Ɛseta 5 - AHYERƐLƐ KRONGRON

Ɛseta kɔ Nana Ahasuro nyunu

¹ Ye ɛlɛsa ne aso, Ɛseta wurale ye ɛhemmaa ndaadeɛ, na oogyinane ahemvie ne akunu dɔ, wɔ Nana Ahasuro asaso ndendeneɛ so. Né Nana Ahasuro ɔte ye ahennie bia so wɔ ahemvie berɛ, wɔ ahemvie anoa ne ndendeneɛ so.

² Nana Ahasuro nwuni Nana hemmaa Ɛseta kyɛ ogyi ahemvie ne akunu berɛ pɛ, ye nwo yɛle ye ahomeka, na ɔtengyɛle sikaa kɔkorɛ hɔtɔ bɔ otira ye ne wɔ Ɛseta so. Ɛseta pingyele ye nwo berɛ, na ɔfale ye sa hane ɛhɔtɔ ne ti.

³ Yeɛ Nana Ahasuro bisale ye kyɛ, “Nana hemmaa Ɛseta, nzu ɔ? Nzikyɛ yeɛ ɛpena ɔ? Sɛ m’ahennie ye bue po a, ngɔfa ngɔma wɔ.”

⁴ Na Ɛseta buale kyɛ, “Nana, mato poen mama wɔ, na sɛ ɛkɔpene so a, Nana, ɛne Haman bɛbra ye bo ɛnɛ.”

⁵ Yeɛ Nana Ahasuro sele kyɛ, “Ɛmɔhã bɛ nwo bɛɛfa Haman bɛbra ma yɛyɔ Ɛseta apɛdeɛ yɛma ye.” Yiti Nana Ahasuro ne Haman bɛhɔle ɛpoen bɔ Ɛseta ato ne abo.

⁶ Bɛwɔ so bɛno nzaa nen, Nana Ahasuro bisale Ɛseta kyɛ, “W’abisadeɛ ne ole nzu? Ka, na ngɔfa ngɔma wɔ. Nzu yeɛ ɛpena ɔ? Sɛ m’ahennie ye bue po a, wɔ sa kɔha ye.”

⁷ Yeɛ Ɛseta buale kyɛ, “M’abisadeɛ, ɔne bɔ mepena ole kyɛ,

⁸ Nana, sɛ anwu me anwumvoin a, yeɛ sɛ ɛpene so kyɛ ɛkɔyɔ m’abisadeɛ kɔma me, ɔne kyɛ ɛkɔma me sa kɔha bɔ mepena ɔ de a, ye de, Nana, ɛpoen bieku bɔ ɛhema ngɔto ngɔma wɔ ne Haman ne, mesrɛ wɔ ala, ɛmɔbra ye bo, na ngɔfa me dwirɛ ne ngɔto wɔ nyunu.”

Haman bɔ Modekae ti so porɛ

⁹ Sɔ kyẽa ne, Haman fili ɛpoentolɛ ne abo bɔ né ye nye agye, bɔ ye ti anu ayɛ ye fɛfɛɛfɛ ɔ. Nakoso Haman oonwuni Modekae wɔ ahemvie anyunu berɛ, bɔ Modekae wandwɔso, ná afei koso wangyire kyɛ osuro Haman nen, ye ahone huli Modekae paa.

¹⁰ Nakoso Haman hyɛle ye nwo so, na osili nu hɔle ye awuro. Yeɛ ɔsomane maa bɛɛfrɛfrɛle ye damvo mɔ ne ɔye Sɛrese bɛwale.

¹¹ Haman hane sɔ dwirɛ hemɔ hyirele bɛ: ye nwo bɔ wanya ye paa ɔ, ye mma somaa bɔ wawo bɛ ɔ, ye aba so bɔ Nana Ahasuro wabɔ amukoraa, ɔne kyɛbɔ Nana Ahasuro wasi wapagya ye dibea maa watra ye mbanyi mɔ ne ye somvoɛ mɔ ɔ.

¹² Haman toale so hane kyɛ, “Nna ye mu ɛne. Nana hemmaa Ɛseta ɛpoen bɔ ɔtole ne po, wamma ebiala ammoka Nana Ahasuro so ɔne ye bangɔ ye bo, sana me ngome. Wasa wato ye sa wafrɛ me ne Nana Ahasuro kyɛ yɛbra ɛpoentolɛ bo ɛhema koso.

¹³ Nakoso ɛhe amukoraa ɔnyɛ me fɛ, wɔ mmerɛ biala bɔ menwu Yudaniɛ Modekae kyɛ ɔte ahemvie anoa nu berɛ ɔ.”

¹⁴ Yeɛ ɔye Sɛrese ne ye damvo nemɔ amukoraa besele ye kyɛ, “Maa bɛfa bakaa bɔ ye tendenn te agyirɛ aburannu ɔ bɛpena berɛ, ná ka kyire Nana Ahasuro ɛhema ngyerɛmɔ, kyɛ ɔma bɛbɔ Modekae kɔme wɔ so. Na afei fa anigye ɛne Nana bɛhɔ ɛpoentolɛ ne abo.” Sɔ nzusuleɛ ne yɛle Haman fɛ, na ɔmaa bɛfale bakaa ne bɛpenane berɛ.