Ɛseta 3 - AHYERƐLƐ KRONGRON

Haman bɔ Yudafoɛ ti so porɛ

¹ Nziɛ ye, Nana Ahasuro bɔle Agaginiɛ Hamedata ɔwa Haman aba so. Ɔbɔle ye panyi, na ɔpagyale ye dibea maa ɔtrale ye mmango mbanyi ne amukoraa.

² Nana Ahasuro somvoɛ amukoraa bɔ bɛwɔ ahemvie anoa nu berɛ ne, né ɔyɛ a bɛkoto Haman bɛfa anidie bɛma ye, ofikyɛ né Nana Ahasuro ahyɛ kyɛ bɛyɔ sɔ bɛma ye. Nakoso Modekae de, wangoto ye, yeɛ wammɔ ye ti ase wamma ye.

³ Yeɛ Nana Ahasuro somvoɛ mɔ bɔ bɛwɔ ahemvie anoa nu berɛ ne bebisale Modekae kyɛ, “Nzu ati yeɛ wɔ de, ebu Nana mmeraa so ye?”

⁴ Bebisale ye daa biala, nakoso ɔyɛle ye adwene kyɛ ɔngɔyɔ bɔ bɛka ne. Yiti bɛbɔle Haman amaneɛ bɛneane, sɛ Modekae kɔhɔ so kɔyɔ sɔ a, ofikyɛ né Modekae aha ahyire bɛ kyɛ ɔte Yudaniɛ.

⁵ Haman nwuni kyɛ Modekae ngoto ye mmɔ ye ti ase mma ye nen, Haman ahone huli.

⁶ Né baha maen horɛ bɔ Modekae fi nu ɔ bahyire Haman, yiti Haman anguro kyɛ okohu ye ngome ɔ. Na mmom Haman bɔle porɛ kyɛ, Modekae aliɛma mɔ Yudafoɛ amukoraa bɔ bɛwɔ Ahasuro ahennie nu ne, okonua bɛ boso.

⁷ Nana Ahasuro lili bia ne, ye afoɛ buru ne nyɔ ne anu, bosome bɔ oli moa, bɔ bɛfrɛ ye Nisan ne anu, beguale serewa wɔ Haman nyunu. Bɛfrɛ serewagualɛ ne Pure. Bɛfa bɛpenane kyẽa ne bosome bɔ ɔkɔfa konua Yudafoɛ boso ɔ. Na serewagualɛ ne yele kyẽa bɔ ɔtɔ so buru ne nza wɔ bosome bɔ ɔtɔ so buru ne nyɔ bɔ bɛfrɛ ye Ada ne.

⁸ Yeɛ Haman sele Nana Ahasuro kyɛ, “Manzini amukoraa bɔ bɛwɔ w’ahennie ye anu ye, nu mmenia ne, bɛ nu biemɔ wɔ nu bɔ bɛwɔ manzini nemɔ nu nekaa biala, bɔ bɛ suban te sonongo ɔ. Asora bɛ mmeraa, yeɛ asora mmenia ngaa nemɔ koso bɛ deɛ. Nana, benni wɔ mmeraa so. Nana, ɔtte mayee kyɛ ɛkɔyakyi bɛ maa bɛkɔyɔ sɔ ɔ.

⁹ Nana, sɛ ɛkɔpene so a, maa bɛhyɛ mmeraa kyɛ odi kyɛ benua bɛ boso; na Nana, ngotua ɛdwetɛ talɛnde apee buru ngɔma bɛ bɔ bɛnea w’adwuma so ne maa bɛkɔfa bekogua wɔ fotoɛ nu.”

¹⁰ Yeɛ Nana Ahasuro yele ye nzɔanoɛ pɛteaa fili ye sa, na ɔfa mane Agaginiɛ Hamedata ɔwa Haman bɔ ɔpɔ Yudafoɛ ne.

¹¹ Na Nana Ahasuro sele Haman kyɛ, “Sikaa ne wura wɔ sa, yeɛ mmenia ne koso bewura wɔ sa. Bɔ ekuro biala, fa yɔ bɛ.”

¹² Bosome bɔ oli moa ne, ye kyẽa bɔ ɔtɔ so buru ne nza ne, bɛfrɛfrɛle Nana Ahasuro ahyerɛlɛfoɛ amukoraa maa beyiale, na bɛhyerɛle maa ɔyɛle mmeraa, kyɛbɔ Haman hyɛle kyɛ bɛyɔ ne ala. Na bɛfa bɛɛmane Nana Ahasuro mbɔtam mbanyi mɔ, amrado mɔ, maen maen nemɔ so mbanyi mɔ, manzini biala, kyɛbɔ ye ahyerɛlɛ ne nu mmenia dwudwolɛ si te ne, sɔ ala yeɛ bɛhyerɛle ye ɔ. Bɛhyerɛle ye Nana Ahasuro dumaa nu, na bɛfale ye nzɔanoɛ pɛteaa bɛsɔle ye noa.

¹³ Bɛfale ngrataa nemɔ bɛsomane mmenia bɔ bɛ nwo yɛ nyera ɔ maa bɛfa bɛhɔle Nana Ahasuro manzini ne amukoraa nu. Nu dwirɛ kyire kyɛ, beli Yudafoɛ awue, behũ bɛ ná benua bɛ mukoraa bɛ boso: mmerandeɛ ne mbanyi, mmrasua ne ngwadaa ɛlɛhomapɛ, bɔ sɔ kyẽa ne te kyẽa bɔ ɔtɔ so buru ne nza wɔ bosome buru ne nyɔ, bɔ ye ole Ada ne anu. Osa ka kyɛ bɛfẽ bɛ nningyein bɛfa.

¹⁴ Krataa ne nwa, ɔsɛ kyɛ bɛbɔ sɔ mmeraa ne nwo dawure wɔ manzini biala nu, amaa mmenia aboa bɛ nwo banwondɛ sɔ kyẽa ne.

¹⁵ Kyɛbɔ Nana Ahasuro hyɛle mmeraa nen, ɛbɔfoɛ nemɔ hane bɛ nwo bɛhɔle ndɛndɛ; yeɛ mmeraa nemɔ koso bɛbɔle ye nwo dawure wɔ Susa ahenguro. Afei Nana Ahasuro ne Haman bɛtenane ase bɛnone nzaa, wɔ aberɛ bɔ né Susa kuro ne anu ama bɛ nwo adwiri bɛ ɔ.