Edwein Nu Dwein 4 - AHYERƐLƐ KRONGRON

Biaa ne dwein deɛ

¹ Ah, me kurofoɛ, wɔ nwo yɛ nyemene, ah, wɔ nwo yɛ nyemene! Wɔ nye mmaa bɔ owura wɔ ngatanyunu nu ne, ɔte kyɛ abubure nye! Wɔ ti nwiaa te kyɛ mbɔngye kure bɔ bɛtorotoro Gileade bokaa ɔ.

² Wɔ gye te kyɛ mmoaen mmeleɛ bɔ bekye ala yeɛ babia bɛ ɔ bɛ nwo, bɔ bɛ mukoraa bawo ndaa, bɔ ko po nne bɛ nu bɔ ɔnwo ɔ.

³ Wɔ noa te kyɛ nyamaa kɔkorɛ, wɔ noa dwudwolɛ yeɛ oku me ye, wɔ mvoka bɔ ɔtetɛ berɛ wɔ wɔ ngatanyunu nu ne, ɔte kyɛ akengaa bɔ bapakye nu nyɔ ɔ.

⁴ Wɔ kɔme te kyɛ Dawide abandenden ne, bɔ besili ye kyɛ bɛfa akodeɛ begua nu, bɔ akokyɛm apee ko sinzesinze so, bɔ bɛ mukoraa bɛte koɛhonɛfoɛ b’akokyɛm ɔ.

⁵ Wɔ nyɔfone nyɔ ne, bɛte kyɛ dabɔɔ akrɔngrɔma nyɔ bɔ bɛte ndaa ɔ, bɔ bedidi wɔ sukooko mɔ nu ɔ.

⁶ Ngɔhɔ korobo bokaa ne aso, ɔne ɛyɛɛ pambaa ne aso, kɔpem kyɛ aleɛ kodwo ná wawoɛ komini ɔ.

⁷ Me kurofoɛ, anwonyemene abia wɔ, na ɛndɔ sii wɔ wɔ neka fee.

⁸ M’atɔmvorɛ braa, maa yɛfi Lebanon yɛhɔ, maa yɛfi Lebanon yɛhɔ. Fi Amana bokaa ti afia dwu bra, fi Seniri ne Hɛmɔn bokaa ti afia dwu bra, fi gyata mɔ bɛ bue nu bra, fi aboa mmokaa ne aso dwu bra.

⁹ Nniɛma brasua, m’atɔmvorɛ braa, amaa mede me nwo a onne, wɔ nye bɔ afa anea me ne, yeɛ akomuade ko bɔ ɔla wɔ kɔme ne, amaa mede me nwo a onne.

¹⁰ Ao, nniɛma brasua, m’atɔmvorɛ braa, wɔ hurolɛ ne, kyɛbɔ ye fɛɛ osi te ne, wɔ hurolɛ yɛ fɛ tra nzaa, na wɔ nwo sakyeɛfona ne, ɔbo fona tra ayirefona biala.

¹¹ M’atɔmvorɛ braa, wɔ noa pepe woɛ, woɛ ne nyɔfonesue wɔ wɔ temverema bo, wɔ tena nu fona te kyɛ Lebanon fona.

¹² Nniɛma brasua ne, m’atɔmvorɛ braa ne, ɔte turo bɔ bato ye nwo waen ɔ, mbombonzue bɔ bato ye nwo waen ɔ, abura bɔ bafa nzɔanoɛ basɔ ye noa ɔ.

¹³ Wɔ mmaen nemɔ, bɛte turo bɔ akengaa wɔ nu, bɔ mmakaammaa paa wɔ nu ɔ, kandanguru ne mmakaa fonafona,

¹⁴ mmakaa fonafona ne ɛsaa, hwendea ne ɛmanyire ne ɛyɛɛ mmakaa mukoraa, korobo ne pɛprɛ ne ayirefona paapaa mukoraa.

¹⁵ Ɛte turo nu abura, mbombonzue ne asue mmaa mmaa bɔ bɛtengyɛ befi Lebanon so ɔ.

Braa ne dwein deɛ

¹⁶ O, sorɔ dɔ mvrama, dwɔso, O, ngwaen dɔ mvrama, bra e! Baatu fa me turo ye anu ma ye fona ne ɔto pete. Me kurofoɛ ne, mepena kyɛ ɔba ye turo ne anu ɔbadi nu mmakaammaa paapaa ne.