamuɛbaa mɔ so.

⁶ Na awuye piri paa bɔ bɛkɔbɔ ye wɔ Misraim aseɛ mukoraa so ne, ebie ossili le, yeɛ ebie koso ngosi ko.

⁷ Nakoso Yisraelfoɛ mɔ de, kyea po ongopo sona anaa kaka biala; amaa ɔnate so ɛmɔanwu ye kyɛ AWURADE ma nzonzoleɛ da Misraim ne Yisrael nu.

⁸ Na wɔ mbanyi hemɔ amukoraa bɛkɔwa me nyunu bekoobu ndwerɛ bɛkɔhã kyɛ, ‘Fi wa kɔ, ɛne wɔ mmenia bɔ beli wɔ si amukoraa!’ Na ɛhe asi ne, ngofi wa ngɔhɔ.” Afei Mose fɛle ɛyaa hahii fili Faro nyunu berɛ hɔle.

⁹ Na AWURADE sele Mose kyɛ, “Faro ngɔtɛ ɛmɔ so, na ɔnate so m’anwanwadeɛ kɔsone pee wɔ Misraim aseɛ so.”

¹⁰ Mose ne Aarɔn yɔle anwanwadeɛ he amukoraa wɔ Faro nyunu; AWURADE mane Faro bubuli mmakaa tuale ye so, na wamma Yisraelfoɛ ate ma bamvi ye aseɛ so bangɔ.