Edwein Nu Dwein 3 - AHYERƐLƐ KRONGRON

Braa ne dwein deɛ

¹ Kɔngɔen bɔ nna me bɛen so ne, me wora lɔle me kurofoɛ bɔ me kra kuro ye paa ne, me wora lɔle ye, nakoso mannwu ye, [mvrɛle ye, nakoso wanzuro.]

² Nzaade, ngodwɔso ngoohyinihyini kuro nu dɔ, wɔ dwaaso ne mmorɔnoɛ nemɔ aso, ngɔɔpena me kurofoɛ bɔ me kra kuro ye ne; mbenane ye, nakoso mannwu ye.

³ Awɛmvoɛ bɔ bekyinikyini bɛwɛne kuro berɛ ne, beyiale me. “Aso ɛmɔanwu biaa bɔ me kra kuro ye ne?”

⁴ Nzane bɛ nwo ne ala, yeɛ nwuni bɔ me kra kuro ye ne ɔ. Ndo mmrale ye, kyɛ mengɔma ɔngɔhɔ, kɔpem kyɛ mvale ye mmale me ni awuro, sona bɔ ɔnwonzɛle me ne, ye pumbu ne anu ɔ.

⁵ O Yerusalem ndaluwa, mesrɛ ɛmɔ kitii, mefa ɛwanzane mɔ ne dabɔɔ mɔ meta ndaen kyɛ, nnɛma ɛmɔtingye ehurolɛ, yeɛ nnɛma ɛmɔperepere ye nwo kɔpem mmerɛ bɔ ye bɔbɔ okuro ɔ.

⁶ Nwa yeɛ ofi ɛserɛ so dɔ ɔba ye, bɔ ɔba kyɛ nwosina ningɔnn ye, bɔ korobo ne ɛyɛɛ ayɛ ye nwo fonafona ye, bɔ watutu dwadifoɛ sakyeɛfona amukoraa wagua ye nwo ye?

⁷ Nea ye sɛko ne, Solomon deɛ ne ɔ! Mmienzua anwoserɛfoɛ aburasia yeɛ bapɛ ye nwo bayia ɔ, befi Yisrael mmienzua anwoserɛfoɛ nu.

⁸ Bɛ mukoraa betiratira ngrandɛ, bɛse koɛ ko paa, ebiala ngrandɛ wura ye taku so, ɔnate esurolɛ bɔ besuro kɔngɔen ti.

⁹ Nana Solomon fale Lebanon mmakaa yɔle ye bɔbɔ ye sɛko.

¹⁰ Ɔfale ɛdwetɛ yɔle ye mbuna nemɔ, ye si ne te sikaa kɔkorɛ, ye bia ne te koogyan, na ye kunu ne koso, Yerusalem ndaluwa mɔ bɛ hurolɛ yeɛ bafa badwura nu ɔ.

¹¹ O Sion mma mmrasua, ɛ́mɔfite bɛbra bɛɛnea Nana Solomon, kyɛ owura abotire bɔ ye maame fa bɔle ye wɔ kyẽa bɔ ɔfale atɔmvorɛ ne, ɔne kyẽa bɔ ye nye gyele paa ne.