Edwein Nu Dwein 8 - AHYERƐLƐ KRONGRON

Braa ne dwein deɛ

¹ Me kunu a, ahaa ɛte nniɛma bienzua, bɔ ɔnone me ni nyɔfone ɔ! Sɛ meyia wɔ dwaaso a, ahaa ngɔfe wɔ noa, bɔ ebiala ngosobi ye noa ngogua me so ɔ.

² Ahaa ngoli wɔ nyunu ngɔfa wɔ ngɔwa me ni awuro maa ekohyire me ehurolɛ. Ahaa ngɔmaa ɛkɔno nzaa bɔ nningyein fonafona wɔ nu ɔ bɔ ɔte m’akengaa nzue bɔ bahwi ɔ.

³ Me ti la ye sa bɛen so, wafa ye sa famaa wato wabra me.

⁴ O Yerusalem ndaluwa, mesrɛ ɛmɔ kitii, kyɛ nnɛma ɛmɔtingye ehurolɛ, yeɛ nnɛma ɛmɔperepere ye nwo kɔpem mmerɛ bɔ ye bɔbɔ okuro ɔ.

Yerusalem ndaluwa suro edwein ne aso

⁵ Brasua beni yeɛ ofi ɛserɛ so dɔ ɔba e, bɔ wate wamata ye kurofoɛ ye? Ndingyele wɔ wɔ aprɛ ne abo, nekaa bɔ wɔ maame wole wɔ ne, bɔ ɔwole wɔ ne, berɛ yeɛ aworɛ hane ye ɔ.

Braa ne dwein deɛ

⁶ Fa me yɛ w’ahone nwo nzɔanoɛ, fa me yɛ wɔ sa nwo nzɔanoɛ, ofikyɛ ehurolɛ nu yɛ se te kyɛ ewue, nungunɛ ti anu yɛ se te kyɛ asieleɛ kumaa. Ehurolɛ nzramaa te see nzramaa bɔ ɔsɔ wuronyiwuronyi ɔ.

⁷ Nzue pee ngɔhora ngonua ehurolɛ, yeɛ asue mɔ ngɔhora ngɔma ɔngɔmono. Sɛ sona fa ye anwonya mukoraa po kyɛ ɔfa tɔ ehurolɛ a, bekosobi bɛ noa bekogua ye so.

Braa n’aliɛma mmienzua mɔ dwein

⁸ Yɛle aliɛmaa brasua bie bɔ ɔte kãa ɔ, onnya ɔbbobɔle nyɔfone. Kyẽa bɔ bienzua bie kɔɔsrɛ ye agyaa ne, nzu yeɛ yɛkɔyɔ yɛkɔma y’eliɛma brasua ye ɔ?

⁹ Sɛ y’eliɛma ne ɔte fasue a, ahaa yɛkɔto ɛdwetɛ abandenden yɛkosie so, yeɛ sɛ ɔte anoa a, ahaa yɛkɔfa sida yɛkɔma ye nwo yɛkoyia.

Braa ne dwein deɛ

¹⁰ Nde fasue, na me nyɔfone te kyɛ abandenden, na mayɛ kyɛ sona bɔ ɔne asomdwee yeɛ bɛnate ɔ wɔ me kurofoɛ n’anye so.

¹¹ Né Solomon le bobe boo wɔ Baal Hamon; ɔfale bobe boo ne wurale hwɛsofoɛ sa, bɛ nu biala te bobe mmaa ne a, né odi kyɛ ɔbrɛ ye ɛdwetɛ apee ko.

¹² Me bobe boo bɔ me bɔbɔ me deɛ ahɔ ne, me bɔbɔ yeɛ menea so ɔ. O Solomon, ɛdwetɛ apee ko ne, ɔte wɔ deɛ, yeɛ bobe mmaa so hwɛsofoɛ nemɔ bɛ deɛ ɛyaa nyɔ.

¹³ O, wɔ bɔ ɛte turo nemɔ anu ɔ, wɔ mmango mɔ bɛnwondɛ kyɛ bɛkɔte wɔ komvi ɔ, maa nde wɔ komvi e.

¹⁴ Me kurofoɛ, bra ndɛndɛ, yɛ kyɛ ɛwanzane, anaakyɛ dabɔɔ akrɔngrɔma wɔ ayirefona mmokaa nemɔ aso.