Edwein 9 - AHYERƐLƐ KRONGRON

Nyameɛ tumi ne ye ndɛenbualɛ turoloo

Dawide dwein. Ɔfa mane edweinhyirelɛniɛ ne.

¹ AWURADE, ngɔfa m’ahone amukoraa ngɔla wɔ ase; ngɔbɔ w’anwanwadeɛ amukoraa nwo dawure.

² Ɔnate wɔ ti ngɔma me nye kɔgye, ná mali ahurusi; ao, Anwuro Anwuro Nyameɛ, ngɔto wɔ dumaa nwo ayɛyelɛ dwein.

³ Me pɔfoɛ mɔ sale bɛ si, na befifini ase bewuwuli wɔ wɔ nyunu.

⁴ Ofikyɛ ali me dwirɛ ama me, na atena ahennie bia so bɔ ebua ndɛen turoloo ɔ.

⁵ Ahwi maen maen mɔ nyunu, ama bɔnefoɛ b’ayieleɛ ayie bɛ, na anunu bɛ dumaa boso afebɔɔ.

⁶ Pɔfoɛ nemɔ b’ayieleɛ ayie bɛ afebɔɔ maa bɛ boso anunu. Abɔ bɛ nguro nemɔ maa bayɛ kurofoen, na bɛ nwo ngayeɛ atu amini.

⁷ Nakoso AWURADE de, ɔte ye ahennie bia so afebɔɔ, na wafa ye ahennie bia wasie berɛ bɔ obua ndɛen ɔ.

⁸ Obua wiase ndɛen bɔ ɔtengyɛ ɔ; ɔfa pɛpɛɛpɛyɛlɛ yeɛ obua maen maen mɔ ndɛen ɔ.

⁹ AWURADE te anwoserɛ afealeɛ ma bɛ bɔ ebiemɔ hyɛ bɛ so ɔ, anwoserɛ afealeɛ wɔ amaneɛnwunɛ mmerɛ nu.

¹⁰ Na bɛ bɔ bɛse wɔ dumaa ne, bɛfa bɛ wora bewura wɔ nu, ofikyɛ wɔ, ao AWURADE, bɛ bɔ bɛpena wɔ si atee ne, anye wɔ sa amvi bɛ bo.

¹¹ Ɛ́mɔto AWURADE bɔ ɔte Sion ne nwo ayɛyelɛ dwein. Ɛmɔhã bɔ wayɔ ɔ wɔ maen maen mɔ so.

¹² Ofikyɛ ye bɔ ɔtɔ mogya so wereɛ ne, ɔkaye bɛ bɔ bɛwɔ amaneɛ nu ɔ, na ɔmma ye wora mvi bɛ sufrɛ.

¹³ Ao AWURADE, nwu me anwumvoin. Wɔ bɔ ɛpepɛ de me fi ɛborɔ atee pambim nu ɔ, nea amaneɛ bɔ menwu ye wɔ me pɔfoɛ mɔ sa nu ɔ,

¹⁴ amaa ɔnate so mabɔ w’ayɛyelɛ amukoraa nwo dawure. Na ɔnate elelɛ bɔ ale me ne ati, ngoli ahurusi wɔ Sion awa brasua pambim ne anu.

¹⁵ Kumaa bɔ maen maen mɔ batu ne, batete bagua nu; ngaen bɔ besuale bɛfa bɛfeale ne, wasɔ bɛ bɔbɔ bɛ gya.

¹⁶ AWURADE nate ye ndɛen turoloo bɔ obua ne aso waye ye nwo ali wahyire; wama bɔnefoɛ bɛ bɔbɔ bɛ yɔleɛ wayɛ ngaen wahye bɛ.

¹⁷ Bɔnefoɛ bekowu bɛkɔhɔ ɛborɔ, maen maen amukoraa bɔ bɛ wora fi Nyameɛ ne koso, sɔ ala.

¹⁸ Ofikyɛ mmenia bɔ bɛyɛ anwumvo ne, ye wora ngofi bɛ mmerɛ biala le, yeɛ ɔngɔma ehiafoɛ b’anyelasoɛ ngotu ngomini afebɔɔ.

¹⁹ Ao AWURADE, dwɔso e, nnɛma adasa di ngonim; bua maen maen mɔ ndɛen wɔ wɔ nyunu.

²⁰ Ao AWURADE, ma ɛserɛ tɔ bɛ so; ma maen maen benwu kyɛ bɛte adasa mmaa mbaen. Sela