Edwein 96 - AHYERƐLƐ KRONGRON

AWURADE di ebiala so hene

¹ Ao, ɛ́mɔto dwein foforɛ bɛ́ye AWURADE ayɛ; aseɛ so ama amukoraa, ɛ́mɔto dwein bɛye AWURADE ayɛ.

² Ɛ́mɔto dwein bɛye AWURADE ayɛ, ɛ́mɔhyɛ ye dumaa animnyam, ɛmɔhã ye ngoalelɛ nwo dwirɛ daa biala.

³ Ɛ́mɔbɔ ye animnyam nwo dawure wɔ maen maen mɔ so; ɛ́mɔbɔ ye anwanwadeɛ nwo dawure wɔ maen maen amukoraa so.

⁴ Ofikyɛ AWURADE te piri, na ɔfata ayɛyelɛ piri paa; odi kyɛ sona suro ye tra nyameɛ biala.

⁵ Ofikyɛ maen maen mɔ bɛ nyameɛ nemɔ, bɛte mmosoen mbaen, nakoso AWURADE de, ye yeɛ ɔbɔle anwuro ɔ.

⁶ Anidie ne animnyam wɔ ye nyunu, na tumi ne nyemene wɔ ye nekaa krongron berɛ.

⁷ Ao maen maen mɔ nu mmusua mmusua mɔ, ɛmɔhã; ɛmɔhã kyɛ animnyam ne tumi te AWURADE deɛ.

⁸ Ɛ́mɔfa animnyam bɔ ɔfata AWURADE dumaa ɔ bɛma ye; ɛ́mɔfa afɔleɛ bɛbra ye awuro n’aluo berɛ.

⁹ Ɛ́mɔsɔne AWURADE wɔ animnyam krongron nu, aseɛ so ama amukoraa, ɛ́mɔsuro AWURADE.

¹⁰ Ɛmɔhã ye wɔ maen maen amukoraa nu kyɛ, “AWURADE di hene! Amba, wiase timu berɛ pindinn, ye bo ngotutu le. Ɔkɔfa pɛpɛɛpɛyɛlɛ kobua maen maen nemɔ ndɛen.”

¹¹ Nyameɛso, ma wɔ nye gye, aseɛ koso, di ahurusi, ɛpo ne nu nningyein amukoraa, ɛ́mɔyɛ dede.

¹² Eburo ne eburo nningyein amukoraa, ɛ́mɔma ɛmɔ nye gye, yeɛ eburo mmakaa amukoraa bele anigye bɛkɔto dwein

¹³ wɔ AWURADE nyunu, ofikyɛ ɔ́ba, ɔbaabua aseɛ so ama ndɛen. Ɔkɔfa tenenee yeɛ okobua wiase ndɛen ɔ, na ɔkɔfa ye nahorɛlilɛ yeɛ okobua maen maen mɔ ndɛen ɔ.