Edwein 98 - AHYERƐLƐ KRONGRON

Di ahurusi ye AWURADE ayɛ

Edwein

¹ Ao, ɛ́mɔto dwein foforɛ bɛ́ye AWURADE ayɛ, ofikyɛ wayɛ anwanwadeɛ mɔ, Ye anwoserɛ asaa ne ye sa krongron ne yeɛ wafa wali ngonim ɔ.

² AWURADE amaa yanwu ye ngoalelɛ ne; wala ye tenenee ali wɔ maenmaensofoɛ nyunu.

³ Wakaye ye ɔdɔ bɔ onni ngasi ne, ɔne ye nahorɛlilɛ bɔ wala ye ali wahyire Yisrael awuro ama ne. Aseɛ so nekaa amukoraa banwu yɛ Nyameɛ ye ngoalelɛ ne.

⁴ Aseɛ amukoraa, ɛ́mɔfa ahurusi bɛ́bɔ AWURADE nwo ese; ɛ́mɔtea nu beli ahurusi, ná ɛ́mɔto ayɛyelɛ dwein.

⁵ Ɛ́mɔfa sangoo bɛ́to AWURADE nwo dwein, ɛ́mɔfa sangoo ne edweintolɛ.

⁶ Ɛ́mɔfa totorobɛndo ne awɛenhulɛ beli ahurusi bɛbɔ ese wɔ AWURADE bɔ ɔte hene ne nyunu.

⁷ Ɛpo ne nu nningyein amukoraa, ɛ́mɔyɛ dede; ewiase ne bɔ ɔwɔ nu amukoraa, ɛ́mɔyɛ dede!

⁸ Asue mbiri mɔ, ɛ́mɔbɔ ɛmɔ sa nu; mmokaa mɔ, ɛ́mɔbɔ nu bɛto dwein beli ahurusi

⁹ wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, yeɛ ɔkɔfa ye pɛpɛɛpɛyɛlɛ yeɛ okobua maen maen mɔ ndɛen ɔ.