Ɛfesofoɛ 5 - AHYERƐLƐ KRONGRON

Ɛ́mɔbɔ anwotelɛ bra

¹ Yiti ɛ́mɔsua Nyameɛ, kyɛ ye mma bɔ ɛmɔla ye ahone nwo ɔ.

² Ɛ́mɔfa ɔdɔ bɛbɔ ɛmɔ bra, kyɛbɔ Kristo koso hurole yɛ dwirɛ ná ɔfale ye ngoa tole berɛ mane yɛ kyɛ ayɛyɛdeɛ ne afɔleɛ fonafona mane Nyameɛ ne.

³ Na adwamanbɔlɛ, bra fiɛ amukoraa anaa anyeboroborolɛ nwo dwirɛ po, ɔnzɛ kyɛ ofite ɛmɔ nu ɔ, kyɛbɔ ɔfata anwoteefoɛ ɔ.

⁴ Nnɛmɔma nyanzoen dwirɛ, ngwaseasɛm anaa aseresɛm bɔ ɔmvata ɔ nwo dwirɛ fite ɛmɔ nu, na mmom asennaa.

⁵ Ofikyɛ ɛmɔse ye dada kyɛ, adwamanbɔlɛniɛ anaa bra fiɛ bɔlɛniɛ anaa anyeboroborolɛniɛ (bɔ ɔte bosoensolɛniɛ) biala nne berɛ bɔ ole agyapadeɛ wɔ Kristo ne Nyameɛ ahennie ne anu ɔ.

⁶ Nnɛmɔma ebiala fa edwirɛ mbaen mbaen lakalaka ɛmɔ, ofikyɛ sɔ nningyein nemɔ ati yeɛ Nyameɛ ahonehulɛ ba asoserɛfoɛ so ɔ.

⁷ Yiti nnɛma ɛmɔ ne bɛ bɛbɔ afɛ;

⁸ ofikyɛ daa ne, né ɛmɔte awosii, nakoso kekesaala ye de, ɛmɔte kanea wɔ Awurade nu. Ɛ́mɔbɔ ɛmɔ bra kyɛ kanea mma,

⁹ ofikyɛ kanea mmaa bɔ osu ne, ɔda ali wɔ bra paa ne tenenee ne nahorɛ amukoraa nu;

¹⁰ na ɔsɛ kyɛ ɛmɔso bɔ ɔsɔ Awurade nye ne bɛnea.

¹¹ Nnɛma ɛmɔyɔ awosii nnwumaa bɔ onzu mmaa ne bie, na mmom ɛ́mɔpa bɛ nwo tena!

¹² Ofikyɛ bra bɔ bɛbɔ ye mvealeɛ nu ne, ɔyɛ nya kyɛ ɛmɔkɔfa ɛmɔ noa bɛkɔbɔ so ɔ.

¹³ Na nikyee biala bɔ kanea kɔpa ye nwo tena nen, ɔda ali pefee, ofikyɛ nikyee biala bɔ bɛda ye ali ne, ɔte kanea.

¹⁴ Ɛhe ati yeɛ ɔkã kyɛ, “Wɔ bɔ alafe ne, tingye, ná dwɔso fi awufoɛ nu, na Kristo kɔta kɔma wɔ.”

¹⁵ Yiti ɛ́mɔnea ɛmɔ nwo yé wɔ atee bɔ ɛmɔnate so ɔ nwo; nnɛma ɛmɔyɛ kyɛ mmenia bɔ bɛnze nworɛ ɔ, na mmom kyɛ nworɛfoɛ.

¹⁶ Ɛ́mɔnea ɛmɔ mmerɛ so yé, ofikyɛ ngyẽa ne te ngyẽa tɛɛ.

¹⁷ Yiti nnɛma ɛmɔyɛ mmenia bɔ adwene nne bɛ ti anu ɔ, na mmom ɛ́mɔyɛ mmenia bɔ bɛte Awurade apɛdeɛ bo ɔ.

¹⁸ Nnɛma ɛmɔbo nzaa, ofikyɛ ɔne basabasayɔlɛ yeɛ bɛnate ɔ; na mmom ɛ́mɔma Sunzum ne oyi ɛmɔ tɛkyɛ.

¹⁹ Ɛ́mɔfa sangoo dwein, ayɛyelɛ dwein ne sunzum nu dwein bedwudwo behyirehyire ɛmɔ nwo; ná ɛ́mɔfa ɛmɔ ahone amukoraa bɛto Awurade nwo dwein;

²⁰ na mmerɛ biala ne nikyee biala nu, ɛ́mɔfa asennaa bɛ́ma Baba Nyameɛ wɔ y’Awurade Yesu Kristo dumaa nu.

²¹ Na ɔsɛ kyɛ ɛmɔfa Kristo nu esurolɛ nu bɛbrɛ ɛmɔ nwo ase bɛmoma bɛ nwo.

Yeɛ mɔ

²² Yeɛ mɔ, ɛ́mɔbrɛ ɛmɔ nwo ase bɛ́ma ɛmɔ bɔbɔ bɛ hu mɔ, kyɛ ɛmɔyɔ bɛma Awurade ne.

²³ Ofikyɛ huɛ ne ɔte yeɛ ne ti, kyɛbɔ Kristo koso ɔte asɔre ne ti ne, na ye yeɛ ɔte Ngoadefoɛ ma nipadua ne ɔ.

²⁴ Na kyɛbɔ asɔre ne brɛ ye nwo ase ma Kristo nen, sɔ ala yeɛ ɔsɛ kyɛ yeɛ mɔ koso bɛbrɛ bɛ nwo ase atee biala so bɛma bɛ hu mɔ ɔ.

Huɛ mɔ

²⁵ Huɛ mɔ, ɛ́mɔhuro ɛmɔ aye mɔ, kyɛbɔ Kristo koso hurole asɔre ne dwirɛ, ná ɔfale ye ngoa tole berɛ mane ye,

²⁶ kyɛbɔ ɔkɔfa nzue ebialɛ nu kɔte ye nwo wɔ edwirɛ ne anu kɔyɛ ye krongron ɔ,

²⁷ kyɛbɔ okosiesie asɔre ne animnyam nu kɔma ye nwo, bɔ ngekalewa anaa ɛpombonɛ, anaa nikyee fiɛ biala nne ye nwo, na mmom wayɛ krongron bɔ mvomsoɛ nne ye nwo ɔ.

²⁸ Na sɔ ala yeɛ ɔsɛ kyɛ huɛ mɔ bekuro bɛ ye mɔ dwirɛ kyɛ bɛ bɔbɔ bɛ nipadua ɔ. Ofikyɛ sona bɔ okuro ɔye dwirɛ nen, okuro ye bɔbɔ ye nwo dwirɛ.

²⁹ Na ebiala nne berɛ bɔ ɔpɔ ye bɔbɔ ye nwonaen ɔ, na mmom ɔma ye aleɛ, ɔnea so yé, kyɛbɔ Kristo koso ɔyɛ asɔre nen.

³⁰ Ofikyɛ yɛte ye nipadua n’akwaa.

³¹ Na ye sɔ ati yeɛ bienzua kɔyakyi ɔse ne oni berɛ, ná wafa ye nwo waabata ɔye nwo, ná bɛ munyɔ bayɛ anwoɔnaen ko.

³² Ɛhe te mvealeɛ nu dwirɛ piri paa, na me de, Kristo ne asɔre ne nwo dwirɛ mmom yeɛ mekã ɔ.

³³ Nakoso ɔsɛ kyɛ ɛmɔ nu biala kuro ɔye dwirɛ kyɛ ye bɔbɔ ye nwo, na yeɛ ne koso, ɔsɛ kyɛ ɔfa anidie ma ohu.