Edwein 83 - AHYERƐLƐ KRONGRON

AWURADE bua Yisrael pɔfoɛ mɔ ndɛen

Asafe dwein

¹ Ao Nyameɛ, nnɛkã wɔ noa to nu; ao Nyameɛ, nnɛmua wɔ noa, yeɛ nnɛyɛ konn!

² Ofikyɛ wɔ pɔfoɛ mɔ bɛyɛ bagyabagya, bɛ bɔ bekyi wɔ nemɔ, bɛyɛ lɔen.

³ Bɛbɔ wɔ maen nwo nwandanwona porɛ, na bɛkɔ mmenia bɔ ɛbɔ bɛ nwo waen ne nwo agyina tɛɛ.

⁴ Bɛnwa, “Ɛmɔbra maa yɛnua bɛ maen ne aboso, amaa ɔnate so ebiala wangaye Yisrael dumaa ko.”

⁵ Bɛyɛ adwene ko bɛbɔ porɛ; bɛyɛ apam betia wɔ:

⁶ Edomfoɛ ne Yismaelfoɛ, Moabo ne Hagritefoɛ,

⁷ Gebal ne Amon ne Amalɛke, Filistia ne Tirofoɛ.

⁸ Asiria koso ɔɔbokale bɛ so, bɛfale b’anwoserɛ beegyinane Lɔto boso ama nemɔ bɛ si. Sela

⁹ Bɔ ɛfa yɛle Midian, Sisera ne Yabin wɔ asue Kison nwo ne, fa sɔ alaa yɛ bɛ.

¹⁰ Bɛ yeɛ ehuhuni bɛ wɔ Ɛn Dɔɔ mane bɛ fuin porɔle wɔ aseɛ so ne.

¹¹ Ma bɛ mmenia titire mɔ bɛyɛ kyɛ Orebo ne Seebo, ma b’ahemvo mɔ bɛyɛ kyɛ Seba ne Samuna

¹² bɔ bɛhane kyɛ, “Nyameɛ atenaleɛ ne, ɛ́mɔma yɛho yɛfa yɛyɛ yɛ deɛ” ne.

¹³ Ao me Nyameɛ, maa bɛyɛ kyɛ atendirehuo, maa bɛyɛ kyɛ afafu bɔ mvrama bɔ ye ɔ.

¹⁴ Kyɛbɔ see yera ɛhɔayeɛ too ne, kyɛbɔ buruburugya yera mmokaa motoo ne,

¹⁵ sɔ ala yeɛ wɔ mvrama bɔ otu serɛserɛ ne, fa foa bɛ, ná fa wɔ mvrama piri ne nwunanwuna bɛ ɔ.

¹⁶ Ao AWURADE, ma animguaseɛ bia bɛ, amaa ɔnate so bapena wɔ dumaa si atee.

¹⁷ Ma bɛ nyunu gua ase, ná bɛteetee daa, maa bewu animguaseɛ wue.

¹⁸ Maa benwu kyɛ wɔ bɔ wɔ ngome yeɛ wɔ dumaa ole AWURADE ne, wɔ yeɛ ɛte Anwuro Anwuro hene bɔ edi aseɛ amukoraa so ɔ.