Ɛfesofoɛ 1 - AHYERƐLƐ KRONGRON

Ahyebisalɛ

¹ Pɔɔlo bɔ ɔnate Nyameɛ pɛ so nde Kristo Yesu somafoɛ ne, mefa mebrɛ anwoteefoɛ bɔ bɛwɔ Ɛfeso bɔ bɛte Kristo Yesu nu agyidifoɛ ne.

² Adom ne asomdwee bɔ ofi yɛ Baba Nyameɛ ne Awurade Yesu Kristo berɛ ɔyɛ ɛmɔ deɛ.

Sunzum nu saleɛ wɔ Kristo nu

³ Animnyam hã Nyameɛ, y’Awurade Yesu Kristo Baba ne, bɔ wafa sunzum nu saleɛ amukoraa bɔ ɔwɔ nyameɛso wayira yɛ wɔ Kristo nu ne,

⁴ kyɛbɔ ɔneaneane nu yele yɛ wɔ ɔdɔ nu, Kristo nu koraka yeɛ bɛbaahyɛ wiase bo, kyɛ yɛyɛ krongron bɔ ngekalewa biala nne yɛ nwo wɔ ye nyunu ne.

⁵ Na ɔneaneane nu yele yɛ siele berɛ kyɛ ɔnate Yesu Kristo so ɔkɔfa yɛ kɔyɛ ye mma, kyɛbɔ ye nhyehyɛleɛ botaeɛ te ne;

⁶ amaa ɔnate so yaye ye animnyam adom bɔ ɔnate ye ahone nu Ba ne aso wafa walo yɛ ne ayɛ.

⁷ Ɔnate ye mogya ne aso yeɛ wale yɛ ɔ, bɔ ye ole yɛ mvomsoɛ fahyɛlɛ ne, kyɛbɔ ye adom mmorosoɛ ne te ne,

⁸ na ɔmaa ɔbole so mane yɛ wɔ nworɛ ne nimdeɛ amukoraa nu.

⁹ Ofikyɛ wamaa yanwu ye mvealeɛ nu apɛdeɛ, kyɛbɔ ye nhyehyɛleɛ botaeɛ bɔ ɔhyehyɛle ye wɔ Kristo nu ne ɔte ɔ.

¹⁰ Na sɔ nhyehyɛleɛ ne kyire kyɛ mmerɛ ne adwu kyɛ ɔkɔboaboa abɔdeɛ amukoraa bɔ bɛwɔ nyameɛso ne aseɛ so noa ɔkɔbɔ nu wɔ Kristo nu.

¹¹ Na ye bɔ ɔyɔ ye nikyee biala kyɛbɔ ye nhyehyɛleɛ ne ye pɛ osi te ne, wafa Kristo so waneanea nu waye yɛ kyɛ yɛyɛ ye deɛ;

¹² kyɛ yɛ bɔ yɛlili moa yɛnyane Kristo nu gyidie ne yɛɛyɛ ye animnyam ne ayɛyelɛ.

¹³ Na ye nu yeɛ ɛmɔ koso, ɛmɔtele nahorɛ dwirɛ bɔ ɔte ɛmɔ ngoalelɛ nwo nzɛmba ne ɔ. Ye ala nu koso yeɛ ɛmɔle belili ɔ, na ɔfale Sunzum Krongron bɔ wahyɛ ye nwo bɔ ne hyɛle ɛmɔ nzorɛ kyɛ ɛmɔte ye deɛ,

¹⁴ bɔ osi yɛ agyapadeɛ ne agyinayɛɛ ɔ. Na ɛhe te elelɛ bɔ wafa wale bɛ bɔ wafa bɛ wayɛ ye deɛ wama ye animnyam ayɛyelɛ ne.

Pɔɔlo mbaeɛ

¹⁵ Yiti me koso, ofi mmerɛ bɔ ndele ɛmɔ gyidie wɔ Awurade Yesu nu ɔne anwoteefoɛ amukoraa nwo dɔ bɔ ɛmɔle ye ne,

¹⁶ nnyakyili ɛmɔ nwo asennaa, na mekaye ɛmɔ wɔ me mbaeɛbɔlɛ nu:

¹⁷ kyɛ y’Awurade Yesu Kristo Nyameɛ, bɔ ɔte animnyam Baba ne, ɔ́ma ɛmɔ nworɛ ne nyekyire sunzum wɔ ye nwo nimdeɛ nu,

¹⁸ ná óbukye ɛmɔ adwene nu ma ɛmɔnya ndeaseɛ, amaa ɛmɔanwu anyelasoɛ bɔ ɔwɔ ye frɛlɛ bɔ wafrɛ ɛmɔ ne anu, ɔne ye agyapadeɛ animnyam anwonya wɔ anwoteefoɛ nu.

¹⁹ Mesrɛ kyɛ, ɔma ɛmɔnwu ye tumi totohyia bɔ ɔbo so ma yɛ bɔ yɛde yɛdi ne, kyɛbɔ ye anwoserɛ tumi nikyeeyɔlɛ

²⁰ bɔ ɔfa lili dwumaa wɔ Kristo nu, wɔ mmerɛ bɔ otingyele ye fili awufoɛ nu ne ɔte ne. Ɔfale ye ɔɔtenane ye sa famaa so wɔ nyameɛso,

²¹ na ɔte ahennie, tumi, anwoserɛ ne meneɛ amukoraa so hene, ɔne dumaa biala bɔ bɛfa bɛfrɛ ɔ, bɔ nna wiase wa angome, na mmom ewiase bɔ ɔbaawa ne koso anu.

²² Na wafa nningyein amukoraa wawura Kristo gya bo, na wafa ye wayɛ nningyein amukoraa so tire wama asɔre ne,

²³ bɔ ɔte ye nipadua ne, bɔ ɔma nningyein mukoraa di mu wɔ nningyein mukoraa nu ne.