Ɛseta 9 - AHYERƐLƐ KRONGRON

Yudafoɛ tɔ bɛ pɔfoɛ mɔ so wereɛ

¹ Bosome bɔ ɔtɔ so buru ne nyɔ, bɔ oli Ada ne, ye kyẽa bɔ ɔtɔ so buru ne nza ne aso, bɔ né bɛbaafa Nana Ahasuro mmeraa ne ye krataa ne bɛyɔ adwuma ne, sɔ kyẽa ne ala yeɛ né Yudafoɛ bɛ pɔfoɛ mɔ batu basie berɛ kyɛ bekohũhũ Yudafoɛ ɔ. Nakoso wamma ye sɔ. Ɔyɛle kyẽa bɔ Yudafoɛ belili bɛ pɔfoɛ mɔ so ngonim ɔ.

² Yudafoɛ boaboale bɛ noa wɔ bɛ nguro nemɔ aso, wɔ Nana Ahasuro manzini ne amukoraa nu, kyɛ ebiala bɔ ɔkɔwa kyɛ ɔbaahu bɛ ne, bɛ koso bekohu ye. Na ebiala angora wangyina bɛ nyunu, ofikyɛ bɛ nwo suronyi tɔle amaen maen nemɔ nu mmenia so.

³ Manzini nemɔ anu mbanyi ne mbɔtam mbanyi ne amrado mɔ ne ahemvie mbanyi gyinane Yudafoɛ si, ofikyɛ Modekae nwo suronyi tɔle bɛ so.

⁴ Ɔwale ye sɔ, ofikyɛ Modekae nyane tumi wɔ ahemvie berɛ, ye dumaa trɛle hɔle manzini ne amukoraa nu, na ɔhɔle so nyane tumi.

⁵ Yiti Yudafoɛ fale ngrandɛ behuhuni bɛ pɔfoɛ mɔ amukoraa, bɛpepɛle bɛ, benuane bɛ boso, na bɔ bekuro biala, bɛfa bɛyɔle bɛ pɔfoɛ mɔ.

⁶ Susa ahenguro berɛ, Yudafoɛ huhuni mmenia ɛyaa nnu benuane bɛ boso.

⁷ Behuhuni Pasandata, Dafon, Asepata,

⁸ Porata, Adalia, Aridata,

⁹ Pamaseta, Arisae, Aridae ne Wayisata koso.

¹⁰ Hamedata awa Haman bɔ ɔpɔ Yudafoɛ ne, ye mma mmienzua buru mɔ ɛne, nakoso bɛ nningyein de, bamva bɛ sa banga ye.

¹¹ Sɔ kyẽa ne, mmenia somaa bɔ behuni bɛ wɔ Susa ahenguro berɛ ne, bɛfale ye nwo amaneɛ bɛɛbɔle Nana Ahasuro.

¹² Na Nana Ahasuro sele Nana hemmaa Ɛseta kyɛ, “Susa ahenguro wa, Yudafoɛ bahuhu mmienzua ɛyaa nnu, yeɛ basa bahu Haman mma mmienzua buru nemɔ. Né nzaade bɔ bayɔ ye wɔ me manzini ngaa nemɔ anu ne, ɔkɔtra so. Kekesaala ye, nzikyɛ yeɛ ɔte w’abisadeɛ ɔ? Ka, na ngɔfa ngɔma wɔ. Nzikyɛ bieku yeɛ ɛpena ɔ? Wɔ sa kɔha ye.”

¹³ Na Ɛseta buale kyɛ, “Nana, sɛ ɛkɔpene a, Yudafoɛ bɔ bɛwɔ Susa ne, ɛhema koso ma bɛ ate ma besa bɛyɔ bɔ bagyina mmeraa ne aso bayɔ ye ɛnɛ ne. Haman mma mmienzua buru nemɔ koso, maa besinze bɛ fuin nemɔ wɔ bakaa so.”

¹⁴ Na Nana Ahasuro fale ahyɛdeɛ mane kyɛ bɛyɔ sɔ. Ɔhyɛle mmeraa wɔ Susa, na besinzele Haman mma mmienzua buru nemɔ bɛ fuin.

¹⁵ Bosome bɔ oli Ada ne, ye kyẽa bɔ ɔtɔ so buru ne nna ne, Yudafoɛ bɔ bɛwɔ Susa ne boale bɛ noa bieku, na behuhuni mmenia ɛyaa nza wɔ Susa, nakoso bɛ nningyein de, bamva bɛ sa banga ye.

¹⁶ Yudafoɛ ngaa bɔ bɛwɔ Nana Ahasuro manzini nemɔ anu ne, né bɛ koso baboa bɛ noa baho bapere bɛ ti ngoa, bɔ bɛ nwo atɔ bɛ wɔ bɛ pɔfoɛ mɔ sa nu ɔ, na behuhuni bɛ pɔfoɛ apee aburasoo ne nnu. Nakoso bɛ nningyein de, bamva bɛ sa banga ye.

¹⁷ Bosome bɔ oli Ada ne, ye kyẽa bɔ ɔtɔ so buru ne nza ne yeɛ sɔ dwirɛ ne sili ɔ. Sɔ bosome ne, ye kyẽa bɔ ɔtɔ so buru ne nna ne, belele bɛ nwome, na bɛfa bɛkakyili ɛpoentolɛ ne anigye kyẽa.

¹⁸ Nakoso Yudafoɛ bɔ bɛwɔ Susa ne de, kyẽa bɔ ɔtɔ so buru ne nza, ɔne bɔ ɔtɔ so buru ne nna ne yeɛ bɛboaboale bɛ noa ɔ. Belele bɛ nwome kyẽa bɔ ɔtɔ so buru ne nnu ne, na bɛfa bɛkakyili ɛpoentolɛ ne anigye kyẽa.

¹⁹ Ye sɔ ne ati, Yudafoɛ bɔ bɛwɔ namue nemɔ anu, bɔ fasue nne bɛ nguro nemɔ anwo ne, batu bosome Ada, ye kyẽa bɔ ɔtɔ so buru ne nna ne basie berɛ kyɛ ɔte anigye ne ɛpoentolɛ kyẽa, na ɔte nwomelelɛ kyẽa bɔ bɛkyekyɛ bɛ nwo bɛ nwo aleɛ ɔ.

²⁰ Modekae hyerɛle edwirɛ bɔ osisili ne, na ɔmaa bɛfale ngrataa bɛɛmane Yudafoɛ amukoraa bɔ bepingye, ɔne bɛ bɔ bɛwɔ dedeede, bɔ bɛwɔ Nana Ahasuro manzini amukoraa nu ɔ.

²¹ Ɔnwa, odi kyɛ betu bosome Ada, ye kyẽa bɔ ɔtɔ so buru ne nna, ɔne bɔ ɔtɔ so buru ne nnu ne besie berɛ afoɛnoa biala,

²² kyɛ bɛte ngyẽa bɔ Yudafoɛ bɛperele benyane asomdwee befili bɛ pɔfoɛ mɔ sa nu ɔ, kyɛ ɔte bosome bɔ b’aworabɔlɛ kakyili anigye, bɔ b’esuɛ kakyili nwomelelɛ ɔ. Ɔnwa, odi kyɛ betu besie berɛ bɛfa bɛyɛ ɛpoentolɛ ne anigye ngyẽa, ngyẽa bɔ bɛkɔhyehyɛ bɛ nwo bɛ nwo aleɛ, ná bahyɛ ehiafoɛ mɔ koso nningyein ɔ.

²³ Yiti Modekae nhyehyɛleɛ bɔ ɔhyerɛ ɔɔmane Yudafoɛ ne, bɛfa bɛfoale bɔ né bahyɛ ye bo bɛyɔ ne aso maa ɔɔyɛle b’amammerɛ.

²⁴ Ɔhyerɛle kyɛ, Agaginiɛ Hamedata ɔwa Haman bɔ ɔpɔ Yudafoɛ amukoraa ne, ɔbɔle porɛ kyɛ okonua Yudafoɛ bɛ boso. Oguale serewa bɔ bɛfrɛ ye ‘Pure’ ne, kyɛ okoli bɛ so ngonim ná wanua bɛ boso.

²⁵ Nakoso mmerɛ bɔ Ɛseta hɔle Nana Ahasuro nyunu nen, Nana Ahasuro hyɛle mmeraa maa bɛhyerɛle, kyɛ Yudafoɛ ti so porɛ bɔ Haman wabɔ ne, odi kyɛ ɔbɔ ye bɔbɔ ye ti so. Na odi kyɛ besinze ye ne ye mma mmienzua nemɔ wɔ bakaa so.

²⁶ Ye sɔ ne ati, bɛfrɛ sɔ ngyẽa ne Purim, bɔ benya befili edwofua Pure nu ɔ. Ɔnate Modekae krataa ne anu dwirɛ amukoraa so, yeɛ tebea bɔ bɛhɔle nu wɔ sɔ dwirɛ ye anwo, ɔne edwirɛ bɔ ɔtole bɛ ne ati,

²⁷ Yudafoɛ le tole nu, na ɔyɛle amammerɛ mane bɛ ne bɛ bosofoɛ ne ebiala bɔ ɔɔyɛle Yudaniɛ ɔ, kyɛ sɔ ngyẽa nyɔ ne, bɛngɔma ɔngɔpa ye nwo, na bɛkɔhɔ so bekoli ye afoɛnoa biala, wɔ mmerɛ bɔ bahyɛ bato berɛ ne anu, kyɛbɔ bahyerɛ bato berɛ ne.

²⁸ Ye sɔ ne ati, odi kyɛ bɛkaye sɔ ngyẽa ne, ná bedi ye aworɛ ndoatoasoɛ ne abusua ne manzini ne kuro biala nu. Na sɔ Purim aluolue ngyẽa nemɔ, onni kyɛ bɛyakyi bɛ lilɛ le wɔ Yudafoɛ nu, yeɛ bɛ bosofoɛ koso, onni kyɛ bɛ wora fi ye lilɛ le.

²⁹ Nana hemmaa Ɛseta bɔ ɔse ole Abihail ne, ogyinane tumi so hyerɛle krataa bɔ ɔtɔ so nyɔ ɔ, kyɛ odi kyɛ bedi Purim aluolue ne, na ɔfa foale Yudaniɛ Modekae krataa ne aso.

³⁰ Yudafoɛ amukoraa bɔ bɛwɔ Nana Ahasuro manzini ɛyaa ko aburanyɔ ne nzoo nemɔ anu ne, bɛsomane maa bɛfale ngrataa bɔ asomdwee ne bɛ nwo waenbɔlɛ dwirɛ wɔ nu ɔ bɛɛmane bɛ.

³¹ Na ngrataa ne hyɛle bɛ kyɛ, odi kyɛ bedi Purim ngyẽa ne wɔ mmerɛ bɔ bahyehyɛ bato berɛ ɔ nu, kyɛbɔ Yudaniɛ Modekae ne Nana hemmaa Ɛseta bɛhyɛle Yudafoɛ kyɛ bɛyɔ ne ala, kyɛbɔ bale bato nu kyɛ bɛ ne bɛ bosofoɛ bekoli mmuadaa ne awuyebɔlɛ mmerɛ nwo nhyehyɛleɛ ne aso ne.

³² Na mmeraa bɔ Nana hemmaa Ɛseta hyɛle ne, ɔmane Purim nwo nhyehyɛleɛ ne timuni, na bɛhyerɛ bɛtole berɛ.