Ɛseta 1 - AHYERƐLƐ KRONGRON

Nana Ahasuro tu Ɛhemmaa Wasiti bia so

¹ Sɔ dwirɛ he sili wɔ Nana Ahasuro aberɛ so, na sɔ Ahasuro ne, olili manzini ɛyaa ko aburanyɔ ne nzoo so fite Yindia maa oodwuli Yitiopia.

² Sɔ mmerɛ ne, Nana Ahasuro bia bɔ olili ne, né Susa ahemvie yeɛ ɔte ɔ.

³ Olili bia ne, ye afoɛ nza ne anu, ɔtole poen mane ye mbanyi ne ye somvoɛ amukoraa. Ɔtole ye sa frɛle Pɛsia ne Media safohene mɔ, atitirefoɛ ne manzini amrado mɔ maa bɛwale ye bo bie.

⁴ Ye anwonya worawora bɔ ɔwɔ ye ahennie nu, ye ahennie ne ye nyemene, ɔne ye animnyam ne, ɔfale ngyẽa pee, ngyẽa ɛyaa ko aburawɔtwɛ yeɛ ɔlale ye ali hyirele ɔ.

⁵ Sɔ ngyẽa ne wale ayieleɛ ne, Nana Ahasuro tole poen mane ebiala bɔ ɔwɔ Susa ahemvie berɛ, atitirefoɛ ne kwahweabaa mɔ. Ɛpoentolɛ ne hɔle so ɛlɛsoo wɔ Nana Ahasuro ahemvie n’anyunu berɛ turo ne anu.

⁶ Bɛfale mbɛmuɛ tena fufue ne bibire, bɔ nwera ne koogyan sinzesinze so, bɔ ɛdwetɛ ngaa ne nyɔboɛ fufue sosɔ bɛ noa ɔ yeɛ besiesiele berɛ. Né mba bɔ bafa sikaa kɔkorɛ ne ɛdwetɛ baboro bɛ nwo ɔ gyigyi berɛ. Aseɛ bɔ mba nemɔ gyigyi so ne, né bafa nyɔboɛ kɔkorɛ ne nyɔboɛ fufue ne nyɔboɛ hyɛnn ne nyɔboɛ hyɛnhyɛnn yeɛ basiesie berɛ.

⁷ Besuli bɛ nzaa ne wɔ sikaa kɔkorɛ kulie nu, yeɛ kulie ahoroɔ mɔ nu. Na Nana Ahasuro yele ye kunu mane bɛ nzaa maa obuli bɛ so, kyɛbɔ ye anwonya te ɔ.

⁸ Ebiala none nzaa somaa bɔ ɔkɔhora ye no ɔ, ofikyɛ Nana Ahasuro hyɛle ye ahemvie berɛ somvoɛ nemɔ kitii kyɛ, nzaa somaa bɔ ebiala kɔhora ye no ne, ɔsɛ kyɛ besu ye.

⁹ Na Nana hemmaa Wasiti koso tole poen mane mmrasua mɔ wɔ Nana Ahasuro ahemvie berɛ.

¹⁰ Ye ɛlɛsoo ne aso bɔ né nzaa ama Nana Ahasuro ye ti anu ayɛ ye fɛfɛɛfɛ ne, osele ye somvoɛ sayɛɛ nzoo, bɔ bɛ ole Mehuman, Bisita, Habona, Bigita, Abagita, Seta ne Kakase,

¹¹ kyɛ bɛɛfa Nana hemmaa Wasiti bɛbra ye nyunu. Ɔnwa ɔsɛ kyɛ Nana hemmaa ne ɔbɔ ahennie abotire; bɔ ɔkɔma mmenia ne ye mbanyi mɔ bekonwu ye anwonyemene ɔ, ofikyɛ né ye nwo yɛ nyemene.

¹² Sayɛɛ nemɔ fale Nana Ahasuro ngraa ne bɛɛmane Nana hemmaa Wasiti, nakoso wamma. Ye sɔ ati, Nana Ahasuro ahone huli, na ɔfɛle yaa hahii.

¹³ Yeɛ Nana Ahasuro susuli ye nwo hyirele ye nworɛfoɛ bɔ bɛse maen nhyehyɛleɛ ne, (ofikyɛ mmenia amukoraa bɔ bɛse mmeraa ne amammerɛ ne, né ɔyɛ a Nana Ahasuro susu ye dwirɛ nwo kyire bɛ ɔfa tie b’adwene.

¹⁴ Bɛ bɔ ɔyɛ a Nana Ahasuro ɔne bɛ betu asure paa ole Kasena, Seta, Adimata, Tasise, Merese, Masena ne Memukan. Bɛ yeɛ bɛte mbanyi nzoo bɔ bɛwɔ Pɛsia ne Media bɔ né bɛtaa bɛ ne Nana Ahasuro bedi ngitahoɛ ɔ, na bɛ yeɛ betira ahennie ne anu dibea piri paa ɔ.)

¹⁵ Na Nana Ahasuro bisale bɛ kyɛ, “Nzomane me sayɛɛ nemɔ kyɛ bɛɛhã behyire Nana hemmaa Wasiti ma ɔbra, nakoso wandɛ me so. Sɛ yɛnea yɛ mmeraa ne anu a, nzikyɛ asohwenɛ yeɛ odi kyɛ yɛfa yɛma ye ɔ?”

¹⁶ Yeɛ Memukan mane Nana Ahasuro ne mbanyi nemɔ mmuayɛɛ wɔ bɛ nyunu berɛ kyɛ, “Nna Nana Ahasuro angome yeɛ Nana hemmaa Wasiti wayɔ ye tɛɛ ɔ, na mmom wayɔ mbanyi ne amukoraa tɛɛ, ɔne mmenia amukoraa bɔ bɛwɔ Nana Ahasuro manzini amukoraa nu koso tɛɛ.

¹⁷ Mmrasua mukoraa bɛkɔte Nana hemmaa yɔleɛ tɛɛ he, na ɔnate so bengobu bɛ hu mɔ. Ofikyɛ bɛkɔhã kyɛ, ‘Nana Ahasuro po hane kyɛ bɛɛfa Nana hemmaa Wasiti ma ɔbra ye nyunu, nakoso Nana hemmaa andɛ ye so.’

¹⁸ Ɛnɛ kyẽa ye ala, Pɛsia ne Media nnehyeɛ mmrasua bɔ bate nana hemmaa yɔleɛ tɛɛ he nen, bɛkɔhyɛ ye bo bekohyire sɔ suban ne bie bekohyire bɛ hu mɔ, na ɛhe ngɔma animtia ne ahonehulɛ bo ngɔpɛ.

¹⁹ Nana, sɛ ɛkɔpene so a, hyɛ mmeraa, ná maa bɛhyerɛ bɛboka Pɛsia ne Medese mmeraa bɔ bɛngora ye sesã ne aso, kyɛ, Onni kyɛ Nana Wasiti ba Nana Ahasuro nyunu le ko. Afei koso, Nana, fa Wasiti hemmaa dibea ne ma brasua foforɛ bɔ ɔte paa tra Wasiti ɔ.

²⁰ Nana, sɛ bɛbɔ sɔ mmeraa bɔ ɛkɔhyɛ ne dawure wɔ w’ahennie tɛtrɛtɛɛ ye amukoraa nu a, mmrasua amukoraa kɔfa anidie bɛkɔma bɛ hu mɔ, fite mmienzua atitirefoɛ so kodwu kwahweabaa mɔ so.”

²¹ Sɔ foɛtulɛ ne yɛle Nana Ahasuro ne ye mbanyi amukoraa fɛ, na Nana Ahasuro yɔle kyɛbɔ Memukan susuli ne ala.

²² Nana Ahasuro maa bɛfale ngrataa bɛhɔle ye manzini ne amukoraa nu. Manzini biala, kyɛbɔ ye ahyerɛlɛ ɔte ne, yeɛ mmenia biala, kyɛbɔ bɛ dwudwolɛ ɔte ne, sɔ ala yeɛ bɛhyerɛle krataa ne ɔ; kyɛ, bienzua biala yeɛ tumi wura ye sa wɔ ye awuro ɔ, na ɔnzɛ kyɛ betu ye noa dwirɛ begua.