Ɛseta 8 - AHYERƐLƐ KRONGRON

Yudafoɛ nya bɛ ti didi nu

¹ Sɔ kyẽa ne ala, Yudafoɛ bɛ pɔfoɛ Haman ye awuro ne, Nana Ahasuro fa mane Nana hemmaa Ɛseta. Na Modekae wale Nana nyunu, ofikyɛ né Ɛseta aha ahyire Nana kyɛ ye nwoniɛ ɛne.

² Afei Nana Ahasuro ye nzɔanoɛ pɛteaa bɔ ole fili Haman berɛ ne, ɔye fili ye bɔbɔ ye sa, na ɔfa mane Modekae. Na Ɛseta bɔle Modekae panyi wɔ Haman awuro ne aso.

³ Afei Ɛseta hɔle Nana Ahasuro nyunu bieku, ɔtole ye nwo yele ye gya bo, na ole esuɛ ɔkotole ye ɔfa tole ye nyunu kyɛ, Yudafoɛ nwo adwene tɛɛ bɔ Agaginiɛ Haman nyane ye, ɔne bɛ ti so porɛ bɔ ɔbɔle ne, ɔsrɛ ye ala, ɔ́pɛ nu.

⁴ Yeɛ Nana Ahasuro tengyɛle sikaa kɔkorɛ hɔtɔ ne wɔ Ɛseta so. Ɛseta dwɔso gyinane Nana Ahasuro nyunu berɛ,

⁵ na ɔhane kyɛ, “Nana, sɛ ɛpene so, sɛ anwu me anwumvoin a, Nana, sɛ ɛnea ná ɔte paa a, yeɛ sɛ masɔ wɔ nye a, ye de ngrataa bɔ Agaginiɛ Hamedata ɔwa Haman nyane adwene tɛɛ hyerɛle fa hyɛle mmeraa kyɛ behũ Yudafoɛ bɔ bɛwɔ wɔ manzini amukoraa nu ne, hyɛ mmeraa maa bɛpɛ nu.

⁶ Ofikyɛ, musue bɔ ɔbaato me mmenia ye mɔ ye, meyɛ sɛɛ né mahora mafa me nye manea? Yeɛ meyɛ sɛɛ né mahora mafa me nye manea me mmenia bɔ benua bɛ boso ɔ?”

⁷ Yeɛ Nana Ahasuro sele Nana hemmaa Ɛseta ne Yudaniɛ Modekae kyɛ, “Ɛ́mɔtie! Mafa Haman awuro mama Ɛseta, na babɔ ye kɔme wɔ bakaa ne aso, ofikyɛ ɔbɔle Yudafoɛ bɛ ti so porɛ kyɛ okohu bɛ.

⁸ Bɔ ɛmɔkuro biala, ɛmɔhyerɛ bɛfa Yudafoɛ nwo wɔ me, Nana Ahasuro me dumaa nu, ná ɛ́mɔfa me nzɔanoɛ kaa ne bɛsɔ krataa ne noa, ofikyɛ mmeraa bɔ bahyerɛ ye wɔ me, Nana Ahasuro me dumaa nu, bɔ bafa me nzɔanoɛ kaa basɔ ye noa ne, bɛkakyi ye a ɔnyɛ yé.”

⁹ Bosome nza bɔ yeɛ oli Siwan ne anu, ye kyẽa bɔ ɔtɔ so aburanyɔ ne nza ne, bɛfrɛfrɛle Nana Ahasuro ahyerɛlɛfoɛ maa beeyiale. Na edwirɛ biala bɔ Modekae hane ne, bɛhyerɛle maa ɔyɛle mmeraa, na bɛfa bɛɛmane Yudafoɛ, mbɔtam mbanyi, amrado mɔ ne manzini mbanyi bɔ bɛwɔ manzini ɛyaa ko aburanyɔ ne nzoo ne anu, fite Yindia bɔ ɔkwaadwu Yitiopia. Manzini biala, kyɛbɔ ye ahyerɛlɛ te ne, yeɛ mmenia biala, kyɛbɔ bɛ dwudwolɛ te ne, sɔ ala yeɛ bɛhyerɛle krataa ne ɔ, na bɔ bɛfa bɛɛmane Yudafoɛ ne koso, ɔte b’ahyerɛlɛ ne bɛ dwudwolɛ.

¹⁰ Modekae maa bɛhyerɛle ngrataa nemɔ Nana Ahasuro dumaa nu, ɔfale Nana Ahasuro nzɔanoɛ kaa sosɔle bɛ noa, ɔfa somane mmenia bɔ bɛ nwo yɛ nyera, bɔ bɛtenatenane mbɔngɔ bɔ bɛ nwo yɛ nyera ɔ so. Né ahemvie adwuma ti yeɛ bɛhyɛ da besie sɔ mbɔngɔ nemɔ ɔ.

¹¹ Sɔ ngrataa ne anu, Nana Ahasuro fale tumi wurale Yudafoɛ bɔ bɛwɔ kuro biala so ɔ sa, kyɛ bɛha bɛ nwo bɛbɔ nu, ná bɛho bɛpere bɛ ti ngoa. Ɔnwa, sɛ maen anaa manzini biala fa koɛ batoa bɛ a, wama bɛ tumi kyɛ bɛkɔhora bekoli sɔ mmenia nemɔ awue, bekohu bɛ, bekonua bɛ ne bɛ mmrasua ne bɛ mma mɔ boso, ɔne kyɛ bɛkɔfẽ bɛ nningyein bɛkɔfa ɔ.

¹² Mmeraa bɔ bɛhyɛle, bɔ betuli kyẽa ko besiele berɛ kyɛ ahaa bekohu Yudafoɛ wɔ Nana Ahasuro manzini amukoraa nu, bɔ ɔte kyẽa bɔ ɔtɔ so buru ne nza, wɔ bosome bɔ ɔtɔ so buru ne nyɔ bɔ oli Ada ne anu ne, mmeraa foforɛ tuli sɔ mmeraa daa ne guale.

¹³ Sɔ krataa ne mane Yudafoɛ ate kyɛ bɛkora bɛfa nu dwirɛ bɛhyɛ mmeraa wɔ manzini amukoraa nu, ɔne kyɛ bɛkora bɛbɔ ye nwo dawure bekyire maen maen amukoraa so mmenia. Osa ma Yudafoɛ ate kyɛ bɛboaboa bɛ nwo bɛtɔ bɛ pɔfoɛ mɔ so wereɛ sɔ kyẽa ne.

¹⁴ Yiti ɛbɔfoɛ anwonyeralɛfoɛ nemɔ, bɛtenatenane ahemvie mbɔngɔ bɔ bɛ nwo yɛ nyera ɔ so. Na begyinane Nana Ahasuro mmeraa ne aso besili nu bɛhɔle ndɛndɛ. Susa ahemvie berɛ yeɛ bɛhyɛle sɔ mmeraa ne ɔ.

¹⁵ Afei Modekae fili Nana Ahasuro berɛ fitele. Né owura ahemvo ataadeɛ bɔ ɔte bibire ne fufue, nwera ne koogyan aguasoɛ, na né ɔbɔ sikaa kɔkorɛ abotire. Na Susa kuro berɛ ama bɔle ese belili ahurusi.

¹⁶ Na ɛhe yɛle Yudafoɛ bɛ ti ngoa, anwosɛpɛ, anigye ne animnyam.

¹⁷ Manzini biala nu ne kuro biala so bɔ Nana Ahasuro mmeraa ne ahyɛdeɛ ne oodwuli ne, Yudafoɛ nyane anwosɛpɛ ne anigye, bɛtole poen, na belili afofi. Yeɛ maen maen mɔ bɔ bɛwɔ aseɛ ne aso ne, Yudafoɛ nwo suronyi tɔle bɛ nu pee so, yiti bɛ nu pee bɛɛyɛle Yudafoɛ.