Edwein 91 - AHYERƐLƐ KRONGRON

Nyameɛ te y’afealeɛ

¹ Sona bɔ ɔtena Anwuro Anwuroniɛ n’afealeɛ nu, bɔ yeɛ ɔtena Tuminiɛ ne, ye fɔnwoo ne anu ne,

² okose AWURADE kyɛ, “Ɛte m’afealeɛ ne m’anwoserɛ afealeɛ, me Nyameɛ bɔ me wora wura ye nu ɔ.”

³ Amba, ye yeɛ okole wɔ kofi ngaensualɛniɛ ne ngaen nu, ɔne ewue anwonyerɛ tɛɛ nu ɔ.

⁴ Ɔkɔfa ye ndɛkra kɔkata wɔ so, na ye ndaa ne abo yeɛ ekonya afealeɛ ɔ; ye nahorɛlilɛ ne te akokyɛm ne buralɛ ataadeɛ.

⁵ Engosuro nningyein bɔ onwunanwuna sona kɔngɔen ɔ, anaa agyaen bɔ otu nate eyia ɔ,

⁶ anaa ewue anwonyerɛ bɔ ɔnate awosii nu ɔ, anaa anwonyerɛ bɔ okũkũ mmenia eyiagyina ɔ.

⁷ Apee kɔtotɔ wɔ wɔ ngyɛnu, yeɛ apee buru kɔtotɔ wɔ wɔ sa famaa so, nakoso wɔ de, ebie ngɔto wɔ.

⁸ Wɔ nye mbaen yeɛ ɛkɔfa kɔnea ɔ, na ekonwu bɔnefoɛ b’akatuaa.

⁹ Ɔnate kyɛ afa AWURADE ayɛ w’afealeɛ, ná afa Anwuro Anwuroniɛ ne ayɛ w’atenaleɛ ne ati,

¹⁰ edwirɛ tɛɛ biala ngɔto wɔ, ɛhawo piri biala ngopingye w’awuro.

¹¹ Ofikyɛ ɔnate wɔ ti, ɔkɔfa ahyɛdeɛ kɔma ye abɔfo mɔ, kyɛ bɛnea wɔ so wɔ w’atee amukoraa so.

¹² Bɛkɔsoa wɔ wɔ bɛ sa so, amaa ɔnate so wɔ gya ambura nyɔboɛ.

¹³ Ɛkɔnate gyata ne ɛbɔnaa so, na ekotiatia gyata akrɔngrɔma ne sasrabɔnzam so.

¹⁴ Ɔnate kyɛ wafa ye nwo wabata me ne ati, ngɔpepɛ ngole ye. Ɔnate kyɛ ɔse me dumaa ne ati, ngɔpagya ye.

¹⁵ Sɛ osũ frɛ me a, ngotie ye sufrɛ. Ngogyina ye si wɔ ye amaneɛnwunɛ nu; ngɔpepɛ ngole ye, ná mahyɛ ye animnyam.

¹⁶ Ngɔma ye ngoa tendenn ma ye ahone kɔtɔ ye kunu, na ngɔmaa okonwu me ngoalelɛ ne.