Edwein 84 - AHYERƐLƐ KRONGRON

Nyameɛ sɔnenɛ nu saleɛ

Kora boso ama dwein. Bɛfa bɛmane edweinhyirelɛniɛ ne

¹ Ao Asafo AWURADE, w’atenaleɛ ne, kyɛbɔ osi yɛ nyemene ɔ!

² Amba, me kra tena a ɔndena, na ye wora dɔ AWURADE awuro aluo berɛ ne; m’ahone ne me nwonaen bɛto Nyameɛ teasefoɛ ne anwo anigye dwein.

³ Ao Asafo AWURADE, me Hene ne me Nyameɛ, akatipire po wanya atenaleɛ, yeɛ nandwinoma anya ye saen wɔ w’afɔleɛ bokyea ne anwo bɔ ɔkɔfa ye mma kogua nu ɔ.

⁴ Bɛ bɔ bɛtena w’awuro berɛ ne, benya saleɛ, na bɛto wɔ nwo ayɛyelɛ dwein daa. Sela

⁵ Bɛ bɔ wɔ nu yeɛ b’anwoserɛ wɔ ne, benya saleɛ, na Sion atimbire wɔ b’ahone nu.

⁶ Sɛ bɛnate Baka bɔnza nu a, bɛmaa ɔkakyi mbombonzue aseɛ, na asuso ma saleɛ ba so.

⁷ Bɛnate a, befi anwoserɛ nu bɛkɔ anwoserɛ nu, na bɛ nu biala bafite Nyameɛ nyunu wɔ Sion.

⁸ Ao AWURADE, Asafo Nyameɛ, tie me mbaeɛ. Ao Yakob Nyameɛ, yɛ asoɛ tie! Sela

⁹ Ao Nyameɛ, y’akokyɛm, tie, ná bɔ apopa ye ngoo ne, do ye.

¹⁰ Ofikyɛ ɛlɛhomapɛ bɔ ngoli ye wɔ w’aluo berɛ ne, ɔte paa tra ngyẽa apee bɔ ngoli ye nekaa bie ɔ. Mekuro kyɛ ngɔyɛ me Nyameɛ awuro berɛ anoa wɛmvoɛ tra kyɛ ngɔtena bɔnefoɛ ɛtena sua nu ɔ.

¹¹ Ofikyɛ AWURADE Nyameɛ te eyia ne akokyɛm; ye yeɛ ɔdo sona ná ɔmaa onya animnyam ɔ, na bɛ bɔ bɛ bra te sannwuu ne, ɔmva nikye paa biala mmɔ bɛ atianuserɛ.

¹² Ao Asafo AWURADE, ebiala bɔ ye wora wura wɔ nu ne, onya saleɛ.