Ɛseta 4 - AHYERƐLƐ KRONGRON

Ɛseta boka ye mmenia

¹ Modekae tele edwirɛ bɔ wasi ne amukoraa nen, osunzuale ye ndaadeɛ nu, ɔherale ɛsɛen tena, ɔfale nzoen yɛle ye nwo, na ole esuɛ ne awuyebɔlɛ hyinini kuro ne anu.

² Ɔhɔle alaa oodwuli ahemvie anoa nu berɛ, ofikyɛ né mmeraa mma ate mma ebiala ngera ɛsɛen tena onwura ahemvie berɛ.

³ Manzini ne amukoraa nu, nekaa biala bɔ Nana Ahasuro mmeraa bɔ wahyɛ ne oodwuli ne, Yudafoɛ nemɔ bɔle awuye belili aworabɔlɛ ne mmuadaa, na bɛ nu pee herale ɛsɛen tena bɛfale nzoen bɛyɛle bɛ nwo.

⁴ Yeɛ Nana hemmaa Ɛseta abaawa nemɔ ne ye sayɛɛ nemɔ bɛɛbɔle ye amaneɛ, na edwirɛ ne hale Ɛseta paa. Yiti ɔmaa bɛfale ndaadeɛ bɛɛmane Modekae, kyɛ ɔpa ɛsɛen tena ne ogua dɔ, ná ɔfa ndaadeɛ ne owura, nakoso wanne ndaadeɛ ne.

⁵ Afei Ɛseta maa bɛɛfrɛle Hatake bɛbrɛle ye. Ɔte Nana Ahasuro sayɛɛ nemɔ ko bɔ baye ye kyɛ ɔso Ɛseta ɔ. Na Ɛseta somane ye kyɛ ɔhɔ Modekae berɛ oobisa ye edwirɛ horɛ bɔ wasi ɔ, ɔne kyɛbɔ ɔyɛle bɔ osili ɔ.

⁶ Hatake hɔle Modekae berɛ wɔ kuro berɛ dwaa ne aso, wɔ ahemvie anyunu berɛ.

⁷ Na Modekae hane edwirɛ bɔ wato ye amukoraa hyirele ye. Yeɛ sikaa somaa bɔ Haman ahyɛ ye nwo bɔ kyɛ okotua kɔto Nana Ahasuro fotoɛ nu maa bekonua Yudafoɛ boso ne koso, ɔha hyirele ye.

⁸ Mmeraa bɔ bɛhyɛle, bɔ bɛhyerɛle ye wɔ Susa kyɛ begyina so behũhũ Yudafoɛ ne, Modekae fale sɔ krataa ne bie mane Hatake. Ɔnwa ɔɔfa hyire Ɛseta, ohyirehyire edwirɛ ne anu hyire ye, ná ɔha hyire ye kyɛ ɔhɔ Nana Ahasuro berɛ ɔɔpa ye kyerɛ, ná ɔsrɛ ma ye, Ɛseta ye mmenia.

⁹ Hatake fale bɔ Modekae hane ne ɔɔbɔle Ɛseta amaneɛ.

¹⁰ Yeɛ Ɛseta fale ngraa he somane Hatake kyɛ ɔɔfa ma Modekae:

¹¹ “Nana somvoɛ amukoraa, yeɛ ye manzini nemɔ nu ama bɛse kyɛ, sɛ Nana wando ye sa wamvrɛ wɔ, ná ɛkɔ ye nyunu wɔ ahemvie ne akunu dɔ a, kyɛ bienzua oo, anaa brasua oo, ye nwo mmeraa te komapɛ, bekohu sɔ sona ne. Sana sona bɔ Nana konwu ye anwumvoin kɔfa ye sikaa kɔkorɛ hɔtɔ kɔtengyɛ ye so ne, ye yeɛ okonya ye ti okodidi nu ɔ. Eleburasa ɛhe, ɔffrɛle me kyɛ mmra ye nyunu.”

¹² Bɛfale bɔ Ɛseta hane ne bɛɛbɔle Modekae amaneɛ nen,

¹³ Modekae koso fale ngraa maa bɛɛmane Ɛseta kyɛ, “Nnɛdwene kyɛ ɛwɔ ahemvie berɛ ne ati, sɛ beku Yudafoɛ amukoraa a, wɔ de ekonya wɔ ti kodidi nu.

¹⁴ Ofikyɛ sɛ ɛkã wɔ noa to nu wɔ mmerɛ bɔ ɔte sɔaa nu a, mmokalɛ ne ngoalelɛ kofi neka foforɛ kɔwa kɔma Yudafoɛ, nakoso ɛne ɛse abusuafoɛ de, ɛmɔ boso konua. Nwa yeɛ ɔse ɔ? Ebiaa mmerɛ bɔ ɔte sɔaa ati yeɛ anya ɛhemmaa dibea ye ɔ.”

¹⁵ Na Ɛseta fale mmuayɛɛ maa bɛɛmane Modekae kyɛ,

¹⁶ “Kɔboaboa Yudafoɛ bɔ bɛwɔ Susa mukoraa noa, ná ɛ́mɔgyina me gya nu bɛyɛ akɔngyere. Nnɛma ɛmɔdidi, yeɛ nnɛma ɛmɔno hwee, eyia ne kɔngɔen sɔ alaa ɛlɛsa. Me koso, me ne m’abaawa nemɔ yɛkɔyɔ sɔ ala. Ye si ye, ngɔhɔ Nana nyunu, ɔwɔ nu kyɛ otia mmeraa de, na sɛ ɔba kyɛ nwu a, maa nwu.”

¹⁷ Na Modekae hɔle ɔɔyɔle nikyee biala, kyɛbɔ Ɛseta hane kyɛ ɔyɔ ne ala.