Edwein Nu Dwein 6 - AHYERƐLƐ KRONGRON

Yerusalem ndaluwa suro edwein ne aso

¹ O, wɔ bɔ w’anwonyemene tra mmrasua mu ɔ, nisua yeɛ wɔ kurofoɛ ne wahɔ ɔ? Nisua yeɛ ɔfale ye nye hyirele ɔ, ná yɛne wɔ yɛɛpena ye?

Braa ne dwein deɛ

² Me kurofoɛ ne, watorotoro wahɔ ye turo ne anu, ngofie bɔ balua ayirefona wɔ so nemɔ anwo dɔ, kyɛ ɔkɔ turo nemɔ anu dɔ okodidi ná ɔtete sukooko.

³ Nde me kurofoɛ ne deɛ, yeɛ me kurofoɛ ne wora ɔte me deɛ, ɔkɔ sukooko nemɔ anu okodidi.

Biaa ne dwein deɛ

⁴ O me kurofoɛ, wɔ nwo yɛ nyemene kyɛ kuro Tisa, wɔ nwo yɛ akɔnnɔ kyɛ Yerusalem, w’anwonyemene ne, watɔ me so kyɛ koɛhonɛfoɛ bɔ betiratira frangaa ɔ.

⁵ Nnɛfa wɔ nye nea me ko, ofikyɛ mede me nwo a onne! Wɔ ti nwiaa te kyɛ mbɔngye kure bɔ bɛtorotoro Gileade bokaa ɔ.

⁶ Wɔ gye te kyɛ mmoaen mmeleɛ bɔ bekye ala yeɛ babia bɛ ɔ bɛ nwo, bɔ bɛ mukoraa bawo ndaa, bɔ ko po nne bɛ nu bɔ ɔnwo ɔ.

⁷ Wɔ mvoka bɔ ɔtetɛ berɛ wɔ wɔ ngatanyunu nu ne, ɔte kyɛ akengaa bɔ bapakye nu nyɔ ɔ.

⁸ Ahenyerɛ aburasia ne sómaa aburawɔtwɛ wɔ berɛ, yeɛ ndaluwa pee bɔ bɛnze bɛ noa ɔ wɔ berɛ de,

⁹ nakoso m’abubure bɔ odi mu ne, ɔte komapɛ twe, oni di ye bahorɛ, bɔ ɔwole ye ne, okuro ye dwirɛ. Ndaluwa nwuni ye, na bɛfrɛle ye sona bɔ ye nye agye ɔ, ahenyerɛ mɔ ne sómaa mɔ koso nwuni ye, na bɛkamvole ye.

¹⁰ “Nwa ɛne, bɔ ɔba kyɛ alehyeleɛ e, bɔ ye anwonyemene te kyɛ ɛsraen, bɔ ɔta kyɛ eyia, bɔ ye anwonyemene atɔ me so kyɛ koɛhonɛfoɛ bɔ betiratira frangaa e?”

Braa ne dwein deɛ

¹¹ Ndwu ngɔle kube turo ne anu, kyɛ mekwaanea bɔnza ne anu mmakaa frɔmfrɔm nemɔ, kyɛ mekwaanea sɛ bobe nemɔ bafefɛ a, kyɛ mekwaanea sɛ akengaa nemɔ babɔ nyerɛen a.

¹² Na me nye wale me nwo so ne, né me kra amaa mayɛ kyɛ Aminadabo teaseɛnam nemɔ.

Yerusalem ndaluwa suro so

¹³ O Sulamniɛ, sa bra, sa bra! Sa bra, sa bra maa yɛnea wɔ. Nzu ati yeɛ ɛmɔnea Sulamniɛ ye haa, kyɛ ɛmɔnea mmeni kure nyɔ b’abilie ɔ?