Ɛfesofoɛ 3 - AHYERƐLƐ KRONGRON

Pɔɔlo te Amaenmaensofoɛ somafoɛ

¹ Ɔnate ɛhe ati, me Pɔɔlo, nde Kristo Yesu kukununiɛ mema ɛmɔ Amaenmaensofoɛ.

² Na mesusu kyɛ ɛmɔate Nyameɛ adwuma nwo adom bɔ ɛmɔ ti wafa walo me ne,

³ kyɛbɔ ɔnate nyekyire so maa nwuni mvealeɛ nu dwirɛ ne, kyɛbɔ mahyerɛ ye nwo dwirɛ kãa dada ne.

⁴ Na sɛ ɛmɔkenga he a, ɛmɔkonwu kyɛbɔ mesi mete Kristo mvealeɛ nu dwirɛ ne bo ɔ,

⁵ mvealeɛ nu dwirɛ bɔ banna ye ali bangyire mmenia mmaa wɔ aworɛ ndoatoasoɛ biemɔ anu, kyɛbɔ kekesaala ye de Sunzum ne waye wahyire ye asomafoɛ ne ngɔmhyɛlɛfoɛ krongron mɔ ne.

⁶ Na ɛhe ma Amaenmaensofoɛ koso bele kyɛfa wɔ nu, bɛwɔ nipadua komapɛ ne ala nu bie, na bɛnate nzɛmba ne aso banya kyɛfa wɔ ye bɔhyɛ ne anu wɔ Kristo Yesu nu.

⁷ Na nzɛmba he anwo yeɛ bayɛ me somvoɛ ɔ, kyɛbɔ Nyameɛ adom akyɛdeɛ bɔ ɔnate ye tumi adwumayɔlɛ so wafa walo me ne ɔte ne.

⁸ Ɔwɔ nu kyɛ me yeɛ nde kãa paa wɔ anwoteefoɛ ne amukoraa nu ɔ, nakoso Nyameɛ amaa manya sɔ adom he, kyɛ mmɔ Kristo anwonya bɔ ɔbo sona ndeaseɛ so ne dawure ngyire Amaenmaensofoɛ;

⁹ kyɛ mmukye mvealeɛ nu dwirɛ he aso ngyire adasa mmaa mukoraa, ofikyɛ ofi tete yeɛ wafea wɔ Nyameɛ bɔ ɔbɔle nningyein mukoraa ne anu ɔ;

¹⁰ kyɛbɔ ɔkɔyɛ bɔ afei ɔnate asɔre ne aso, Nyameɛ nworɛ ne kɔla ye nwo ali wɔ atee ahoroɔ so kohyire ahennie ne tumi ahoroɔ bɔ bɛwɔ anwuro dɔ ɔ.

¹¹ Na ɛhe te ye nhyehyɛleɛ afebɔɔ bɔ ɔnate y’Awurade Yesu Kristo so wawa nu ɔ.

¹² Na gyidie bɔ yanya ye wɔ Kristo nu ne ati, yɛkora yɛsi y’ahone yɛkɔ Nyameɛ nyunu wɔ anyelasoɛ nu.

¹³ Yiti mesrɛ ɛmɔ kyɛ, nnɛmɔma ɛmɔ abasa nu bu wɔ amaneɛ bɔ ɔnate ɛmɔ ti menwu ye ne anwo, ofikyɛ ɔte ɛmɔ animnyam.

Kristo dɔ

¹⁴ Ɔnate ɛhe ati, mekoto mesrɛ [y’Awurade Yesu Kristo] Baba,

¹⁵ bɔ ye nu yeɛ abusua biala bɔ ɔwɔ nyameɛso ne aseɛ so onya ye dumaa fi ne,

¹⁶ kyɛ ófi ye animnyam anwonya nu ma ɛmɔfa ye Sunzum so benya tumi nu anwoserɛ wɔ ɛmɔ nu, wɔ sona sue ne anu,

¹⁷ amaa Kristo afa gyidie so watena ɛmɔ ahone nu, ná ɛ́mɔatira ndii batindim wɔ ɔdɔ nu,

¹⁸ amaa ɛmɔahora bɛne anwoteefoɛ amukoraa bate kyɛbɔ osi trɛ, osi te tendenn, osi wale, ɔne kyɛbɔ osi te kuronn ɔ bo,

¹⁹ ná ɛmɔanwu Kristo ɔdɔ ne bɔ ɔbo nimdeɛ so ne, amaa ɔnate so Nyameɛ sue ne amukoraa wayi ɛmɔ nu tɛkyɛ.

²⁰ Afei ye bɔ ɔkora yɔ maa ɔtra nningyein amukoraa, maa ɔbo so tra bɔ yɛsrɛ anaa yɛsusu ne, kyɛbɔ ye tumi bɔ ɔyɔ yɛ nu adwuma te nen,

²¹ animnyam hã ye wɔ asɔre ne anu ne Kristo Yesu nu wɔ aworɛ ndoatoasoɛ amukoraa nu daa daa afebɔɔ. Amen.