Edwein 94 - AHYERƐLƐ KRONGRON

Nyameɛ tɔ bɔnefoɛ so wereɛ

¹ Ao AWURADE, wereɛtɔlɛ Nyameɛ, wereɛtɔlɛ Nyameɛ, kyire wɔ tumi!

² Ao, aseɛ ye aso ndɛenbualɛniɛ, kekã wɔ nwo e, ná tua anwomasoɛfoɛ bɛ so kerɛ!

³ Ao AWURADE, ɔkwaadwu kyinzu yeɛ bɔnefoɛ, ɔkwaadwu kyinzu yeɛ bɔnefoɛ bɛ nye kɔgye ɔ?

⁴ Bɛkekã b’anwomasoɛ dwirɛ nemɔ, bɔnefoɛ amukoraa bɛkekã ahandaen dwirɛ.

⁵ Ao AWURADE, bɛtane wɔ maen nye, bedi w’agyapadeɛ so anyandim.

⁶ Bekũkũ akunafoɛ mmrasua ne ɛwɔfoɛ mɔ, yeɛ bedi nyisiaafoɛ awue,

⁷ na bɛkekã kyɛ, “AWURADE onnwu ye, yeɛ Yakob Nyameɛ ɛhemɔ mva ye nwo.”

⁸ Ao, maen ne anu mmenia bɔ ɛmɔ adwene te nganga ɔ, odi kyɛ ɛmɔte ye bo, ngwaseafoɛ, kyinzu yeɛ ɛmɔkonwu nworɛ ɔ?

⁹ Bɔ ɔfale asoɛ tuale berɛ ne, aso ɔnde dwudwolɛ? Bɔ ɔbɔle anyeɛ ne, aso onnwu nikye?

¹⁰ Bɔ ɔtwe maen maen mɔ so ne, aso ɔngɔhwe asoɛ? Ye yeɛ okyire mmenia nimdeɛ ɔ.

¹¹ AWURADE se kuro sona ti anu adwene, kyɛ ɔte kyɛ nwomeɛ mbaen.

¹² Ao AWURADE, sona bɔ ɛtwe ye so, ɔne bɔ ekyirekyire ye wɔ mmeraa ne, onya saleɛ.

¹³ Ɔnate so ɛmaa ode ye nwome fi amaneɛ mmerɛ nu, kɔpem kyɛ bekotu kumaa maa bɔnefoɛ kɔtɔ nu ɔ.

¹⁴ Ofikyɛ AWURADE ngɔye ye sa ngofi ye maen bo, yeɛ ɔngɔpo ye agyapadeɛ.

¹⁵ Na bekosa bɛkɔfa teneneeyɛlɛ bekobua ndɛen, na bɛ bɔ b’ahone nu te ne, bekoli so.

¹⁶ Nwa yeɛ okodwɔso kotia bɔnefoɛ kɔma me ɔ? Nwa yeɛ okodwɔso kogyina kotia amumuyɛɛfoɛ kɔma me ɔ?

¹⁷ Sɛ nna AWURADE yeɛ ɔte me bokafoɛ a, ahaa ɔngɔhyɛ né me kra waatena nekaa bɔ berɛ te konn ne aso.

¹⁸ Ao AWURADE, mmerɛ bɔ ngane kyɛ, “Mepena mesoti oo” ne, wɔ ɔdɔ bɔ onni ngasi ne tirale me nu.

¹⁹ Sɛ adwenedwene pee tɔ me so a, w’aworakyekyerɛ ma me kra nye gye.

²⁰ Maenbulɛfoɛ atianuserɛfoɛ bɔ bɛhyɛ mmeraa bɛfa bedi bɔne ne, aso bɛkɔhora bɛ ne wɔ kotira abiɛngoɛ?

²¹ Bɛbɔ nu bɛbɔ teneneefoɛ nwo porɛ kyɛ bekohu bɛ, na bebua bɛ bɔ bedi be ɔ foɛ kyɛ behũ bɛ.

²² Nakoso AWURADE yeɛ ɔte m’anwoserɛ afealeɛ, ɔne me Nyameɛ bɔ ɔte m’afealeɛ nyɔbotaen ɔ.

²³ Okotua bɛ b’amumuyɛɛ so kerɛ, ná ɔnate bɛ bɔne ti wanua bɛ boso. Amba, AWURADE yɛ Nyameɛ konua bɛ boso.