Edwein 99 - AHYERƐLƐ KRONGRON

Ye AWURADE bɔ ɔte krongronniɛ ne ayɛ

¹ AWURADE di hene, maen maen mɔ, ɛ́mɔma ɛmɔ nwo wosowoso! Ɔte kɛrubim mɔ so; aseɛ, woso!

² AWURADE te piri wɔ Sion, na odi maen maen amukoraa so.

³ Odi kyɛ bɛye wɔ dumaa piri ne wɔ dumaa nwanwa ne ayɛ. Ɔte krongron!

⁴ Ɛhene piri bɔ ekuro ndɛenbualɛ turoloo ɔ, ama pɛpɛɛpɛyɛlɛ bo atimu, ama ndɛenbualɛ turoloo ne tenenee wagyina wɔ Yakob nu.

⁵ Ɛ́mɔkamvo AWURADE yɛ Nyameɛ ne, ɛ́mɔsɔne wɔ ye gya bo ndiasoɛ ne anwo, ofikyɛ ɔte krongron!

⁶ Né Mose ne Aarɔn bɛboka ye asɔfo nemɔ aso; né Samuel boka bɛ bɔ bɛbɔ ye dumaa bɛsɔne ye nemɔ aso. Besu bɛfrɛle AWURADE, na otiele bɛ.

⁷ Odwudwo hyirele bɛ fili munungum ningɔnn ne anu. Belili ye noa dwirɛ ne nhyehyɛleɛ bɔ ɔfa mane bɛ ne aso.

⁸ Ao AWURADE yɛ Nyameɛ, ebuale bɛ; ɛyɛle bɛ Nyameɛ bɔ ɛfa bɔne kyɛ ɔ, nakoso ɛyɛle bɛ bɔne so wereɛtɔlɛniɛ.

⁹ Ɛ́mɔkamvo AWURADE yɛ Nyameɛ ne, ná ɛ́mɔsɔne wɔ ye bokaa krongron ne aso, ofikyɛ AWURADE yɛ Nyameɛ ne, ɔte krongron.