Edwein 81 - AHYERƐLƐ KRONGRON

Yisraelfoɛ asoserɛ

Asafe dwein. Ɔfa mane edweinhyirelɛniɛ ne

¹ Nyameɛ bɔ ɔte y’anwoserɛ ne, ɛ́mɔtea nu bɛto ye nwo dwein; ɛ́mɔfa ahurusi bɛbɔ Yakob Nyameɛ ne nwo ese.

² Ɛ́mɔkenga edwein, ɛ́mɔwoso akasaa ne, ɛ́mɔbɔ sangoo fɛɛfɛɛ ne adengum ne.

³ Ɛmɔhu totorobɛndo wɔ ɛsraen foforɛ aluolue ne, mmerɛ bɔ ɛsraen kɔyɛ mumua ne, wɔ y’aluolue kyẽa ne.

⁴ Ofikyɛ ɔte ahyɛdeɛ ma Yisrael, ɔte Yakob Nyameɛ ne nhyehyɛleɛ.

⁵ Ɔmaa ɔyɛle ahyɛdeɛ mane Yosef, mmerɛ bɔ ohwi fale Misraim aseɛ so hɔle, nekaa bɔ ndele dwudwolɛ bie bɔ nndele bie le ne.

⁶ “Nyele adesoa piri ne mvili ye bati so, ye sa yakyili kɛndɛen kukulɛ.

⁷ Esu frɛle me wɔ w’amaneɛnwunɛ nu, na mbepɛ nnele wɔ; nekaa bɔ agralaa wɔ wɔ mvealeɛ nu ne, berɛ yeɛ mmane wɔ mmuayɛɛ, na nzole wɔ neane wɔ Meriba asue anwo. Sela

⁸ Me maen, ɛ́mɔtie maa ndu ɛmɔ foɛ. Ao Yisrael, sɛ ahaa ekotie me dwirɛ a!

⁹ Onni kyɛ enya nyameɛ foforɛ biala wɔ wɔ nu; nnɛso maenmaensofoɛ nyameɛ biala.

¹⁰ Me ole AWURADE wɔ Nyameɛ, bɔ ɔyele wɔ fili Misraim aseɛ so wale ne. Bukye wɔ noa nu hambonnwu, na ngɔfa nningyein ngowura ye tɛkyɛ.

¹¹ “Nakoso me maen bandie me dwirɛ, Yisrael wammrɛ ye nwo ase wamma me.

¹² Yiti nyakyili maa bɛyɔle bɔ bɛ bɔbɔ bekuro ɔ, maa bɛyɔle bɔ bɛ bɔbɔ b’adwene ma bɛ ɔ.

¹³ Ao, sɛ ahaa me maen kotie me dwirɛ a, sɛ ahaa Yisrael kɔnate m’atee so a!

¹⁴ Ahaa ngɔbrɛ bɛ pɔfoɛ mɔ ase ndɛndɛ, ná mafa me tumi mali bɛ pɔfoɛ mɔ so ngonim.

¹⁵ Sɛ ahaa AWURADE pɔfoɛ mɔ bɛkɔkoto ye nyunu a, ahaa bɛ mmerɛ kɔyɛ afebɔɔ.

¹⁶ Ahaa ngɔma bɛ aleɛ paa maa bekoli, na ngɔma bɛ nyɔbotaen nu woɛ ma bɛ ko koyi.”