Ɛseta 2 - AHYERƐLƐ KRONGRON

Bɛfa Ɛseta besi hemmaa

¹ Sɔ dwirɛ nemɔ asi ne, bɔ Nana Ahasuro ahone tɔle nzue nu ne, ɔkayele Wasiti ne nikyee bɔ wayɔ ne, ɔne mmeraa bɔ wahyɛ wafa ye nwo ne.

² Na Nana Ahasuro somvoɛ mɔ bɔ bepingye ye paa ne sele ye kyɛ, “Nana, maa bɛpena mmabunu bɔ bɛ nwo yɛ nyemene ɔ bɛma wɔ.

³ Nana, manzini amukoraa bɔ bɛwɔ w’ahennie nu ne, tu mbanyi sie berɛ maa bɛboaboa mmabunu anwonyemene amukoraa noa. Maa bɛfa bɛ bɛbra Susa ahemvie mmraanu berɛ. Nana, wɔ sayɛɛ Hegae bɔ ɔnea mmrasua so ne, maa bɛfa bɛ bewura ye sa, ná maa ɔma bɛ sakyeɛ mɔ bɔ bɛkɔfa bɛkɔpopa ɔ.

⁴ Nana, taluwa bɔ ye nwo kɔyɛ wɔ nyemene paa ne, maa oli hemmaa osi Wasiti gya nu.” Sɔ nzusuleɛ ne yɛle Nana Ahasuro fɛ, na ɔyɔle sɔ ala.

⁵ Né Yudaniɛ bie wɔ Susa ahenguro berɛ. Ɔte Benyaminniɛ bɔ ye dumaa li Modekae. Ɔse ole Yari bɔ ofi Simei abusua nu, bɔ ye koso ofi Kise abusua nu ne.

⁶ Mmerɛ bɔ Babilɔn hene Nebukadenesa ɔhyele Yuda hene Yekonia nnure, ná ɔsesale ye ne mmenia bɔ wahye bɛ nnure ne fili Yerusalem hɔle ne, né Modekae boka so.

⁷ Modekae yeɛ ɔtetele ye baba aliɛma awa brasua Hadasa bɔ osa li Ɛseta ne ɔ, ofikyɛ né sɔ taluwa ne olle niɛ ne seɛ. Né anwonyemene abia ye. Oni ne ɔse bewuli ne yeɛ Modekae fale ye yɛle ɔwa ɔ.

⁸ Mmerɛ bɔ bɛbɔle Nana Ahasuro noa dwirɛ ne ye mmeraa nwo dawure, bɔ bɛboaboale ndaluwa pee noa wɔ Susa ahemvie bɛfale bɛ bewurale Hegae sa ne, Ɛseta koso bɛfale ye bɛhɔle Nana Ahasuro ahemvie berɛ bie, na bɛfale ye bewurale Hegae bɔ ɔnea mmrasua so ne sa.

⁹ Taluwa Ɛseta sɔle Hegae nye, na Hegae lole ye. Ɔyɛle ndɛndɛ fale Ɛseta sakyeɛ mɔ bɔ ɔfa popa ɔ ɔne ye aleɛ mane ye. Osa neaneane Nana Ahasuro abaawa nemɔ nu yele nu nzoo kyɛ bɛso Ɛseta, na ɔmaa ɔne ye abaawa nemɔ bɛɛtenane nekaa paa paa wɔ mmraanu berɛ.

¹⁰ Ɛseta anna ye maen anaa ye abusua ali wangyire ebiala, ofikyɛ né Modekae abɔ ye noa kyɛ nnɛmaa ɔka.

¹¹ Alehyeleɛ biala, né ɔyɛ a Modekae di mmraanu anyunu berɛ akɔneaba ɔnea kyɛbɔ Ɛseta nwo si te ɔ, ɔne sɛ ebiaa edwirɛ bie ato ye a.

¹² Bosome buru ne nyɔ ne sone, kyɛbɔ mmrasua nemɔ bɛ nwo siesielɛ amammerɛ ɔte ne. Mmerɛ somaa bɔ né bɛfa besiesie bɛ nwo hɔ ɛne. Bɛbobɔ bɛ korobo bosome nzia, yeɛ bɛfa mmrasua sakyeɛfona bɛyɛ bɛ nwo bosome nzia. Sɔ mmerɛ ne sone ne, odwuli taluwa biala so kyɛ odi kyɛ ɔfa ye anwonyemene kokyire Nana Ahasuro.

¹³ Sɛ odwu taluwa biala so kyɛ ɔkɔ Nana Ahasuro nyunu a, nikyee biala bɔ okuro kyɛ ɔfa siesie ye nwo ofi mmraanu berɛ ɔkɔ Nana ahemvie berɛ ne, bɛfa bɛma ye.

¹⁴ Nɔsoa yeɛ ɔkɔ dɔ ɔ, na aleɛ kye ngyerɛmɔ a, osa ba mmraanu bɔ ɔtɔ so nyɔ ne anu. Bɛfa ye bewura Nana Ahasuro sayɛɛ Saasegase sa wɔ berɛ. Ye yeɛ ɔnea Nana sómaa nemɔ so ɔ. Taluwa ne onza ngɔ Nana Ahasuro dɔ ko, sana ye nye gye taluwa ne anwo. Na ɔba ye sɔ a, ɔbɔ ye dumaa maa bɛkɔfa ye bɛba.

¹⁵ Odwuli Ɛseta so kyɛ ɔkɔ Nana Ahasuro nyunu. Modekae bɔ ɔfale ye yɛle ɔwa ne, ye baba aliɛma bienzua Abihail ɔwa ɛne. Ɛseta anga kyɛ bɛma ye nningyein bɔ ɔfa siesie ye nwo ɔ. Nningyein bɔ Nana Ahasuro sayɛɛ Hegae, bɔ ɔnea mmrasua nemɔ so ne otuli ye foɛ kyɛ ɔfa siesie ye nwo ne, ye ala yeɛ ɔfale ɔ. Na ebiala bɔ ye nye bɔle Ɛseta so ne, ye nwo yɛle ye nyemene.

¹⁶ Nana Ahasuro ahennie afoɛ bɔ ɔtɔ so nzoo ne anu, bosome buru bɔ oli Tebete ne anu yeɛ bɛfale Ɛseta bɛhɔle ye ahemvie berɛ ɔ.

¹⁷ Na Nana Ahasuro hurole Ɛseta trale mmrasua ngaa ne amu. Ohurole ye dwirɛ, na ye nye gyele ye nwo trale mmabunu ne amu, yiti ɔfale ɛhemmaa kyerɛ ne wurale ye, na ɔfale ye sili hemmaa sili Wasiti gya nu.

¹⁸ Afei Nana Ahasuro tole poen kandinga mane ye mbanyi ne ye somvoɛ amukoraa fa hyɛle Ɛseta animnyam. Ɔmaa bɛyakyili manzini toɔdidelɛ ne mmerɛ kãa, na ɔyele ye kunu hyɛle bɛ nningyein.

Modekae de Nana Ahasuro ngoa

¹⁹ Mmerɛ bɔ bɛboaboale mmabunu nemɔ noa ye pɛen nyɔ so ne, né Modekae waatena ahemvie anoa nu berɛ.

²⁰ Né Ɛseta ɔllale ye abusua anaa ye maen ali, kyɛbɔ Modekae bɔle ye noa ne ala, ofikyɛ Ɛseta lili Modekae dwirɛ so, kyɛbɔ ɔyɔle ye mmerɛ bɔ né ɔtete ye ne ala.

²¹ Ɛlɛho bie, né Modekae te ahemvie anoa nu berɛ. Sɔ mmerɛ ne, Bigitan ne Terese, bɔ bɛte Nana Ahasuro sayɛɛ nemɔ anu nyɔ bɔ bɛwɛne Nana pumbu nu anoa nemɔ nen, bɛfɛle yaa, na bɛbɔle porɛ kyɛ bekohu Nana Ahasuro.

²² Nakoso edwirɛ ne pɛle Modekae so anu, na ɔɔbɔle Nana hemmaa Ɛseta amaneɛ. Na Ɛseta koso bɔle Nana Ahasuro amaneɛ hane kyɛ Modekae yeɛ ɔtele ɔ.

²³ Bɛneaneane edwirɛ ne anu, na benwuni kyɛ ɔte nahorɛ nen, bɛbɔle sɔ mmienzua nyɔ ne kɔme wɔ bakaa so. Na bɛhyerɛ bewurale aberɛso dwirɛ nwomaa ne anu wɔ Nana Ahasuro nyunu berɛ.