Edwein Nu Dwein 7 - AHYERƐLƐ KRONGRON

Biaa ne dwein deɛ

¹ O, dehyeɛ awa brasua, wɔ gya ne mbaboa yɛ nyemene! Wɔ sɔ ne, ye aporɛ so te kyɛ agudeɛ, ɔte dwumvoɛ paa ye sa noa adwuma.

² Wɔ kotoa te kyɛ ngomvo kurukuru bɔ nzaa bɔ bafrafra ɔ ɔmba nu le ɔ. Wɔ ko sɛen te kyɛ atokoɔ kure bɔ bafa sukooko bapɛ ye nwo bayia ɔ.

³ Wɔ nyɔfone nyɔ ne, bɛte kyɛ dabɔɔ akrɔngrɔma nyɔ bɔ bɛte ndaa ɔ.

⁴ Wɔ kɔme te kyɛ abandenden bɔ bafa ɛsoen gye bayɔ ɔ, wɔ nye mma te kyɛ Hesebon ɛkwaa bɔ ɔwɔ Bate Rabim pambim ne anwo ɔ. Wɔ bonyi te kyɛ Lebanon abandenden bɔ ye nye kyire Damasko ne.

⁵ Wɔ ti bɔ otua so ne, ɔte kyɛ Kamɛl bokaa, wɔ ti nwiaa te kyɛ serekye, na ye mmɛsa ne, ɔma ɛhene ne tena a ɔndena.

⁶ O, me kurofoɛ bɔ ɛgyegye me nye ɔ, kyɛbɔ wɔ nwo si yɛ nyemene, ná ɔyɛ akɔnnɔ ɔ!

⁷ Ɛbɔ pe kyɛ ayee, na wɔ nyɔfone te kyɛ ye betire nemɔ.

⁸ Menwa, ngɔfo ayee ne ngɔɔsɔ ye mbapaa nemɔ anu. O, wɔ nyɔfone te kyɛ bobe betire mɔ, wɔ nwomeɛ fona te kyɛ aprɛ,

⁹ na wɔ noa nwo felɛ te kyɛ bobe nzaa paa bɔ ɔfa bɛ komvi yɔɔ, bɔ ɔnate bɛ noa ne bɛ gye so yɔɔ ɔ.

Braa ne dwein deɛ

¹⁰ Nde me kurofoɛ ne deɛ, me yeɛ ye wora dɔ me ɔ.

¹¹ Me kurofoɛ, bra, maa yɛhɔ mmakaa mmakaa nemɔ anu dɔ yɛɛla namue nemɔ anu dɔ kɔngɔen.

¹² Maa yɛpɛ aleɛ yɛhɔ bobe boo nemɔ anu yɛɛnea sɛ bobe nemɔ bafefɛ a, sɛ bapakye nyerɛen a, sɛ akengaa nemɔ babɔ nyerɛen a. Dɔ yeɛ ngohyire me hurolɛ ngohyire wɔ ɔ.

¹³ Nwonzɛenyire nemɔ betu fona, mmakaammaa paapaa mukoraa, monɛ ne daa, begua yɛ anoa nu berɛ. O me kurofoɛ, mafa masie berɛ mama wɔ.