Edwein 85 - AHYERƐLƐ KRONGRON

AWURADE, do yɛ

Kora boso ama dwein. Bɛfa bɛmane edweinhyirelɛniɛ ne

¹ AWURADE, ɛlole wɔ maen; ɛfale Yakob fili nnurehyelɛ nu sa wale.

² Ɛfale wɔ maen ye amumuyɛɛ hyɛle ye; ɛfale bɛ bɔne amukoraa hyɛle bɛ. Sela

³ Ɛhwene wɔ yaa piri ne amukoraa sale, ɛmane w’ahone tɔle nzue nu.

⁴ Ao yɛ ngoalelɛ Nyameɛ, maa yɛsa yɛbra wɔ berɛ, na ɛyaa bɔ afɛ ye wɔ yɛ so ne, yakyi maa ɔha.

⁵ Aso ɛkɔfɛ yɛ so yaa afebɔɔ? Aso ɛkɔma wɔ yaa ne kɔhɔ aworɛ ndoatoasoɛ amukoraa bɛ so?

⁶ Aso engosa ngɔpagya yɛ ko, amaa ɔnate so wɔ maen bali ahurusi wɔ wɔ nu anaa?

⁷ Ao AWURADE, wɔ ɔdɔ bɔ onni ngasi ne, ye ye ali kyire yɛ, ná ma yɛ sa ɔhã wɔ ngoalelɛ ne.

⁸ Nyameɛ bɔ ɔte AWURADE ne, ngotie bɔ ɔkɔhã ɔ, ofikyɛ ɔkɔhã asomdwee dwirɛ kohyire ye maen ne ye anwoteefoɛ, nakoso onni kyɛ besa bekodi ngwaseasɛm.

⁹ Amba, ye ngoalelɛ pingye bɛ bɔ besuro ye ɔ, na ye animnyam ne kɔtena ye aseɛ ne aso.

¹⁰ Ɔdɔ bɔ onni ngasi ne, ɔne nahorɛlilɛ bekoyia; tenenee ne asomdwee bɛkɔyɛ bɛ nwo awaawaatuu.

¹¹ Nahorɛlilɛ kopukye kofi aseɛnwo, ná tenenee wato ye nye wafi nyameɛso wanea aseɛnwo.

¹² Amba, AWURADE kɔfa nningyein paa kɔma, na y’aseɛ kɔhye aleɛ.

¹³ Tenenee koli ye nyunu, na ɔkɔbɔ atimbire bɔ ɔkɔfa so ɔ kɔma ye.