Edwein 80 - AHYERƐLƐ KRONGRON

AWURADE, ma wɔ maen ɔpe ye daa nu

Asafe adanzeɛ ne ye dwein. Ɔfa mane edweinhyirelɛniɛ ne

¹ Ao Yisrael Neafoɛ, yɛ asoɛ tie, wɔ bɔ eli Yosef nyunu kyɛ mmoaen kure ɔ! Wɔ bɔ ɛte kɛrubim mɔ so ɔ, ta hyireinn

² wɔ Efraim, Benyamin ne Manase so. Kyire wɔ tumi, ná bra baapepɛ de yɛ!

³ Ao Nyameɛ, maa yɛsa yɛbra wɔ berɛ; te wɔ nyunu kyire yɛ, amaa ɔnate so yanya ngoa.

⁴ Ao AWURADE, Asafo Nyameɛ, wɔ maen mbaeɛ ne, ɛkɔfɛ ye nwo yaa maa okoodwu kyinzu?

⁵ Afa bɛ nye moen ayɛ aleɛ maa bali, yeɛ ama bɛ moen pembepembe maa bano.

⁶ Maen maen bɔ bapɛ yɛ nwo bayia ne, amaa bedi yɛ nwo apereapereɛ, na yɛ pɔfoɛ mɔ bɛsere yɛ.

⁷ Ao Asafo Nyameɛ, maa yɛsa yɛbra wɔ berɛ; te wɔ nyunu kyire yɛ, amaa ɔnate so yanya ngoa.

⁸ Etuli bobe bo fili Misraim wale, ɛfoane amaen maen mɔ fili aseɛ ne aso, na eluale.

⁹ Esiesiele aseɛ ne aso mane ye, otirale ndii, na ɔtrɛtrɛ katale aseɛ ne aso.

¹⁰ Ye bo fɔnwoo ne katale mmokaa nemɔ aso, na ye mmaen frɔmfrɔm ne katale sida mbiri ne aso.

¹¹ Ye mmaen frɔmfrɔm trɛtrɛle alaa ooguale ɛpo nu, yeɛ ye nyaa ne ɔɔhane Asue ne anwo.

¹² Na nzu ati yeɛ abubu ye nwo fasue mɔ agua ye maa ebiala bɔ ɔpɛ nu kɔ ne, ɔtete ye mma ne bie e?

¹³ Ɛhɔayeɛ nu kɔkɔte tiatia so, na eburo ngaka amukoraa bɛtete bedi.

¹⁴ Ao Asafo Nyameɛ, sa baanea yɛ; to wɔ nye fi nyameɛso nea, ná baanea bobe ye aso,

¹⁵ bobe boo bɔ ɛnate wɔ bɔbɔ wɔ tumi so ayɛ ne, ɔne mmaen bɔ afa atindim berɛ ama wɔ nwo ne.

¹⁶ Bafa see bayera ye, bapɛ bato ase; sɛ wɔ nye boro bɛ so a, bewuwu!

¹⁷ Nakoso sona bɔ ɔwɔ wɔ sa famaa so ne, sona awa bɔ wɔ ti amaa wanya anwoserɛ ne, nea ye so, ná bɔ ye nwo waen.

¹⁸ Ɔba ye sɔ a, yɛngɔkakyi yɛ si yɛngɔma wɔ. Maa yɛnya ngoa, na yɛkɔbɔ wɔ dumaa.

¹⁹ Ao AWURADE, Asafo Nyameɛ, maa yɛsa yɛbra wɔ berɛ; te wɔ nyunu kyire yɛ, amaa ɔnate so yanya ngoa.