Edwein Nu Dwein 2 - AHYERƐLƐ KRONGRON

Braa ne dwein deɛ

¹ Nde Saron nyerɛen, bɔnza nu sukooko.

Biaa ne dwein deɛ

² Kyɛbɔ sukooko te wɔ ɛfone mɔ nu ne, sɔ yeɛ me kurofoɛ ne ɔte wɔ ndaluwa mɔ nu ɔ.

Braa ne dwein deɛ

³ Kyɛbɔ aprɛ te wɔ eburo mmakaa mɔ nu ne, sɔ ala yeɛ me kurofoɛ ne ɔte wɔ mmerandeɛ mɔ nu ɔ. Ndenane ye bo fɔnwoo ne anu wɔ anika nu, na ye mma ne, wabie wagua me gye abo.

⁴ Wafa me wawa ɛpoentolɛ sua ne anu, na ye frangaa bɔ ogyi me so ne ɔte ehurolɛ.

⁵ Ɛ́mɔma me bobe mmaa taterɛ ma nya anwoserɛ, ɛ́mɔma me aprɛ maa me nwo sande me, ofikyɛ ehurolɛ abɔ me anwonyerɛ.

⁶ Me ti la ye sa bɛen so,, wafa ye sa famaa wato wabra me.

⁷ O Yerusalem ndaluwa, mesrɛ ɛmɔ kitii, mefa ɛwanzane mɔ ne dabɔɔ meta ndaen kyɛ, nnɛma ɛmɔtingye ehurolɛ, yeɛ nnɛma ɛmɔperepere ye nwo kɔpem mmerɛ bɔ ye bɔbɔ okuro ɔ.

⁸ Me kurofoɛ ne, ye komvi ɛhe! Nea, ye yeɛ ɔba ye, ohuruhuru wɔ mmokaa nemɔ aso, ɔbɔ apendengwa wɔ pambaa nemɔ so.

⁹ Me kurofoɛ ne, ɔte kyɛ wanzane, anaa dabɔɔ akrɔngrɔma. Nea, ye yeɛ ogyi yɛ fasue ne asi dɔ ne, wato ye nye ɔnea mboma ne anu haa, wafa ye nye wafa mboma nu ngandanganda ne anu.

¹⁰ Me kurofoɛ ne, odwudwole me nwo kyɛ, “Dwɔso, me kurofoɛ, me kurofoɛ anwonyemene, bra e!

¹¹ Ofikyɛ prakasua ne apɛ nu, yeɛ asuso ne ayakyi, na wapɛ nu.

¹² Nyerɛen awa aseɛ ne aso, edweintolɛ mmerɛ ne adwu, na yɛte aborɔma suɛ wɔ yɛ aseɛ ye aso.

¹³ Borɔdoma ahyɛ ye bo osu, bobe nemɔ abɔ nyerɛen, bɛbo fonafona. Dwɔso, me kurofoɛ, me kurofoɛ anwonyemene, bra e!

¹⁴ O m’abubure bɔ ɛwɔ tokuro bɔ ɔla nyɔbotaen nu ɔ, bɔ aafea nyɔbotaen si ɔ, maa nwu wɔ nyunu e, maa nde wɔ komvi e, ofikyɛ wɔ komvi yɛ fɛ, na wɔ nyunu yɛ nyemene.

¹⁵ Ɛ́mɔhyehye safuboa nemɔ bɛ́ma yɛ, safuboa mmaa mmaa mɔ bɔ bɛsɛkye bobe boo ne, ofikyɛ yɛ bobe nemɔ asu.”

¹⁶ Me kurofoɛ ne, ɔte me deɛ, yeɛ me wora nde ye deɛ, ɔfa ye mmoaen kɔ adidie wɔ sukooko mɔ nu.

¹⁷ Me kurofoɛ, sa wɔ si bra e, yɛ kyɛ ɛwanzane anaa mmokaa so dabɔɔ akrɔngrɔma, kɔpem kyɛ aleɛ kodwo ná wawoɛ komini ɔ.