Edwein Nu Dwein 1 - AHYERƐLƐ KRONGRON

¹ Edwein nu dwein bɔ ɔte Solomon deɛ ne.

Braa ne dwein deɛ

² Maa ɔfa ye noa ɔfe me noa! Ofikyɛ wɔ hurolɛ ne, ɔyɛ fɛ tra bobe nzaa.

³ Wɔ sakyeɛ ne bo fona paa, yeɛ wɔ dumaa te kyɛ sakyeɛfona bɔ béhwie ɔ; ye sɔ ati yeɛ ndaluwa kuro wɔ ye.

⁴ Twetwe me bra wɔ nwo, ma yɛ nwo ɔyɛ nyera. Ao, ɛhene ne afa me awa ye pumbu nu. Yɛ nye kɔhã, ná yali wɔ nwo ahurusi, wɔ hurolɛ ne, yɛkɔkamvo ye yɛkɔtra bobe nzaa. Ɔnyɛ nwanwa kyɛ bekuro wɔ ɔ.

⁵ O Yerusalem ndaluwa, nde bire, na me nwo yɛ nyemene kyɛ Kedare ɛtena sua mɔ, kyɛ Solomon mbɛmuɛ tena.

⁶ Nnɛma ɛmɔnea me haa, kyɛ nde bire ne ati, ofikyɛ eyia yeɛ wapini me sɔ ɔ. Me ni mma mmienzua mɔ fɛle me so yaa, bɛmaa nneane bobe boo nemɔ aso, nakoso me bɔbɔ me bobe boo deɛ de, mayakyi mato berɛ.

⁷ Ao, wɔ bɔ me kra kuro wɔ ɔ, kã kyire me, nisua yeɛ ɛfa wɔ mmoaen kɔ adidie ɔ, nisua yeɛ eyia bɔ a ɛmaa bede bɛ nwome ɔ? Ofikyɛ, nzu ati yeɛ odi kyɛ meyɛ kyɛ ebie bɔ okyinikyini wɔ wɔ mmango mɔ bɛ mmoaen so ɔ?

Biaa ne dwein deɛ

⁸ O, wɔ bɔ ɛtra mmrasua mukoraa b’anwonyemene ɔ, sɛ ɛnze berɛ a, fa mmoaen nemɔ bɛ gya bo so, ná ma wɔ mbɔngye nemɔ bedidi wɔ mmoaenneafoɛ mɔ bɛ tena sua nemɔ anwo.

⁹ O wɔ bɔ mekuro wɔ ɔ, mefa wɔ metoto Faro teaseɛnam mbɔngɔ nemɔ anwo.

¹⁰ Mbembenanneɛ fata wɔ so taa nu, yeɛ sikaa kɔkorɛ akomuade fata wɔ kɔme.

¹¹ Yɛkɔyɔ sikaa kɔkorɛ asomade bɔ ɛdwetɛ tuatua nu ɔ yɛkɔma wɔ.

Braa ne dwein deɛ

¹² Me hene ne, mmerɛ bɔ ɔwɔ ye didipono nwo ne, me nwo sakyeɛfona lele berɛ.

¹³ Me kurofoɛ ne, ɔte korobo mumua ma me; me kurofoɛ ne, ɔkɔla me nyɔfone afia kɔngɔen amukoraa.

¹⁴ Me kurofoɛ ne, ɔte kyɛ bakaa bɔ ye nyerɛen bo fona bɔ ɔwɔ Ɛn Gɛdi bobe boo nu ɔ ma me.

Biaa ne dwein deɛ

¹⁵ Ah, me kurofoɛ, wɔ nwo yɛ nyemene, ah, wɔ nwo yɛ nyemene! Wɔ nye mmaa dabadabaa kyɛ abubure nye!

¹⁶ Ah, me kurofoɛ, wɔ nwo yɛ nyemene, nahorɛ nu, anwonyemene ɛhe! Yɛ bɛen ne, ye anwosue te nyaa monɛ,

¹⁷ yɛ sua mbuna te sida, na yɛ nzenyene bɔ ɔbɔ so ne te ɛtena bakaa.